Read Sangtam Naga JEREMIA 6 Bible Online

JEREMIA 6 - Sangtam Naga bible

JEREMIA 6

¹Benjaminrü, tsichehnung shang! Jerusalem lanü tsicheh tsieng! Tekoa la rühti tsü mehng ko Beth Hakerem la amüdhethsa mikhu phung. Kihku lahpinü asüba ko achangba ronung thsale.

²Zion yangdi tsü atsah atsa, ta hütsü changnung;

³hütsüla yangthsarütinü arüh rothsarü nüpü müdongnung. Arühnü yangdi mükang shükuh thsanung ko arüh müipi arüh linyücho la linung.

⁴Arühnü yonung, “Jerusalem mahnung küdang! Rungnüm! Ihsanü nyüthung la mahnung!” Ta hütsüde arühnü yonung, “Münurako, manung thsale ko nyüzeh nyüjing tehchahchüle.

⁵Ihsanü aromang mahnung; Ihsanü yangdi roshengvi thsangnyangjünung.”

⁶Akohba ABÜDONGBAnü yangthsarü hiri te singdongti renü Jerusalem mahnung alih müjung sühnung yocho. Abinü yocho, “Ihnü hiba yangdi hi khingchinung tunüo hi sehchi bichibanü jeng lile.

⁷Kihkongnü kih müthsengchehcho kyo, Jerusalem amünyinü müthsengchehre. Ihnü yangdi la tsü shühkhatoh ko athsangnyang du yuchire; füthsa ko aiha du Ihnü ngure.

⁸Jerusalemrü, nührü nengdang achongcha hiri amüdhethsa khüdu kangsohng, Ihnü nührü thrüchahchüpehnung; Ihnü nührü yangdi tsü süsü mülichehba lipilih kangsohnung.”

⁹Akohba ABÜDONGBAnü I te yocho, “Shükusih dong chah asih riri laa-khangcho kyo, Israel tbhüdeng kangsohnung. Hütsüeko bekhyah lidenü nührü kohcho khümchoung.”

¹⁰Ihnü lalingcho, “Ihnü arüh te müzahsoh chokhang sünü I yocho nyinung? Arühnü hongzi Nü yu mii münyire; Nühnü I khyang yosohba la tsü arühnü münyodhengre.

¹¹Arüh nyüm Nü rihlong tsü I chah mii trüpre, ABÜDONGBA, ko adelü Ihnü mürangchore.” Hütsüde ABÜDONGBAnü I te yocho, “I rihlong tsü yanglong la azarü chah ko kunu shibülungcho la thohkehjünung. Anii ko anitpüti notsinung ko ashirü mii müpehjünung.

¹²Arüh kuh tsü bürü khyang jünung, ko hütsüta arüh luh ko arüh nitpürüti bürü khyang jünung.

¹³Azikyahrü ko amülahrü atümungnü yuje mücho thsi külüpnyüre; azikehrü ko bebürünü mii müyurü kihyochüre.

¹⁴Arühnü I müyurü mathsa atangnung kyangjüre. Yangtsa mülipü arühnü, ‘yangtsa, yangtsa’ pü chore.

¹⁵Hiri rahmütsa nguchi nengdang arühnü shahrü mah-o? Mah, arühnü seh müshah; arühnü ashah tsü tunang mümüdhe. Hütsü khu, aparü kyo arühsü khülunung; khode Ihnü arüh khingchinang, arüh nengdang hütsü achangka thsanung. Ih, ABÜDONGBAnü choko.”

¹⁶ABÜDONGBAnü amüyurü te yocho, “Langtpah la tsü yaang ko dheng. Jümü langrüh atsauba tsü khüde lirünang tsingdheng. Hütsüla tsehng, ko nüh yangtsa la linung.” Ta arühnü yocho, “Imoh, ihrünü mütsehnung!”

¹⁷Hütsüde ABÜDONGBAnü rose rühti nyisohnung roshengrü throchehcho. Ta arühnü yocho, “Ihrünü münyinung.”

¹⁸Achotsü ABÜDONGBAnü yocho, “Nyidheng, yuchoti ko I müyurüti chah tu tikehnungnang nyichoung.

¹⁹Nyieng, alih! Arühnü külüpcho lümchung apüm khingchinung hiri müyurü chah Ihnü athsangnyang hirore, tunüo Ihnü docho arühnü mükhyücho ko I yu münyi.

²⁰Sheba lanü I khyang müchiji hiroba, mahkhang ashu lanü I khyang axümlichi hiroba nengdang Ihnü mükhichire. Ihnü arüh amübü mükhyüchonung mahkhang arüh kangmübü la mükünyangre.

²¹Hütsünü Ihnü hiri nyitsarü jing müthi ngahsehsohnung. Au ko atsurüti ko arüh shangrüti ko kurümrüti apüm sünung.”

²²ABÜDONGBAnü yore, “Kihku lahpi yanglih khüdu lanü nyitsarüti role; ashu la liba akurah yucho khüdunü mongchiinung küdangle.

²³Arühnü arüh singthsalu ko nohsheng müzuko; arüh akurah ko yanglih mükehrüti. Arüh kuri chah pümpü roba yuva tsü kihdi rengcho kyole. Arühnü Jerusalem nyüm khatanung küdangpü lile.”

²⁴“Yusi tsü ihrünü yuchiko,” pü Jerusalemrünü yore, “ko ihrü kheh hingkehpehko; khingkurü mikhungde kyo ihrü alongri ko adhsanü jengko.

²⁵Ihrünü rangmü lang mahkhang lang la mürachichehre, tunüo ihrü rorünü thsunohrü bipü ihrü mükang lile.”

²⁶ABÜDONGBAnü amüyurü te yore, “Müyahshü müpieng ko asongsong la chichieng. Atsurü amüthsümrü süde tracho kyo nühnü nahshükih sho traang, tunüo nüh changjünung roba tsünü nüh dhrongyengnü mahnung.

²⁷Jeremia, nühnü idhse müchehdhengcho kyo, I müyurü thsatsodheng.

²⁸Arüh apüm hongzi nyümrüti, imüyeng ko idhse kyo azi lile. Arüh apüm amütsarüti, nengchü yu cho rachire.

²⁹Michang tsü dee zi trüpre, ta iichüh tsü müshenah. I müyurü mülucheh wünung tu athsütah müle, tunüo amütsarü tsü mükhyüchehpeh.

³⁰Arüh te akhyüchah müliba iichüh pü dsinung, tunüo Ih, ABÜDONGBAnü arüh mükhyücho.”