Read Sangtam Naga JEREMIA 5 Bible Online

JEREMIA 5 - Sangtam Naga bible

JEREMIA 5

¹Jerusalemrü, nührü yanglong tung shang! Dhengmükang! Dhengkyaang. Shihthsa chah yangching! Athsalang nguchirü ko yuje chorü khüdu dusü nühnü ngunung do? Nührünü ngukhang, ABÜDONGBAnü Jerusalem khyang mülangpehjünung.

²Nührünü ABÜDONGBA mübüre nye, nührünü chocho kyo münguchire.

³Yutsatsa ABÜDONGBAnü yuje chorü yangchire. Abinü nührü lahcho, ta nührünü müdhsa; abinü nührü nyehcho, ta nührünü münyichonyücho. Nührü hongzicho ko müximülacho.

⁴Hütsüde Ihnü lümcho, “Hiri hi ailümrü ko amümüdherü du lile. Arühnü amüsithsa nguchire; arüh Tsingrangnü tu thsütahro, arüh khyang tu nguchisohnyüro hütsü arühnü mümüdhe.

⁵Ihnü müyurü yang zii la wünung ko arüh te chotanung. Yutsatsa arüh Tsingrangnü tu thsütahro, ko arüh khyang tu nguchisohnyüro hütsü arühnü mümüdhe.” Ta arüh apümnü ABÜDONGBA tase mükhyücho ko Abi yu münyi.

⁶Hütsü khu mürong lanü kihkhünyingnü arüh mükahsehnung; lipilih lanü rangfünü arüh rehzangzangnung ko yanglong la müroh khünyingnü arüh nyihnung. Sü dongkhu chüdunang, abi anyüh kang rehnahnung, tunüo arüh münyi mükhilong ko shikhe müipi arühnü Tsingrangba tenü ximüla tsiko.

⁷ABÜDONGBAnü yocho, “Tuepü Ihnü müyurü mülangpehjünung? Arühnü Ih thrüchahchüpehpü aparü arahkheh tsingrangti mübücho. Ihnü müyurü arüh mi jeng kangcho, ta arühnü nahtrahnaxengcho ko mabomashilarü te arüh bekhyah pehcho.

⁸Arüh atüpchehcho amüsah kuri kyo, apümnü arüh kurümrü nitpürü mükhyahcho.

⁹Hiri nengdang Ihnü arüh mükhingchipü ko hitari yucho te rüh müyangnung ang?

¹⁰I müyurü shükusih thrümsohnung Ihnü arorüh müthehnung, ta ririlü müchangsohnung, Ajengzati lepehsohnung Ihnü yonung, tunüo hütsüri ajengzati I yo mah.

¹¹Israelrü ko Judarünü Ih dee mütsa kihyochüko. Ih, ABÜDONGBAnü choko.”

¹²ABÜDONGBA müyurünü Abi mükhyücho yocho, “Abinü tu münguchichehnung. Ihsa müchongchanung; Ihsa khata mahkhang yangkong mümütohnung.”

¹³Arühnü azikehrüti hi tu mah, adengepü ko ABÜDONGBA chahnü arüh tu yusi mülepü yore.

¹⁴ABÜDONGBA Akohba Tsingrangnü I te yocho, “Jeremia, hiri nyitsarünü hiroh-i chocho ngang, Ihnü nü be la I yu tsü michang kyo kangsohnung. Müyurü tsü sing kangsohnung ko michangnü arüh trüp-pehnung.”

¹⁵Israelrü, ABÜDONGBAnü nührü mahsohnung ashu lanü yucho khüdu norole. Hütsü yucho ahi ko re azeh lile, nührünü arüh yu mümüdheba yucho khüdu lile.

¹⁶Arüh rothsarü tsü achomang müli kyüsehrüti lile.

¹⁷Arühnü nührü tsahma ko fürü tsukhangjünung; arühnü nührü tsurü ko tsularüti mapsehnung. Arühnü nührü kanglungrü mapsehjünung ko nührü shükusih ko ngurüsih changjünung. Nührünü longlangba atbüticho yangdi tsü arüh rothsarütinü thsangnyangjünung.

¹⁸ABÜDONGBAnü yore, “Ta hütsüri nyümong la mii Ihnü I müyurü ririlü müchangjünung.

¹⁹Tuepü Ihnü hütsü roh-i nguchicho ko arühnü tsingdhengkhang, arühnü arüh lih la I tenü za wü yangpirü tsingrangti dikehcho kyo, bürü lih la arühnü shirü dikehsohnungepü arüh te young, Jeremia.”

²⁰ABÜDONGBAnü yore, “Jakob trah te young, Judarü te young:

²¹Nyieng, nührü amüsithsa ko adohrüti, nah keh nye münguba, nangku keh nye müyuchibarüti.

²²Ih ABÜDONGBA; tuepü Ih müdrüro? Tuepü I jingte müdhridhriro? Kihdi khu mütingcheh tsinung luhrü thsanung Ihnü lihpi yohpüjücho. Kihloh khong ronye hütsü khu mütsichehnung.

²³Ta nührü! Nührü ahongzi ko anyümrü; nührünü I tenü ximüla Ih pehtsicho.

²⁴Ihnü maxamaki tsing ko chisi kyang tsing rosoh kang müthe tsa yangyosoh nye, nührünü khodesü Ih dhichinung mülümcheh.

²⁵Hütsü mülih, nührü münyinü nührü tenü hiri atsati yatire.

²⁶“I müyurü yola amütsarü zehle; arühnü arahkheh cho uza thsacho kyo, zeng thsapüpü yingre, ta arüh zeng tsü arühbürü xohnung du thsare.

²⁷Uzanü püp jengcho kyo, arohchocho kohronü arüh kuh jengre. Hütsü khu arüh tase zeh ko alirü thsare,

²⁸ko arüh tsunyire. Arüh amütsa nguchi tu akihzah müle. Arühnü mürürü khyang arüh athsalang müjüre mahkhang suromüchürü athsalang mükhümre.

²⁹“Ta Ih, ABÜDONGBAnü hiri nengdang arüh khingchinung; hiba yucho michah Ihnü rühyangnung.

³⁰Hiba lih la adrünung ko anehnung nguchi tikehko:

³¹azikehrütinü arahkheh du chore; bebürütinü azikehrünü mülacho du nguchire ko müyurünü tu athsongliba müjüre. Ta hiri apüm achangka khüdu chii rode arühnü tu nguchinung?”