Read Sangtam Naga JEREMIA 51 Bible Online

JEREMIA 51 - Sangtam Naga bible

JEREMIA 51

¹ABÜDONGBAnü yore, “Ihnü Babylon ko abi nyitsarü michah achangba nyübong khüdu hirore.

²Nyübongnü mayü fopehcho kyo Babylon changsohnung Ihnü shuparü müthehnung. Hütsüba achangba nyümong rode, arühnü apümlangnü benung ko alih tsü adeng pehjünung.

³Arüh rothsarüti khyang arüh tbüdeng kyanung mahkhang thsunohrü khyünung bekhyah tüjü. Dhrezarüti tünyingjü! Rothsarü apüm changjüng!

⁴Arüh thsakehnung ko arüh yangditi yanglong la sünung.

⁵Israel ko Judanü Ih Israel la Amüsaba nyüm amünyi shitpah nye Ih Akohba ABÜDONGBAnü arüh müpehjü.

⁶Babylon lanü tsieng! Nührü akang khümcho tsieng! Babylon münyi ngang nührü tüsü, ade Ihnü rühyangre ko abi aleng khingchire.

⁷Babylon tsü lihküp müchasohba I khehla hon shing kyo licho. Yuchotinü abi yongkha yongre ko arüh lümchahre.

⁸Dhrongyengnü Babylon khüluko ko changko! Hütsü meshüng! Abi mathsa nengdang moi yangchijüng, kümüdeo hütsü kyangnung kohle.

⁹Hütsüla lirü shuparünü yocho, ‘Ihrünü Babylon tronung müküpko, ta münurako. Ihsanü ade abükyü pehjünung ko kuh lang thalinung. Tsingrangbanü Abi tase apümnü Babylon khingchiko ko hütsü riri changsohko.’ ”

¹⁰ABÜDONGBAnü yore, “I müyurünü züdere, ‘Ihrü athsalangepü ABÜDONGBAnü ngusohko. Ihsanü wünung ko Jerusalem la müyurü te ABÜDONGBA Ihsa Tsingrangnü tu nguchicho hütsü yonung.’ ”

¹¹ABÜDONGBAnü Media yangthsarüti thsümüsucho, tunüo Abinü Babylon changjünung lümcho. Hütsüta Abinü Abi Amübükuh thsangnyangcho rühyangnung. Amahrü anüchibanü yuzeng jücho, “Nührü tbüdeng thsühchehng! Nührü tsung rungnüm!

¹²Babylon tbü benung amüdhethsa ngung. Anyahrü rezehsohng! Anyahrü yasohng! Thsehnung nyitsarü pümsohng!” ABÜDONGBAnü Babylon chah nguchinung liba tsü nguchiko.

¹³Hütsüba yanglih tsü yongkhi adrong lile ko kuthsi la alirü, ta abi bekhyah khuko, ko abi akang suyo khasahpehko.

¹⁴Akohba ABÜDONGBAnü Babylon mahnung khengquti kyo nyitsarü khütang noronung ko arühnü akoh ngu züdenung.

¹⁵ABÜDONGBAnü Abi ziinü alimih külüpcho; Abi lümlongnü lihküp thricho ko ning tsü lehchehcho.

¹⁶Abi yuzeng la ning mihlang kihnü rengre; Abinü alih changka lanü nyükhi hirore. Abinü tsing la ningmüla mülasohre ko akuh lanü nyübong müthehre.

¹⁷Hi ngude, nyitsarü lümlong chah dohpehre; kyothri külüprü arüh ashah, tunüo arühnü külüpba tsingrangti arahkheh ko akang müle.

¹⁸Arüh amii müle tükhichi; ABÜDONGBA arüh shirünung rode arüh changnung.

¹⁹Jakob Tsingrang arüh mükyo; lüpcho külüpba tsü Abi, Abinü Israel tsü Apu yo thsanung throchehcho. Akohba ABÜDONGBA tsü Abi neng.

²⁰ABÜDONGBAnü yore, “Babylon, nüh amapsing, I khata thsunohrü. Ihnü yanglih ko yucho changsohnung nüh bichicho,

²¹kuri ko hütsü chah pümrü, Kuri kari ko anürü changjünung,

²²khingkurü ko adhrerü azarü ko azirü kyüsehnung, ko dhreza lazarü kyüsehnung;

²³san nyahrü ko abi san tii kuri ko alih xürü yangthsarü ko thsazirü kyüsehnung.”

