Read Sangtam Naga JEREMIA 40 Bible Online

JEREMIA 40 - Sangtam Naga bible

JEREMIA 40

¹Anüchiba Nebuzaradan-nü Ih Rama la lehcheh müthehko khanglang, ABÜDONGBAnü I te chotacho. Ih hütsüla Jerusalem ko Judarü Babylon lang küm tsirü yola ixilihnü xohpü nowücho.

²Anüchiba tsünü Ih nükhu yocho, “ABÜDONGBA nü Tsingrangnü hiba lih nengdang achangba choyohcho,

³ko ade abinü yocho kyo nguchiko. Nü nyitsarünü ABÜDONGBA nyüm amünyi shitpahcho ko abi yu münyicho ngang hiri apüm tikehre.

⁴Ade, nü kheh lanü Ihnü ixilih khyüchehjüre ko nüh lehchehre. Nühnü Babylon lang I yola wünyükhang nüh ronung kohle, ko Ihnü nüh xükümnung. Ta nühnü müronyükhang türo! Nü nengdang limih apüm lile, ko nü wünyücholang wünung kohle.”

⁵Ihnü mülalingülü, Nebuzaradan-nü yocho, “Shafan shümtsurü ko Ahikam tsurü Gedalia, sü Babylon Yangthsabanü Juda yangdi la governor kangsohcho, abi yang thali wüng. Nühnü abi te müyurü yola linung kohle, mahkhang nüh khüde wünyüro masülang wünung kohle.” Hütsüpü abinü I khyang jiyü khüdu ko tsuyongba jücho, ko Ih tsisohcho.

⁶Achotsü Ihnü Mizpa la Gedalia te linung wücho ko nying liba müyurü yola licho.

⁷Judarü adirü ko rothsarü khürü mühap-pü licho. Babylon Yangthsabanü Gedalia tsü governor kangsohko ko Babylon lang mükümtsirü alih la ailümrüti abi khyang xükümsohcho arühnü yuchicho.

⁸Achotsü Mizpa la Gedalia yang arüh nyitsarü nüpü Nethania tsurü Ishmael, Karea tsurü Johanan, Tanhumeth tsurü Seraia, Netofa lanü Efai tsurü ko Maka lanü Jezaniarü wücho.

⁹Gedalianü arüh te yocho, “Nührünü Babylonrü khehla hapnung dro linung müdhsüta pü Ihnü nührü te yore. Hiba lih la lieng, Babylon Yangthsaba dikehng, ko nührü tu müthsanung.

¹⁰Ipusü Mizpa la linung ko hila Babylonrü rode nührü nengla chotanung. Ta nührü liba yangdongti la nührünü yongkha, singsih ko olive tuji khyübülung zahkehng.”

¹¹Hütsütade Moab, Amon, Edom ko apa yangditi la liba Israelrünü, Babylon Yangthsabanü Israelrü khürülü Juda la lisohcho ko arüh michah Gedalia tsü arüh governor kangsohcho yuchicho.

¹²Achotsü arühnü arüh shupishuza liyaba müdümti pehjücho ko Juda lang thalicho. Arühnü Mizpa la Gedalia yanglang rocho ko hütsüla yongkha ko singsih khütang khyübülung jücho.

¹³Hütsüpü, mühap-erü Johanan ko langnürütinü Gadalia yang Mizpa la rocho,

¹⁴ko abi te yocho, “Amon Yangthsaba Baalisnü nüh mapsehnung Ishmael rosohcho nühnü mümüdheo?” Ta Gedalianü müyudsicho.

¹⁵Hütsüde, Johanan-nü abi te rangnü yocho, “Ihnü wü Ishmael kyüsehnung, ko hütsü sününang bürünü mümüdhenung. Tuepü abi khyang nüh mapsehsohnung? Hütsünü nüh mükang shibülung liba Jihudarü hi apüm shupishuzasohnung, ko Juda la nying liba nyitsarü apüm yang achangba hironung.”

¹⁶Ta Gedalianü lalingcho, “Doh! Nühnü Ishmael nengdang yoba tsü yuje mah!”