Read Sangtam Naga JEREMIA 48 Bible Online

JEREMIA 48 - Sangtam Naga bible

JEREMIA 48

¹Moab nengdang Akohba ABÜDONGBAnü hita yore: “Neborü müi o arüh yangdi changko! Kiriathaim kohcheh, abi roshengvi khüluko, ko abi nyitsarü ashah khyüsohko;

²Moab ahechi tsiko. Arorühnü Heshbon mahchehko ko Moab yanglih changjünung rah külüpko. Madmen yangdi naying kangnung; rothsarünü hütsü nyüm wünung.

³Horonaimrünü züdenung, ‘Shühkhatoh! Achangba!’ ”

⁴“Moab changjüko; azarüti tracho nyidheng.

⁵Luhith lang ayung arüh longri tracho yuva tsü nyidheng, Horonaim jowüba lang la tsü.

⁶Arühnü yore, ‘Thsüthsang, nührü akang nengdang!’ ‘Rangmü gadu kyo shang!’ ”

⁷“Moab, nühnü nü re ko kuthsi chah longlangcho, ta ade nüh mii kohchehnung; nührü tsingrang Khemosh mii yangthsarü ko bebürü yola yangtsilang wünung.

⁸Changba la tsünü yangdi khüdu mii mütsichehnung; angah ko yongshü anyüding changnung. Ih ABÜDONGBAnü choko.

⁹Moab nengdang lung khyüm; tunyah mülipü hütsü changnung. Yangditi thsangnyang jonung, hütsüla süsü thali mülinung.”

¹⁰(Sünü ABÜDONGBA nguchi abi lasih apümnü münguchiro, abi chokehcholang! Sünü shühtpheh mükyüsehrünang abi chokehcholang!)

¹¹ABÜDONGBAnü yocho, “Moab tsü lede khümcho li rore ko khodesü yangtsilang müwodheng. Moab tsü khodesü füh khüdu lanü apa khüdu la mütungmülatadhengba ajümkehcho yongkha kyole. Axümlichi mümünangdheng, ko anyiyah tsü abübü.”

¹²“Hütsünü ade, yongkha kyo Moab tungpehnung Ihnü nyitsarü müthehnung. Arühnü yongkha füh tsü dengchehnung ko zangzang mapnahnung.

¹³Israelrünü arühnü longlangba Bethel tsingrang te shahcho kyo Moabrünü arüh tsingrang Khemosh te shahnung.

¹⁴“Moabrü, tuepü nührünü khata la xangchehcho athrungrü ko akurahrüepü yoro?

¹⁵Moab ko abi yangditi changpehko; abi dhrezarüti kingthrümko. Ih, Akohba ABÜDONGBA Yangthsaba, ko Ihnü choko.

¹⁶Moab changnung chihko, abi thsangnyangnung chihko.”

¹⁷“Nührü shündhün liba yucho nengdang meshüng, abi nengse müdherü nührü apüm. ‘Abi tase tsü thsangnyangko; adelü abi ahechi ko re müle.’

¹⁸Nührü Dibon la lirüti, nührü ahechi pümji lanü jürung ko lihwü la püm; Moab changjürü hila lile, ko roshengvi thsangnyang yohpüjüle.

¹⁹Nührü Aroer la lirüti, lang te ying yang, dro tsirü te atikehcho tsingdheng.

²⁰Arühnü lalingnung, ‘Moab khüluko,’ ‘hütsü nengdang traang; abi wah lile. Moab tsü changkako pü Arnon yongkhi tung züdeing.’

²¹“Akhangngah la liba yangditi: Holon, Jaza, Mefat,

²²Dibon, Nebo, Beth Diblathaim,

²³Kiriathaim, Betgamul, Betmeon,

²⁴Kerioth ko Bozra michah yukhaba roko. Moab yangditi ashu ko amünyeh la liba apüm chah yukhaba roko.

²⁵Moab re thsangnyangjüko; abi tase changjüko. Ih, ABÜDONGBAnü choko.”

²⁶ABÜDONGBAnü yocho, “Moab müchasohng, tunüo abinü Ih nyümko. Moab tsü abükyü mülühcho la chichinung ko bürünü münyodhengnung.