²⁴ABÜDONGBAnü yore, “Jerusalem chah amütsa nguchicho ngang Babylon ko abi nyitsarü chah Ihnü nguchicho nührünü ngunung.

²⁵Babylon, nüh limih apüm changjüba azong khüdu kyo lile, ta Ih, ABÜDONGBA, nü rorüh lile. Ihnü nüh rangnung, alih la khülusohnung ko lihwü kangsohnung.

²⁶Trümnah liba lanü lung khüdusü kuh thsanung la thali mükhyünung. Lede nengdang nührü lipilih kangnung. Ih, ABÜDONGBAnü choko.

²⁷“Mahnung amüdhethsa jüng! Yuchotinü yuchinungthsa rühti tsü mehng! Babylon mahnung yuchoti rungnüm! Ararat, Minni ko Askenaz yanglihti te mahnung young. Mahnung nengdang langkhurü khüdu throung. Kuri tsü khengqu tii kyo norung.

²⁸Babylon mahnung yuchoti rungnüm. Media yangthsarüti, langnürüti ko adirüti ko arüh pohki liba rothsarüti dsinung müthehng.

²⁹Alihnü dhridhrire ko nyangnyangre, tunüo ABÜDONGBAnü Babylon tsü süsü mülinungthsa lipilih kangsohnung ko Abi lümchung nguchinung dikehre.

³⁰Babylonrü rothsarütinü khata nyehlipü roshengvi la pümre. Arüh suhzahpehko ko khingkurü kyo kangko. Yangdi tbükhümti thsangnyangkhangko, ko kuh tahyale.

³¹Babylon Yangthsaba te abi yangdi apümlangnü thsangnyangcho yonung yuhirü mütozah shangle.

³²Yongkhi kehji tsü arorühnü khyüko ko roshengviti chah michang thsürangjüko. Babylon rothsarüti drüpehko.

³³Tunyah mülipü arorühnü arüh kyüthrümnung ko pungkhyang la fürü kyo dhrümchinung. Ih, ABÜDONGBA, Israel Tsingrangnü choko.”

³⁴Babylon Yangthsabanü Jerusalem retsuko ko tsupehko. Abinü füh kyo yangdi tsü dengchehjüko; kangdi kyo abinü kapü dengchehjüko. Abinü khyünyücho khyüpü anyingcho tsü pehko.

³⁵Zionrünü young, “Arüh chah shühkhatohba tsü Babylon bha thsasohng!” Jerusalemrünü young, “Ihrü chongchaba tsü Babylon bha thsasohng!”

³⁶Hütsüta ABÜDONGBAnü Jerusalemrü te yocho, “Ihnü nührü khiyu dhengjünung ko nührü chah nguchicho ngang nührü rorüh khyang jüsohnung. Ihnü Babylonrü kihna kungsohnung ko arüh yongkhi tsü kungchehsohnung.

³⁷Hütsüba yanglih tsü kanglungrü lamungji sehnyeh bhüm kangsohnung. Hütsü adrünung khüdu kangnung; hütsüla süsü mülinung, ko hütsü ngurü apüm drümüyangnung.

³⁸Babylonrü apüm kihkhünying kyo rengre ko kih khünyingza kyo rengnung.

³⁹Arüh müxümüngurü mah-o? Ihnü arüh khyang thsüti khüdu külüpjünung ko arüh müchaseh künyangsohnung. Arühnü yüpnung ko khodesü müjesunung.

⁴⁰Ihnü arüh sanza, miza ko sanpung kyo kyüsehnung nowünung. Ih, ABÜDONGBAnü choko.”

⁴¹ABÜDONGBAnü Babylon nengdang hita yore, “Lihküprünü seba yangdi tsü kohchehko! Yuchoti bete Babylon adrünung kangko!

⁴²Kihlohnü reng Babylon chah mülümphako.

⁴³Yangditi adrünung kangko ko kih müliba lihpi, süsü müli mahkhang müshitsehba lih kangko.

