Read Sangtam Naga JEREMIA 49 Bible Online

JEREMIA 49 - Sangtam Naga bible

JEREMIA 49

¹ABÜDONGBAnü Amon nengdang hita yore: “Israelrü adhrerüti khülo? Arüh lih tsungtinung süsü mülirü do? Tuepü Molek mübürü khyang Gad hung lih khyo hütsüla lisohcho?

²Ta Raba yangdi la lirünü chita yuva yuchinung bekhyah khüdu tsehle, ko hütsü changpehjünung ko yangdongti alih chah rongkeh trüpnung. Hütsüpü Israelrünü arüh kheh lanü thali arüh lih tsü khyünung.

³Heshbonrü, züdeing! Ai thsangnyangko! Rabalarüti, meshüng! Müyahshü müpieng ko meshüng. Tsohkhuta tsieng. Nührü tsingrang Molek tsü abi bebürü ko yangthsarüti yola yangtsilang nowünung.

⁴Tuepü nührü yuje müchorütinü tüzümükhümro? Nührü suhmüzeh tsile. Tuepü nührü tase chah dümpipü sünüsü nührü mümahchehnungepü choro?

⁵Ihnü apümlangnü nührü khyang adrüba hirojünung. Nührü apüm dro tsinung. Nyitsarü müipi palu akang khümchonung rang tsinung ko nührü rothsarü thali nübülungnung süsü mülinung.

⁶“Ta akhanglang, Ihnü thali Amon müwajünung. Ih, ABÜDONGBAnü choko.”

⁷ABÜDONGBAnü Edom nengdang hita yore: “Edomrü chah anyicheh changpehcho do? Adelü arüh thülarünü tu nguchinungnang müyorü do? Arüh lümlong apüm changko ang?

⁸Dedanrü, ximülang ko shang! Rang! Ihnü Esau trah changjünung, tunüo arüh khingchinung becho chihko.

⁹Nyitsarünü shükusih laade, arühnü khürünülü ashü chah vipüre, ko aromang aführü rode, arühnü khyünyücho du khyüre.

¹⁰Ta Ihnü Esau trah khüdupinü khohpehjüko, ko arühnü mürangchehnungthsa Ihnü arüh arang chah mishajüko. Edomrü apüm changko. Süsü münying.

¹¹Mürürüti I khyang pehjüng, ko Ihnü arüh xükümnung. Nührü chomirütinü I chah ngakehng.”

¹²“Khingchinung mülengrü mii akhingchi shing la tsünü yongkhang, nührü mükhingchipü pehjünungepü lümrü do? Mah, nührünü shing la tsünü yong!

¹³“Bozra yangdi tsü adrünung khüdu kangko; ko hütsü lihpi kangsohnung I punü yuchümko; nyitsarünü hütsü münyodhengnung ko abi neng chokehchola kang bichinung. Mükangmüshü liba yangdongti apüm lede nengdang changpehnung. Ih, ABÜDONGBAnü choko.”

¹⁴Ihnü yocho, “Edom, ABÜDONGBA chahnü yusi khüdu roko. Abinü yuchoti te arüh rothsarüti shimükhongpü nüh mahnung yusi jüko.

¹⁵ABÜDONGBAnü nü re müzehsohnung ko sünüsü nüh müdrünung.

¹⁶Nü müthsehnü nüh kihyochüko. Nühnü lümcho roh-i arüh sünüsü nüh müdrü. Nüh azong akhang chah lungrah la lire; ta müdi kyo athseng la linye, ABÜDONGBAnü nüh tphahchonung. ABÜDONGBAnü choko.”

¹⁷ABÜDONGBAnü yocho, “Edom chah tikehnung achangba tsü diranung ko alahkhurü apüm nehnung ko drümüyangnung.

¹⁸Sodom ko Gomora ko hütsü mükangmüshü yangditi changde tikehcho kyo Edom chah tikehnung. Hütsüla süsü thali mülinung. Ih, ABÜDONGBAnü choko.

