Read Sangtam Naga JEREMIA 33 Bible Online

JEREMIA 33 - Sangtam Naga bible

JEREMIA 33

¹Ih adesü kekhüm arangyoh kuhla lide, Ih yang ABÜDONGBA yusi rocho.

²Limih thribong, hütsü chürosohba ko hütsü lisohbanü I te chotacho. Abinü yocho, Abi neng tsü ABÜDONGBA,

³“I te dsing ko Ihnü lalingnung; nührünü mümüdhecho Ihnü anyemüyangnung ko anyekanung yu yonung.

⁴Ih, ABÜDONGBA, Israel Tsingrangnü yore, Jerusalem la kuh ko Juda la Yangthsaba kuh mahnü tphünahjünung.

⁵Khürünü Babylonrü nyüm chitanung, hütsüla I rihlong chüro kyüsehnung liba me dunü yangdi jengnung. Nyitsarütinü amünyi nguchicho khu Ihnü hiba yangdi pehjücho.

⁶Ta Ihnü hiba yangdi ko nyitsarüti kyangjünung ko arüh tsasohnung. Ihnü arüh te yangtsa ko akhümcho thangchi ngusohnung.

⁷Ihnü Juda ko Israel pungrohirosohnung, ko arüh akhudi kyo külüpchijünung.

⁸Ih nyüm amünyi shitpahcho lanü Ihnü arüh müsachehjünung, ko arühnü nyümcho münyi mülangpehjünung.

⁹Jerusalem tsü I bete akünyang, adhichi ko akükhing linung; ko Ihnü Jerusalemrü te nguchi atsa nguchicho ko yangdi chah amüwa mükhakehjücho yuchide limih la yuchotinü drünung ko dhridhrinung.”

¹⁰ABÜDONGBAnü yocho, “Hiba müdüm hi lihpi kyole, ko hila lirü nyitsarü mahkhang kanglungrü mii mülepü nyitsarünü chore. Ko arüh yuje lile; Juda yangditi ko Jerusalem yanglong adeng lile; hütsüla nyitsarü mahkhang kanglungrü tusü müle.

¹¹Ta hiri müdüm la akünyang ko alongphinü züdecho ko kukangba thsüti yuva nührünü thali yuchinung. I amübükuh la nengse amübü hirode khi thsacho nührünü yuchinung; arühnü yonung, ‘Akohba ABÜDONGBA neng seing, tunüo Abi atsa lile ko Abi amüi achangka müle.’ Ihnü hiba lih hi akhudi kyo pungrohirosohnung. Ih, Akohba ABÜDONGBAnü choko.”

¹²Akohba ABÜDONGBAnü yore, “Hiba lihpi, nyitsarü ko kanglungrü mülichehba lih la, san nyahrütinü arüh santi lamungsohnung thali zanu chisohnung.

¹³Azonglih yangditi la, azong jingdümpi la ko Juda kihjing lahpi, Benjamin lih la, Jerusalem mükang liba yangdongti la ko Juda yangditi la, san nyahrünü thali arüh san khinung. Ih, ABÜDONGBAnü choko.”

¹⁴ABÜDONGBAnü yocho, “Ihnü Israelrü ko Judarü te nyengchocho tikehnung becho chihko.

¹⁵Hütsü shikhe Ihnü David trah lanü Amüsarü khüdu Yangthsaba thronung. Hiba Yangthsabanü yanglih apüm la yuje ko athsalang du nguchinung.

¹⁶Judarü ko Jerusalemrü khümchonung ko tbachi linung. Yangdi tsü, ‘ABÜDONGBA Ihrü Akangcheh’ pü dsinung.

¹⁷Israel la lede David trah la dunü Yangthsarü chürosohnung Ih, ABÜDONGBAnü nyengchore,

¹⁸ko I dikehnung ko trüp mübü, tsang mübü ko kangmübü mübünung lede Levi hung lanü bebürü thronung.”

¹⁹ABÜDONGBAnü I te yocho,

²⁰“Ihnü anyümong ko aromang arüh becho la rosohnung azengchotaba külüpko; ko hütsü khodesü müthsangnyangnung.

²¹Hütsü kyo lede I dikehrü David trah lanü Yangthsaba chüronung azengchotaba külüpko; ko Levi hung lanü Ih lede dikehnungthsa azengchotaba külüpko; ko hütsüri khodesü müthsangnyangnung.

²²Ning chah chenghiti khidhengnung mükohcho kyo ko kihbekhüm la lihpi mükhihchehcho kyo, I dikehrü David tsurüti ko I dikehnung Levi hung lanü bebürü suhsohnung.”

²³ABÜDONGBAnü I te yocho,

²⁴“Ihnü throchehcho tsutpu anyüh Israel ko Juda Ihnü mükhyüchorepü nyitsarünü choba tsü nühnü mümüdheo? Hütsüta arühnü I müyurü nyümre ko arüh yucho khüdu kyo mükhichire.

²⁵Ta Ih, ABÜDONGBAnü anyümong ko aromang te azengchotaba külüpko, ko ning ko alih rahsehnung Ihnü yuzeng jüko.

²⁶Ko Ihnü hi yutsatsa nguchicho kyo, Jakob tsurüti te ko I dikehrü David te I azengtacho yohpünung. Abraham, Isak ko Jakob trah michah yangthsanung David trah lanü Yangthsarü khüdu thronung. Ihnü I müyurü te yanglilüm ngunung ko arüh thali pungrohirosohnung.”