Read Sangtam Naga JEREMIA 52 Bible Online

JEREMIA 52 - Sangtam Naga bible

JEREMIA 52

¹Zedekia Juda Yangthsaba kangde abi kang mükyüpü khüdu thsacho, ko abinü Jerusalem la kang dhüre-kheh yangthsacho. Atpa tsü Libna yangdi la liba Jeremia tsurü Hamutal licho.

²Yangthsaba Jehoiakimnü nguchicho kyo, Yangthsaba Zedekianü ABÜDONGBA nyüm amünyi shitpahcho.

³ABÜDONGBAnü Jerusalemrü ko Judarü te rihlong chürorü Abi nah tenü arüh khingchicho.

⁴Zedekianü Babylon Yangthsaba Nebukadnezar nyüm yacho, hütsünü Zedekia yangthsacho kang düku, choo dhüre la adhüre nyümong Nebukadnezarnü ro Jerusalem mahcho. Arühnü yangdi mihlang müdongcho, ko hütsü mükang yangtbü tbücho,

⁵ko Zedekia yangthsacho kang dhüre-kheh müjungde hütsü mükangti licho.

⁶Hütsüba kang choo müyü la adüku-u nyümong, yangkong tsü dirachonü atsunung tu nying mülide,

⁷yangdi tbü tsü thsangnyang zürocho. Babylonrünü yangdi tbü tsü mükangtipü linye, rothsarü apüm ama lanü rang tsipehcho. Arühnü Yangthsaba tbü lanü, tbü anyüh müchikehta tbükhüm khu Jordan Ngah langthring rang tsicho.

⁸Ta Babylon rothsarünü Yangthsaba Zedekia iiwücho, ko Jeriko shündhün angah la tsünü abi rangcho, ko abi rothsarü apümnü abi peh tsicho.

⁹Zedekia tsü Hamath lih la Ribla yangdi la liyaba Yangthsaba Nebukadnezar yang nowücho, ko hütsüla abi yu khacho.

¹⁰Ribla la Zedekia apunü ngu abi tsurüti süsohcho ko Judarü adirütisü kyüsehcho.

¹¹Hütsüpü, abinü Zedekia nah hehchehpehjücho ko ixilihnü xohpü Babylon lang nowücho. Zedekia tsü Babylon akhangti kuhla abi müsü tashi yohpücho.

¹²Babylon Yangthsaba Nebukadnezar yangthsacho kang dhüre düku, choo münga ko nyümong adhüreu la, Yangthsaba dhrüze ko rothsarü anüchiba Nebuzaradan Jerusalem la zürocho.

¹³Abinü Amübükuh, Yangthsaba ko Jerusalem la langnürüti kuh apüm trüp-pehjücho;

¹⁴ko abi rothsarütinü tbü tphüjücho.

¹⁵Hütsüpü yangdi la anyingcho nyitsarü, sihthsa nguchirü ko Babylon lang tsiwürü apüm Nebuzaradan-nü Babylon lang notsicho.

¹⁶Ta abinü Juda la ailümrüti khürü pehjücho, ko abinü arüh shükusih yo ko luh la nguchisohcho.

¹⁷Babylonrünü Amübükuh la imüyeng dongditi ko hütsüla liba misü kari ko imüyeng kihbong kengnahjücho, ko imüyeng apüm Babylon lang hitsicho.

¹⁸Arühnü bholu müsaba la bichiba michüthsohlung ko tavi yohsing, dsi michüh lahsing, ashüh yohsing mütpah-tbhü, müchiji tahsing tbhü ko amübü la bichiba imüyeng kohro lüpcho hitsicho.

¹⁹Hon ko taripinü külüpcho lüpcho arühnü hitsicho: mütpah tbhüza, michüh bichising tbhü, ashüh yohsing mütpah-tbhü, tavi yohsing, dsimüdongsing, müchiji bichiba ko yongkha mübü tungkehsing tbhü.

²⁰Yangthsaba Solomon-nü Amübükuh nengdang külüpcho imüyeng kohro-dongdi anyüh, misü kari, kihbong arangcheh ko hütsü thüyehba misüpung dhüre-anyüh tsü ho-dhengnung mülingracho.

²¹Dongdi anyüh tsü kyotacho: khüdu athsenglang khehap dhüre-keh, ko arümlang khehap dhüre-anyüh. Dongdi tsü akoh thsacho, ko idhse tsü achehlang kuthrung asang thsacho. Dongdi anyüding müle chah tsü athsenglang imüyeng yahthri khehap münga licho, ko abemong mükang tsü imüyengnü tsanümsih yah yoh tangthri külüpcho.

²³Dongdi anyüding abemong chah tsü tsanümsih thsih khüdu kehcho ko hütsüla kuhrepü dükuhlü alih lanü ngunung kohcho.

²⁴Hütsüri chah lahkeh anüchiba Nebuzaradan-nü Amungthriba Bebüba Seraia, chitungba Zefania ko amübükuh la ayingthsarü nyüh asang rang notsicho.

²⁵Yangdi lanü rothsarü anüchiba, Yangthsaba apu dhrüze thsarü arüh dhünyeh, rothsarü lahpi athrahba anüchiba chitungba, ko aparü aying nyüh rohre rang notsicho.

²⁶Nebuzaradan-nü arüh tsü Babylon Yangthsaba, sü Hamath lih Ribla la licho,

²⁷abi yang nowücho. Hütsüla Yangthsabanü arüh dhsümthse süsohcho. Hütsüta Judarü yangtsilang kümtsicho.

²⁸Nebukadnezarnü arangyoh lang nowürü nengdang tsü hiroh-i: abi yangthsacho kang dhünyeh la abinü nyüh hajar asang mükyüpü asang;

²⁹kang dhüre-keh-u la, Jerusalem lanü thsih keh sangrepü anyüh;

³⁰ko kang mükyüpü asang la Nebuzaradan-nü thsih dhünyeh yürepü münga. Atümungnü nyüh hajar müyüpü thsih dhüroh notsicho.

³¹Babylon la Evilmerodak Yangthsaba kangba kang la tsü, abinü Juda Yangthsaba Jehoiakhin müinü abi arangyoh lanü müthehcho. Hi Jehoiakhin küm tsipü kang sangrepü dhünyeh, choo dhüre-anyüh ko nyümong mükyüpü müngau la tikehcho.

³²Evilmerodaknü abi müi bichicho ko Babylon la abi te yangtsi la lirü Yangthsarü apüm tenü abi alaa dhichicho.

³³Hütsüta Jehoiakhin tsü arangyohrü jengki mülihpü abi akang ayung Yangthsaba tsingthsang chah tsuyongnung mülacho.

³⁴Abi akang li ayung, nyümong mükhu abi thsütah nengdang arüku jücho.