⁴⁴Ihnü Babylon tsingrang Bel khingchinung, ko abi afühcho kohro tsü pehsohnung; ko yuchotinü adelü abi mümübünung. “Babylon tbü khüluko.

⁴⁵Israelrü, hütsü lanü tsieng! I rihlong lanü nührü akang tsicheh tsieng.

⁴⁶Nührünü yuchiba tsupohyupoh khunü suh tüzah mahkhang dro tüli. Kang mükhu tsupohyupoh papa chürore, yangdi la shühkhatoh ko kyüsehtaba nengdang.

⁴⁷Hütsüta Ihnü Babylonrü kyothri te dhsükehnung bekhyah tsehle. Yuchoshünü ashah khyüsohnung ko abi nyitsarüti kyüsehnung.

⁴⁸Kihku langnü abi changjünung rorüh khehla Babylon khülude, alih la ko ninglang liba lüpchonü akünyangnü züdenung.

⁴⁹Lihküp la Babylon-nü nyitsarü süsohcho, ko ade abinü Israel hütsüdoi süsohcho ngang Babylon khülunung. Ih, ABÜDONGBAnü choko.”

⁵⁰ABÜDONGBAnü Babylon la Abi müyurü te yore: “Nührü asü lanü tsiphuko! Ade tsieng! Tümünu! Nührü ashu la linye, nührü ABÜDONGBA, I nengdang lüm, ko Jerusalem lümkehng.

⁵¹Nührünü yore, ‘Ihrü wahseh liko ko ihrü ashah khyüko; ihrü tu khüta müthsa kangpehko, tunüo Amübükuh la Amüsa müdümti tsü shuparünü khyopehko.’

⁵²Hütsünü, Babylonrü kyothri te chotanung bekhyah tsehle, ko thsakeh lirütinü yanglih apümlang rühchinung.

⁵³Babylon-nü ninglang küdu hütsüla roshengvi thsa nye, hütsü thsangnyangnung Ihnü nyitsarü müthehnung. Ih, ABÜDONGBAnü choko.”

⁵⁴ABÜDONGBAnü yore, “Babylon la traba yuva tsü nyieng, yanglih la changcho meshü yuva.

⁵⁵Ihnü Babylon thsangnyangre ko naying pehjüre. Kihloh kyo rothsarüti shi rore ko khong mahre.

⁵⁶Arüh Babylon changsohnung rocho; arüh rothsarüti mahchehko, ko arüh singthsalu thsangnyangko. Motsing khingchiba Tsingrang Ih, Babylon abi aleng khingchinung.

⁵⁷Ihnü arüh yangthsarüti, lümlong lirüti, langnürüti ko rothsarüti müchasohnung. Arühnü yüpnung ko khode müjesuhnung. Ih, Yangthsabanü choko. Ih, Akohba ABÜDONGBA.

⁵⁸Akurahrü Babylon tbü alih la khülunung, ko arüh tbükhüm trüp-pehnung. Yuchoti nguchi apüm adeng; arüh müküpcho mihmülenü müyahko. Ih, Akohba ABÜDONGBAnü choko.”

⁵⁹Yangthsaba Zedekia jingte athrahba tsü Maseia shümtsurü ko Neria tsurü Seraia licho. Juda la Zedekia yangthsacho kang müyüu la, Seraia tsü abi yola Babylon lang wücho, ko Ihnü abi khyang athülaba khürü jücho.

⁶⁰Ihnü Babylon chah ronung liba achangba apüm ko Babylon nengdang, ko apasü apüm vakha khüdu la thrahsohcho.

⁶¹Ihnü Seraia te yocho, “Nüh Babylon chihde, hila thrah liba hi müyurüte tasenü khi young.

⁶²Hütsüpü dangkhidangnang, ‘ABÜDONGBA, hiba lih la nyitsarü nye kanglungrü nye tu mülinung, ko lede nengdang hi lihpi kangnung Nühnü changjünung.’

⁶³Seraia, khode nühnü müyurü te hiba vakha hi khikhangnang, hi lung chah rahkehng ko Eufrates Yongkhi la tsayohchüng,

⁶⁴ko young, ‘Babylon chah hita tikehnung, hütsü mülingyoh züdunung, ko khodesü müsuronung, tunüo hütsü chah ABÜDONGBAnü achangba hironung.’ ” Jeremia yu hila changkare.