Read Sangtam Naga JEREMIA 39 Bible Online

JEREMIA 39 - Sangtam Naga bible

JEREMIA 39

¹Juda la Zedekia yangthsacho kang adüku-u choo adhüreu la, Yangthsaba Nebukadnezarnü arothsarü apüm nüpü ro Jerusalem mahcho.

²Zedekia yangthsacho kang dhüre-kheh, choo müyü ko nyümong adüku-u la, yangdi tbü tsü khülucho.

³(Khode Jerusalem mahchehcho, Babylon Yangthsaba pohki adirüti rocho ko arühnü alonglaba Tbükhüm ko Nergal Sarezer, Samgar Nebo, Sardekim ko aparü Nergal Sarezer zehnü pümcho.)

⁴Tikehyaba tsü Yangthsaba Zedekia ko abi rothsarütinü ngude, arühnü yangdi la tsünü ama lanü rang tsinyücho. Arühnü yangthsarü tbü lang la tsünü tbü anyüh shirütaba tbükhüm tsü khu wücho, ko Jordan Ngah lang tsü rang tsicho.

⁵Ta Babylon rothsarütinü arüh iiwücho ko Jeriko shündhün angah la tsünü Zedekia tsü rangcho. Ko arühnü Zedekia tsü Yangthsaba Nebukadnezar yang Hamoth lih la Ribla yangdi lang nowücho, ko hütsüla Nebukadnezarnü abi yu khacho.

⁶Ribla la Zedekia apunü dhengya atsurüti süsohcho, ko abinü Judarü adirütisü kyüsehcho.

⁷Hütsüpü, Zedekia nah hehchehpehsohcho ko Babylon lang xohpü nowüsohcho.

⁸Hütsüde Babylonrünü Yangthsaba kuh ko müyurü kuh trüp-pehjücho ko Jerusalem tbü tphahtsucho.

⁹Achangkathsa anüchiba Nebuzaradan-nü yangdi la nying lirü tsü abi yanglang tsirorü yola Babylon lang küm nowücho.

¹⁰Abinü kuthsi mülirü ailümrü khürü du Juda la pehjücho, ko abinü arüh khyang shükusih yo ko luh jücho.

¹¹Ta Yangthsaba Nebukadnezarnü yuzeng hiri jünung anüchiba Nebuzaradan khyang jücho:

¹²“Wüng ko Jeremia yangching ko abi dee tsa xüküm. Abi tüthsakehjü, ta abinü tu khyünyüro hütsüta nguchijüng.”

¹³Hütsüpü Nebuzaradan ko adirü Nebushazban ko Nergal Sarezer ko Babylon Yangthsarü pohki adirütinü

¹⁴Yangthsaba kekhüm la tsünü Ih norocho. Ih kuh chihcho dhengyehnung Shafan shümtsurü, Ahikam tsurü Gedalia khehla Ih yohpüjücho. Hütsüta müyurü yola Ih licho.

¹⁵Ih yangthsaba kuhla arangyoh la liyade,

¹⁶ABÜDONGBAnü I te Ethiopiarü Ebedmelek te ABÜDONGBA, Israel Tsingrangnü hita yorepü yosohcho, “Ihnü nguchinung yocho kyo, hiba yangdi chah amüwa mah ta achangba hironung. Ko hi tikehde, hütsü ngunungthsa nüh hütsüla linung.

¹⁷Ta Ih, ABÜDONGBAnü nüh tsungtinung ko nühnü drüba nyitsarü khehla nüh müjünung.

¹⁸Ihnü nüh khümcho yohpünung, ko nüh müsüsohnung. Nüh akang tsichehnung tunüo nühnü I chah longlangcho. Ih, ABÜDONGBAnü choko.”