Read Sangtam Naga JEREMIA 4 Bible Online

JEREMIA 4 - Sangtam Naga bible

JEREMIA 4

¹ABÜDONGBAnü yore, “Israelrü, nührünü ximülaekhang, Ih yang ximülang. Nührünü I te yuje chokhang ko Ihnü thrünyiba kyothri tsü pehkhang,

²nührünü I nengla yuchümnung tsü athsalang linung. Hütsüde yucho apümnü arüh müwajüng pü I te kihchinung ko arühnü I neng senung.”

³ABÜDONGBAnü Judarü ko Jerusalemrü te yore, “Nührü luh tsü mükyünahng; majüh tsü zengtrung la tüshu.

⁴Nührü anyengchotaba tsü Ih nührü ABÜDONGBA te yohpüng, ko nührü jangjang I te müsachehng, nührü Judarü ko Jerusalemrü. Hütsü mahkhang nührünü amütsa nguchicho ngang michang kyo I rihlong chüronung. Hütsü trüpnung ko amehsohrü süsü mülinung.”

⁵Rühti tsü limih apümlang mehng! Tasenü tsitsa züdeing. Judarü ko Jerusalemrü te atbüticho yangditi lang tsinung young.

⁶Zion wüba lang thongung! Tsichehnung shang! Tümünu! ABÜDONGBAnü kihku lahpinü achangba ko athsangnyang amülah hirole.

⁷Kihkhünying akuh lanü chürorü kyo, yuchoti changjürü khüdu shemüsuko. Abi Juda changjünung rore. Juda la yangditi changjünung, ko hütsüri la süsü münyingnung.

⁸Hütsüeko müyahshü müpieng ko traang, tunüo Juda chahnü ABÜDONGBA rihlong mükhyümüi.

⁹ABÜDONGBAnü yocho, “Hütsü nyümong yangthsarüti ko adirüti suhzahnung; bebürüti nehnung ko azikehrüti nyemüyangnung.”

¹⁰Hütsüde Ihnü yocho, “Akohba ABÜDONGBA, Nühnü Jerusalemrü khüdupinü kihyochüko! Hütsüla yangtsa chüronungepü Nühnü yocho, ta arüh hong la nohsheng lile.”

¹¹Jerusalemrü te lipilih lanü nyübong adhsa arüh yang folepü yonung becho chihle. Hütsü mayü fopehba alonglüm nyübong müthsanung.

¹²ABÜDONGBAnü mülajo rosohba nyübong tsülü deenü aziu thsanung! Hi ABÜDONGBA apunü apu müyurü chah yukhaba seyohjüre.

¹³Dheng, arorüh tsü nyükhi kyo role. Abi khata kuri tsü nyübong roh-i ko abi kuriti tsü müdi tenü atsayaba. Ihsa changko! Ihsa ahohah!

¹⁴Jerusalem, nührü khümchonungthsa, nührü lasiking lanü amünyi tsü thsüthohpehng. Kükhya nührünü amünyi du lüm linung?

¹⁵Dan yangdi ko Efraim zong langnü yusi hirünü yusi amütsa züdecho.

¹⁶Yuchoti te ko Jerusalemrü te limih ashu lanü arorüh tsehlepü yonung rocho. Arorüh hirinü Juda yangditi nyüm züdenung

¹⁷ko nyitsarünü luh nyahcho kyo arühnü Jerusalem betinung, tunüo abükyü müyurünü ABÜDONGBA nyümko. ABÜDONGBA nü choko.

¹⁸Nü lili ko nü nguchinü nübükyü michah hiri hirore. Chongcha hi nü münyinü hirore; hütsünü nü lasih khakhu chiiko.

¹⁹Adhsa! Adhsa tsü Ihnü mürangcho! I lasih! I lasih khütang thüthohle! Ihnü yaa mülicheh; Ihnü rühti yuva ko khata yuva yuchire.

²⁰Achangba khüdu khanglang khüdu; Yanglih apüm chang pehjüko. Dhrongyengnü Ihsa shükuh thsangnyangko; Akitising rohzangzangko.

²¹Rothsacho kükhya ngunung ko rühti yuva kükhya yuchinung?

²²ABÜDONGBAnü yore, “I müyurüti adohrü; arühnü Ih mütsüp. Arüh amükhyu zati kyole; arüh anyichehba müle. Amünyi nguchinung la arüh asithsa, ta atsalü münguchicheh.”

²³Ihnü limih chah dhengcho hütsü apehcho adeng; ning chah dhengcho, atsingse mülicho.

²⁴Ihnü azongti chah dhengcho, arüh dhridhri yacho, ko akhang tsü shühchi ngucho.

²⁵Ihnü nyitsarü li müngu; Uza mii mong tsikhangcho.

²⁶Asu lih tsü lipilih kangpehcho; yangditi changpeh ngucho, hütsü ABÜDONGBA rihlong khunü.

²⁷(Limih apüm apehlih kangpehnungepü ABÜDONGBAnü yo licho, ta hütsü Abinü ririlü müchangjünung.)

²⁸Liminü meshünung; Ning marürah kangpehnung ABÜDONGBAnü chopehko ko Abi lasih mümülichinung. Abinü dhrongchehpehko ko müximülanung.

²⁹Kuri chah pümrü ko singthsalu birü yuva yuchi atümungnü rang tsinung. Khürü mürong lang tsinung; khürü lungrah la rangnung. Yangdi apüm pehjünung, ko hütsüri la süsü thali mülinung.

³⁰Jerusalem, nüh ahohah! Tuepü amoh jengkiro? Tuepü thsidilung yohro ko nü nahküp tühro? Nühnü adeng nengdang nü tsah külüpre. Nü müitarünü nüh mükhyücho ko nüh kyüsehnyüre.

³¹Ihnü yuva khüdu yuchire, khingkurü mikhungde kyo, khingkurü akhudi azarü surode rühchicho kyo. Hütsü Jerusalem sah chichicho yuva, akheh müyungcho hita yocho, “Ih changkako! Arüh Ih kyüsehnung tsehle!”