¹⁹Jordan lanü zanulih ayung ko mürong lanü kihkangdi kyo, Ih ronung ko Edomrü arüh lih lanü dhrongyengnü rang tsinung. Hütsüde Ihnü throchehba langnürü tsünü yanglih la tsü yangthsanung. Sü I te kihtachehnung? Sünü I te khyangchichehnung? Tu yangthsarünü Ih nyümchehnung?

²⁰Hütsüeko, Ihnü Edom nyüm külüpba lümchung ko Teman yangdirü chah nguchinyüba lümchung hiri nyieng. Arüh tsuzarüsü tphahchehnung ko nyitsarü apüm nehsohnung.

²¹Edom khülude, alih apüm shühchi yuva chüronung ko traba yuva tsü Amoh Kihdi chiinü yuchinung.

²²Müdi aqo lohpü thsücho jürocho kyo arorühnü ro Bozra mahnung. Hütsü nyümong Edom rothsarü tsü khingkurü mikhungde nehcho kyo linung.”

²³ABÜDONGBAnü Damaskas nengdang hita yore: “Hamath ko Arpad la lirütinü lümxo müsi mütrungcho, tunüo arühnü yusi amütsa yuchicho. Arüh chah lümtpahnah tsü kihdi kyo loh rocho, ko hütsünü mükyahshangchehcho.

²⁴Damaskasrü re müzehcho ko dro tsicho. Khingkurü mikhungde kyo arüh tohthsa licho.

²⁵Künyangta liba anengkhong yangdi tsü naying pehcho.

²⁶Hütsü nyümong abükyü dhrezarüti tsü yanglong la kyüsehnung, ko rothsarüti apüm changnung.

²⁷Ihnü Damaskas tbü la michang thsürangnung ko Yangthsaba Benhadad kuh trüp-pehnung. Ih, ABÜDONGBAnü choko.”

²⁸ABÜDONGBAnü Kedar hung ko Babylon Yangthsaba Nebukadnezarnü kohchehba Hazornü yangthsathsaba district-ti nengdang hita yore: “Kedar tsü mahng ko hütsüba nyüchüro lahpi lirüti changsohng!

²⁹Arüh shükuh ko santi, arüh shü kitising ko arüh shükuh la licho lüpcho khyüng. Arüh ut khyüjüng ko müyurü te young, ‘Nührü mükangmüla dhsürü lile!’

³⁰“Hazor-rü, nührü dro tsieng ko rangpüm pü Ih, ABÜDONGBAnü yore. Babylon Yangthsaba Nebukadnezarnü nührü nyüm arah külüpcho ko abinü hita yore,

³¹‘Rung! Khümcho lilepü lümrüti Ihsanü mahnung! Arüh yangdi tbükhüm mahkhang azihtiji müle ko tu atsungtiba müle.’

³²“Arüh ut ko kanglungrü khyüng. Kuva akhikyükyah müjüprüti Ihnü apümlang shupishuza pehjünung, ko apümlangnü Ihnü arüh chah asüba hirojünung.

³³Hazor tsü lede nengdang shirung liji lipilih kangsohnung. Hütsüla sünüsü thali mülinung. Ih, ABÜDONGBAnü choko.”

³⁴Juda la Zedekia Yangthsaba kangyeng, Akohba ABÜDONGBAnü Elam nengdang I te chotacho.

³⁵Abinü yocho, “Elam hitoh-i rezehsohba singthsalu birü tsü Ihnü atümung kyüsehnung.

³⁶Apümlangnü Ihnü Elam chah nyübong khyang füsohnung, ko tsichirümchirü mütsiyohcho limih khüdu mii müli arüh shupishuzasohnung.

³⁷Ihnü Elamrü khyang arüh rorüh drüsohnung. I zichüro Elamrü changsohnung ko arüh müchangsohkhangde arüh nyüm rothsarü müthehnung.

³⁸Ihnü arüh Yangthsarü ko langnürü changjünung, ko hütsüla I Yangthsaba pümji müdongnung.

³⁹Ta akhanglang Ihnü Elamrü thali müwajünung. Ih, ABÜDONGBAnü choko.”