Read Sangtam Naga EZEKIEL 1 Bible Online

EZEKIEL 1 - Sangtam Naga bible

EZEKIEL 1

¹Kang sangreu la choo müyü, amüngau nyümong, Ih, Buzi tsurü bebürü Ezekiel, Babylon la Chebar Yongkhi te Jihudarü yangtsirü yola liyacho. Ning khangthrucho, ko Ihnü Tsingrangba müngucheh ngucho.

²(Hütsü Yangthsaba Jehoiakhin yangtsi lang notsipü kang amüngau la.)

³Babylon la Chebar Yongkhi müshüm, ABÜDONGBAnü I te chotacho Ihnü yuchicho ko Abi zii rocho Ihnü müdhecho.

⁴Ihnü tsungmüsucho ko kihku langnü tsingxinyübong tseh ngucho. Nyükhi arangcheh lanü ningmüla mülacho, ko hütsünü ningmükang tehcho. Ningmüla mülacho lang tsü imüyeng kyo lango tehcho.

⁵Tsingxinyübong longla tsü nyitsarü kyo Ihnü kanglungrü müyü ngucho,

⁶ta arüh müipi tsü romih ko aqo müyüyü kehcho.

⁷Arüh jing tsü müchongkhüti, ko misüpung kyo amüzi phohrüpcho. Arüh tsü asehcho imüyeng roh-i tehcho.

⁸Arüh romih ko ajing müyüyü chah lahkeh, aqo müyüyü müipi pohki nyitsarü kheh khüdu-khüdu kehcho.

⁹Kanglungrü müipi aqo anyünyüh kishonü, arüh aqo müle tikehta müyülangpü chürocho. Arüh mühachide, afü mümühachipü amülungshünü mühachicho.

¹⁰Kanglungrü müipi romih papa müyüyü kehcho: abelang nyitsarü romih, tsalang kihkhünying romih, fülilang misüpung romih ko ahongkohlang müdi romih.

¹¹Kanglungrü müipi aqo anyüh dhimüsucho ko hütsünü anyüuba qo chah thahpücho ko arüh qo apa anyüh tsünü arüh fü kiticho.

¹²Kanglungrü müipi tsünü apümlang ngunungthsa picho, hütsünü müximülapü arüh wünyücho lang amülungshünü wüchehcho.

¹³Kanglungrü yola khüdulü tru yaba ko mühachi du liba dsibhong kyo licho. Michang truchehde ningmüla chürocho.

¹⁴Ko kanglungrü tsü ningmüla roh-i du mülachicho.

¹⁵Ihnü kanglungrü müyü chah tsü dheng yade, arüh khüdu-khüdu te alih thahpo khülujing müyü Ihnü ngucho.

¹⁶Khülujing müyüding akyota du licho; arüh müipi tsü thsidi lung kyo vicho, ko khülujing müipi along la apa khülujing khüdu-khüdu kehcho,

¹⁷hütsü khülujing tsünü masülang wüchehcho.

¹⁸Ajing fühbhi tsü anahtsenü mükangmüla kehcho.

¹⁹Kanglungrü tsü mühachide, ajing tsü arüh te mühachicho, ko kanglungrü tsü alih lanü shemüsukhang, ajing tsüsü shemüsucho.

²⁰Kanglungrü tsü arüh wünyücholang wücho, ko ajing tsü kanglungrünü nguchicho kyo du nguchicho, tunüo arüh tsü kanglugrünü nüchicho.

²¹Hütsüta künglugrü tsü mühachide, mahkhang nyehlide mahkhang shemüsude, khülujing tsü hütsüte müjang mühachicho.

²²Kanglungrüti thah michah tsü müjohcheh lung aririnü külüpcho kyo kehcho.

²³Hütsü amüjoh pohki tsü kanglungrü tsü aqo anyüh tsü kichehcho ko apa aqo anyüh tsünü afü phatipü yacho.

²⁴Arühnü mongde aqo lanü chüroba yuva tsü Ihnü yuchicho; hütsü kihdi khongcho, rothsarü amülung yuva, ko Akohba Tsingrangba yuva kyo chürocho. Arühnü mongkade, arüh qo tsü lohcho,

²⁵ta arüh thah chah amüjoh la tsünü mütozah yuva tsü chürocho.

²⁶Amüjoh michah tsü Safir lungnü külüpcho Yangthsarü pümji kyo licho, ko hütsü chah nyitsarü kyo khüdu pümcho.

²⁷Atsah tsü michang long la imüyeng kyo vicho.

²⁸Hütsünü apümlang mürükengkeng la zehba senji kyo tehcho. Hütsü ABÜDONGBA licho amüdhethsa senji hechi thsacho.