Read Sangtam Naga MESHÜ 4 Bible Online

MESHÜ 4 - Sangtam Naga bible

MESHÜ 4

¹Ihrü yo ariri honsü amükhyu kangko; Amübükuh lungti tsü yanglong la shupishuza lile.

²Zion dhrezarüti ihrü nengdang hon kyocho, ta arüh ade alihfüh roh-i du khichire.

³Rangfü trühdinü mii azaa müire, ta I nyitsarütilü azaa mümüiba ostrich uza kyole.

⁴Arühnü arüh tsurüti ayang axonü süsohre; azarütinü chingkihchingnangre, sünüsü tu müjüre.

⁵Khüdupi atsauba du tsuyongrüsü yanglong la akongchonü süre; Thangchi nümüsurütisü ade kuwohpeh la thrahtsuthrahyongle.

⁶Sodom la lirüti dhrongyengnü Tsingrangba khehla achangba mütohcho tenü I nyitsarüti alaa khingchiko.

⁷Ihrü yangthsarü tsurüti tsü mümünyi ko shurü tenü amüthsengu; tase azeh ko shulu atsa thsacho.

⁸Ta ade arüh yanglong la sünang mümüdhe, arüh romih asücho kyo anyah; arüh küp sing kyo kungnü arüh chah tahkehko.

⁹Akhanglang atsunung müngupü akongchonü sürü tenü khata la sürüti atsauba thsako.

¹⁰I nyitsarü yang roba achangba tsünü adrünung hirojücho; amüi atpatinü palu tsurü chongtsucho.

¹¹ABÜDONGBAnü Abi rihlong lehchehcho; alih yonglang chii rongnung Abinü Zion la michang tahkehcho.

¹²Jerusalem tbükhüm khu arorüh züronung sünüsü ko limih pa yangthsarütinü mii müyudsicho.

¹³Ta hütsü tikehcho, tunüo azikehrütinü amünyi shitpahcho ko achomükeh nyitsarü süsohba tsü bebürüti mülang licho.

¹⁴Sünüsü arüh chah müthapüchehnungthsa ashüh münohpü, langnürütinü anahtohrü kyo yanglong la tungchi rachicho.

¹⁵“Tsipehng!” pü nyitsarütinü khongcho, “Nüh münyiko! I chah tüthahbü!” Sünüsü arüh münüyohpü limih khüdu lanü khüdu la thrüchi rachicho.

¹⁶ABÜDONGBAnü arüh mükhichi; Apunü arüh shupishuzasohcho. Abinü ihrü langnürüti ko bebürüti mükhichijungcho.

¹⁷Mütikehchehba arüku nengdang ihrünü kyahseh dhengcho. Tusü ajünung müliba yucho chahnü ihrünü arüku yingcho.

¹⁸Arorühnü ihrü jümchonü; yanglong la mii ihrü mürachichehcho. Ihrü nyümong khuko; achangka chihko.

¹⁹Ninglangnü müdi thsücho jürocho tenü atsayaba, arühnü ihrü iichahchücho. Akhang la tsünü arühnü ihrü rü bhucho; arühnü dhrongyengnü lihpi la ihrü rangcho.

²⁰Ihrü rorüh tenü tsungtinung ihrünü longlangba ABÜDONGBAnü throchehcho yangthsaba, ihrü akang ayingba arühnü rangcho.

²¹Münyüng, Edomrü ko Uzrü; akohcho künyang. Nührü achangba role; Nührüsü tbhüdeng lüloh ashah khyo rachinung.

²²Zion khyang amünyi shidüm jüko; ABÜDONGBAnü adelü ihrü yangtsi la müyohpünung. Ta Edom, ABÜDONGBAnü nüh khingchinung; Abinü nü mülang khohchehjünung.