Read Sangtam Naga JEREMIA 31 Bible Online

JEREMIA 31 - Sangtam Naga bible

JEREMIA 31

¹ABÜDONGBAnü yore, “Israelrü hung apüm Tsingrang Ih thsanung, ko arüh I müyurü thsanung becho chihle.

²Asü lanü tsichehrü te Ihnü lihpi la yanglilüm ngusohcho.

³Israelrünü akyahshang mükhyahde ashu lanü arüh te shirücho. Israelrü, Ihnü lede nührü müicho, hütsünü Ihnü nührü te amüthreba amüi mütozah ngusohre.

⁴Ihnü thali nührü külüpchijünung. Thali nührünü tambourin bi künyang nyiichinung.

⁵Anyüpiu nührünü Samaria khang chah shükusih khyümnung, ko akhyümrünü hütsü lanü chürocho tsunung.

⁶Ho, roshengrünü Efraim khang chah, ‘Ihsanü Zion lang ABÜDONGBA Ihsa Tsingrang yang küdunung, pü züdenung becho chihle.’ ”

⁷ABÜDONGBAnü yore, “Israel nengdang akünyang khi thsaang, yuchoti yola adiuba. Nührü nengsekhi thsaang, ‘ABÜDONGBAnü abi müyurü khümchoko; Abinü nying lirü apüm khümchoko.’

⁸Ihnü arüh kihku lahpinü noronung ko alih changka lanü nübülungnung. Nahtohrü ko jingjahrü, fü müdengrü ko mülihmülanung thsarü arüh yola ronung. Arüh yucho amülah kang thali ronung.

⁹Ihnü I müyurü thali norode, arühnü traanü dangkhidangnang thalinung. Ihnü arüh yongna yang arüh jing mümüthisohnung lang atsa lanü noronung. Ih Israel nengdang au khüdu ko Efraim tsü I tsurü aukhuba kyo lile.”

¹⁰ABÜDONGBAnü yore, “Yuchoti, I yu nyieng, ko kihkeh khüulang ashu la I yu sobhoung. Ihnü I müyurü shupishuzasohcho, ta san nyahrünü abi san nyahcho kyo, Ihnü arüh nübülung nyahnung.

¹¹Ihnü Israelrü lehcheh yohpücho, ko rezeh yucho chahnü arüh khümcho yohpücho.

¹²Arühnü ronung ko Zion zong chah akünyang khi thsanung, ko I jiyü te künyangtanung- tsang, yongkha ko tuji jiyü san ko misü jiyü. Arüh kih tsa xahcho latbü kyonung; arüh thsütah lüpcho linung.

¹³Hütsüde lazarünü nyiichi künyangnung, ko adhrerü aza-azinü künyangtanung. Ihnü arüh tbachijünung ko arüh alongri ko akünyang ko arüh awah tsü alongphi kangsohnung.

¹⁴Ihnü tsuyongba atsanü bebürü jengsohnung ko müyurü thsütah apüm desahnung. Ih, ABÜDONGBAnü choko.”

¹⁵ABÜDONGBAnü yore, “Rama la yuva khüdu yuchire, khütang longri tracho yuva. Rachelnü atsurüti nengdang trare; arüh tsipehko ko kihcho nye münyire.

¹⁶Trazahng ko nahshükih nipehng. Nühnü nü tsuzarüti nengdang nguchicho apüm tsü müjiyühpü mülinung; Arüh arorüh lih lanü thalinung.

¹⁷Nührü aronung alongdi lile; nührü tsuzarüti thali ronung. Ih, ABÜDONGBAnü choko.”

¹⁸“Israelrünü longri yocho yuchiko, ‘ABÜDONGBA, ihrü amürahsehcho kanglungrü kyole, ta nühnü yocho nyinung ihrü te docho. Ihrü thali norung; Nüh ABÜDONGBA, ihrü Tsingrang yang thali ronung rungnüm lile.

