Read Sangtam Naga JEREMIA 8 Bible Online

JEREMIA 8 - Sangtam Naga bible

JEREMIA 8

¹“Hütsütade yangthsarüti rüh ko Juda la adirüti rüh, ko bebürüti, ko azikehrüti rüh, ko Jerusalem la lirü aparü rühti arüh kong lanü khyüchehnung.

²Khyübülungpü dhrürangnung mülih, arüh rüh tsü alih la alih su kang jonung. Hütsüri tsü arühnü müiba ko dikehba ko sürü te arühnü müchehdhengnü mübüba nyü, chonu, ko chenghiti bete shuu pehnung.

³Ko hiba amünyi yucho lanü anyingrü tsü, Ihnü arüh shupishuza lisohba müdümti la liyacho, arühnü akang linung tenü asü du sünyünung. Ih, ABÜDONGBAnü choko.”

⁴ABÜDONGBAnü Abi müyurü te hita yonung I te yocho, “Khode nyüh khüdu ngahsehnang abi müsurochehrü do? Nyüh khüdu lang thrümehde, abinü müthalichehrü do?

⁵Khang, I müyurüti, tuepü nührünü müximülachehnungthsa I tenü za tsicho? Nührünü nührü kyothri chah marehpehpü Ih yang müximülanyüre.

⁶Ihnü longi nyiko, ta nührünü yuje mücho. Nührü mütsacho nengdang nührü yola nyüh khüdu du nüsü wah mülüm; nührü khüdunü dusü, ‘Ihnü tu thsamehcho?’ pü mii mütsingdheng. Khatalang kuri tsohnah wücho kyo, apümnü palu wünyücho lang würe.

⁷Kih uzanü mii abi thalinung akyang müdhele; mümüdhrü, jingmülilarü ko kih uza nüsü khode tsimüinung akyang müdhele. Ta, I müyurüti, nührünü Ihnü khüi yuzengnü nührü michah yangthsa thsaro hütsü mümüdhe.

⁸Nührü amüdherü ko nührünü I yuzeng müdhelepü khüta yonung? Dheng, yuzeng tsü yuje müchorü athrahrütinü thsamülako.

⁹Nührü amüdherü ashah khyüsohre; arüh lümdhama xohko. Arühnü I yuzeng mükhyücho; ade arüh tu lümlong liro?

¹⁰Hütsü khu Ihnü arüh luh abüdongrü aparü khyang jünung ko arüh nitpürü aparü adhrerü khyang jünung. Aikyah amülah atümungnü yuje mücho thsi külüpnung müküpre. Azikehrü ko bebürütinü mii müyurü kihyochüre.

¹¹Arühnü I müyurü mathsa atangnung kyangjüre. Yangtsa mülipü arühnü ‘Yangtsa, yangtsa,’ pü chore.

¹²I müyurü hiri athrünyi nguchi nengdang nührü shahrü mah-o? Mah, nührünü seh müshah; ashah tsü tunang nührünü mümüdhe! Hütsünü aparü kyo nührüsü khülunung; Ihnü khode nührü khingchinang, nührü nengdang hütsü achangka thsanung. Ih, ABÜDONGBAnü choko.”

¹³“Nyüh khüdunü maxabülungcho kyo, Ihnü I müyurü nübülungnyücho; ta arüh tsü asih müsihba shükusih, asih müsihba ngurüsih kyo; ava mii mükupü licho. Hütsünü Ihnü aparü khyang alih tsü khyüsohnung mülacho.”

¹⁴Tsingrangba nyitsarünü tsingdhengcho, “Tuepü Ihsa ade yingcheh pümro?” “Rung, Ihsanü lungtbü yangditi lang shang wonung ko hütsüla sonung. ABÜDONGBA Ihsa Tsingrangnü Ihsa süsohnung mülangjüko; Abinü Ihsa khyang müyüh tihko, tunüo Ihsanü Abi nyüm amünyi shitpahcho.

¹⁵Ihsanü yangtsa ko akyangba shikhe longdicho, ta hütsü amükang; adrüba uthring rocho.

¹⁶Ihsa rorüh Dan yangdi la züropehko; Ihsanü arüh kuri nakhi yuchire. Arüh kuritinü khongde alimih apüm dhridhrire. Ihsa rorünü Ihsa lih ko hütsüla liba, Ihsa yangdi ko müyurü apüm changjünung ro lile.”

¹⁷ABÜDONGBAnü yore, “Dheng yaang!” “Ihnü nührü yang müyüh kehba ko amümüshüliba mürü müthehre, ko hütsürinü nührü mükyühnung.”

¹⁸I alongri mükyangnung; I lasih thsangnangre.

¹⁹Nyieng! Apümlang I müyurü züdecho yuchire, “ABÜDONGBA Zion la mülirü do? Zion Yangthsaba hütsüla mülirü do?” ABÜDONGBA, arüh Yangthsabanü lalingre. “Tuepü nührü kyothri mübonü ko akhyüchah müliba yangpirü tsingrangti te mükhukehchonü I zichürosohro?”

²⁰Müyurünü züdecho, “Müyü khuko, maxa thümko, ta Ihsa mükhümchoe.”

²¹I lasih thsakehko tunüo I müyurü thsakehko; Ih longrire; Ih kingkako.

²²Gilead la moi mülirü do? Hütsüla moi xangchehrü mülirü do? Khang tuepü, I müyurü mükyangro?