²⁷Moab, nühnü Israelrü khüta münyodhengcho lümchehng? Arüh fühkhohrü yola rangcho kyo nühnü arüh bichicho.

²⁸“Nührü Moab la lirüti, nührü yangditi pehjüng! Wüng ko lungdhong la lieng! Lungdhong bekhüm la arüh süp shüba mümüdhrü kyo lieng.

²⁹Moab dee müthsehle! Arüh khüta amüthseh, ahongzi, ko künyangküshiro, ko arühbürü nengdang khüdoi lümro, hiri apüm Ihnü müdhele.

³⁰Ih, ABÜDONGBAnü arüh kükhingcho müdhele. Arüh tüzümükhümba tsü tu mükangnung, ko arühnü nguchiba tsü anyahli mülinung.

³¹Hütsüta Ihnü Moab ko Kir Heres la lirü apüm nengdang tranung.

³²Ihnü Jazer-rü nengdang tracho tenü alaa Sibmarü nengdang tranung. Sibma yangdi, nüh Asü Kihdi khu wüba ko Jezer chii wüba shükusih jengza kyole. Ta ade nührü müyü singsih ko shükusih thsangnyangpehko.

³³Asu lih Moab lanü akünyang ko alongphi hitsiko. Ihnü shükusih nyehji lanü cikih külüp künyangtanung süsü müle.

³⁴“Heshbonrü ko Elealerünü züdere ko arüh yuva tsü Jahaz lanü mii yuchire; Zoar-rünüsü yuchinung kohre ko hütsü Horonaim ko Eglath Shelishiya lanü mii yuchire. Nimrim kihnatungsü kungpehko.

³⁵Moabrünü amübükuh la trüp mübüba ko arüh tsingrangti khyang kangmübü mübüba apüm yatinung. Ih, ABÜDONGBAnü choko.

³⁶“Hütsünü, khürünü bongphelu lanü meshü khi thsacho kyo, I lasihnü Moabrü ko Kir Heresrü nengdang longrire, tunüo arüh licho lüpcho changko.

³⁷Arüh apüm arüh thah ko arüh benbüh hehko. Arüh atümung arüh kheh tsehnahko ko müyahshü müpire.

³⁸Moabrü kukhi apüm ko yanglong apüm la metraba chah khu apa müle, tunüo sünü mükhyünyüba füh khüdu kyo Ihnü Moab müpnajüko.

³⁹Moab shühnahko! Züdeing! Moab ashah khyüsohko. Hütsü chang lile ko mükangmüshü liba yucho apümnü hütsü münyodhengre. Ih, ABÜDONGBAnü choko.”

⁴⁰Müdi aqo lohpü jürocho kyo, yucho khüdunü Moab chah thsücho jüronung,

⁴¹ko yangditi ko roshengviti kohchehnung ABÜDONGBAnü nyengchoko. Hütsü nyümong Moab rothsarüti tsü khingkurü mikhungde nehcho kyo linung.

⁴²Moab changnung ko hütsü adelü yucho khüdu müthsanung, tunüo abinü Ih nyüm yako.

⁴³Moabrü nengdang adrüba, mütrüm ko uzathsanü yingyale. ABÜDONGBAnü choko.

⁴⁴Sünü adrüba la tsünü tsinang mütrüm la longyohnung, ko mütrüm la tsünü sünü tsinang abi uzathsa la tsü xohnung, tunüo ABÜDONGBAnü Moab changnung akyang khüdu yohpüjücho.

⁴⁵Atsichirü tsünü Yangthsaba Sihon-nü khüdupi yangthsathsaba Heshbon yangdi la tsikehnyücho, ta hütsü mihmüle la licho. Michangnü lurü apüm ko khata mürurü Moab azong tsü trüp-pehcho.

⁴⁶Moabrü müi o! Khemosh mübürü tsü changko, ko arüh tsuzarüti arangyoh lang notsiko.

⁴⁷Ta aronung la ABÜDONGBAnü thali Moab pungrohirosohnung. Hiri apüm tsü ABÜDONGBAnü Moab chah tikehnung yocho lile.