¹⁹Ihrü Nü tenü ximüla tsiko, ta zah ihrü thalinyüre. Nühnü ihrü khingchiko khanglang, ihrü alongri la licho. Ihrü shahseh ko wah licho, tunüo ihrü azarü thsade ihrünü amünyi shitpahcho.’ ”

²⁰“Israel, nüh Ihnü müiba tsurü, Ihnü amüi-uba akhunga. Khode nü neng dangchinang, Ihnü nüh müinü lümre. I lasih nü khyang jopehko; Ihnü yanglilümnung.

²¹Amüdhethsa yohpüng ko lang tsü tsüpm; nüh tsiba lang tsü tsüpm. Thali rung, Israelrü, nührünü pehjüba yangdi lang kyo.”

²²Khüdoi nyahli tütohnyünyehnung, yudsi müliba nyitsarüti? Ihnü lango asi ko apa külüpko, khingkurünü adhrerü tsungticho kyo.”

²³Akohba ABÜDONGBA, Israel Tsingrangnü yore, “Müyurü tsü Ihnü arüh lih lang rosohde, arühnü Juda la ko yangditi la hita thali yonung, ‘ABÜDONGBAnü Jerusalem amüsa khang, Abi liba amüsa müdüm müwajüng.’

²⁴Juda ko abi yangditi la nyitsarütinü linung ko hütsüla luthsarü ko san nyahrü arüh santi te linung.

²⁵Ihnü kyahseh lirüti longtbasohnung ko ayangaxorü longxosohnung.

²⁶Hütsüde nyitsarütinü yonung, ‘Ih yüpcho ko xengxeng jesucho.’

²⁷“Ihnü Israel ko Juda lih nyitsarü ko kanglungrünü jengsohnung becho chihlepü Ih, ABÜDONGBAnü yore.

²⁸Ihnü rohchehnung, tphahchonung, mükhamülanung, changjünung ko arüh thsangnyangjünung kohcho kyo, Ihnü arüh khyümnung ko külüpchijünung.

²⁹Hütsüba bekhyah chihde, müyurünü hita müyonung, ‘Tburünü aci tsucho, ta tsuzarü ha sücho.’

³⁰Hütsü mülih, sünü aci tsunang apu ha sünung; ko palu münyi ngang palu sünung.”

³¹ABÜDONGBAnü yore, “Ihnü Israelrü ko Judarü te azengtacho asi khüdu külüpnung becho chihle.

³²Hütsü Ihnü arüh jümürü Ijip lanü nüchehde arüh te külüpba azengtacho mükyonung. Ih arüh anii kyo linye, arühnü hütsüba azengchotacho tsü müyohbü.

³³Ihnü Israelrü te külüpnung azengtacho asi tsü hiroh-i linung: Ihnü I yuzeng arüh chah yohjünung ko hütsü arüh lasih la thrahnung. Ih arüh Tsingrang ko arüh I müyurü thsanung.

³⁴ABÜDONGBA müdhenung sünüsü abürü nyitsarü te müdonung, tunüo azaubanü adiuba chii, apümnü Ih müdhenung. Ihnü arüh mülangpehjünung ko arüh münyi mülümchehnung. Ih, ABÜDONGBAnü choko.”

³⁵ABÜDONGBAnü anyümong visohnung nyü, ko aromang nengdang chonu ko chenghiti jüre. Abinü kihdi ruhmüsure ko khongsohre; Abi neng Akohba ABÜDONGBA.

³⁶Athrijungcho li yingcheh, Israel yucho khüdu lisohnung Abinü nyengchore.

³⁷Ning kiidhengchehkhang alimih jongnah müdhekhang nyümong du Abinü arüh nguchicho apüm ngang Israelrü mükhyüchonung. ABÜDONGBAnü choko.

³⁸ABÜDONGBAnü yore, “Jerusalem tsü I yangdi kang nyüzüdulang Hananel Rangrangkuh lanü Nango lang Tbükhüm chii külüpchinung becho chihle.

³⁹Ko lurüh tsü nyüzüdulang hütsü lanü Gareb khang ko Goah chii linung.

⁴⁰Kongyo ko sehnyeh pehji angah tsü apümshünü ko Kidron Kihna thah lang rangmü apüm nyüchürolang Kuri Tbükhüm chii apüm tsü I nengdang amüsa linung. Adelü yangdi tsü khodesü müthsangnyangnung mahkhang müchangnung.”