Read Sangtam Naga EZEKIEL 10 Bible Online

EZEKIEL 10 - Sangtam Naga bible

EZEKIEL 10

¹Ihnü Cherubim aqo kehba kanglungrü thah chah amüjoh tsü dhengcho ko hütsüri michah tsü Safirnü külüpcho Yangthsaba pümji khüdu kyo licho.

²Tsingrangbanü anana shü khyüba te tsü yocho, “Kanglungrü pohki khülujing kahla tsü züdung ko nü khehla michühnü jeng bieng. Hütsüpü michüh tsü yangdi michah shuung.” Abi wo Ihnü ngucho.

³Abi züdude, Cherubim aqo kehba kanglungrü tsü Amübükuh kihjinglang yacho, ko kuh yonglang tsü nyükhinü jeng licho.

⁴ABÜDONGBA ahechi tsü kanglungrü chah tsünü chürocho ko Amübükuh trahtri lang tsü wücho. Hütsüde Amübükuh tsü nyükhinü shüticho ko kekhüm tsü avisanü tehcho.

⁵Kanglungrü qonü khongba yuva tsü dongkhu kekhüm lanü mii yuchicho. Hütsü Amichahba Tsingrangba yuva kyo chürocho.

⁶ABÜDONGBAnü anana shü khyüba te khülujing kahla tsünü michüh khürü khyünung yocho, nyitsarü tsü züducho ko khülujing khüdu te yacho.

⁷Kanglungrü khüdunü hütsüla liba michang la tsü akheh tohyohchücho, michüh khürü throchehcho, ko anana shü khyüba khehla yohjücho. Abinü michüh tsü khyüpü tsicho.

⁸Kanglungrü atümung tsü arüh qo müipi pohki nyitsarü kheh kyo kehcho Ihnü ngucho.

⁹Ihnü adesü kanglungrü müipi jüp akyota khülujing müyü ngucho. Khülujing tsünü thsidi lung kyo vicho, ko khülujing müipi along la apa khülujing khüdu-khüdu kehcho.

¹¹Kanglungrü tsü mühachide arühnü müximülapü apümlang wüchehcho. Arüh apüm müjangnü müximülapü arüh wünyücho lang wücho.

¹²Arüh fü, khangtung, kheh, aqo, ko ajing tsü anahtsenü jeng kehcho.

¹³Ihnü yuva khüdunü dsi yuchicho, “Ximülaba khülujing”.

¹⁴Kanglungrü müipi chah aromih müyüyü kehcho. Akhudiba tsü misüpung romih, anyüuba tsü nyitsarü romih, asangu tsü kihkhünying romih ko amüyüu tsü müdi romih kyo licho.

¹⁵(Arüh tsü Ihnü Chebar Yongkhi shündhün nguba kanglungrü tsatsa licho.)

¹⁶Kanglungrü tsünü dhimüsu mühachide, khülujing tsü arüh yola wücho.

¹⁷Khode kanglungrü tsü nyehlicho, khülujing tsü nyehlicho; ko kanglungrü tsü mongde, khülujingsü arüh yola wücho, tunüo arüh kanglungrü tsünü nüchicho.

¹⁸Hütsüpü ABÜDONGBA ahechi tsü Amübükuh trahtri pehjüpü kanglungrü michah müdüm khüdu lang shehmüicho.

¹⁹Ihnü dheng yade, arüh qo kipü alih lanü mongmüsuhcho, ko khülujing tsü arüh yola wücho. Arühnü Amübükuh nyüchürolang tbükhüm üde yacho ko ahechi tsü arüh chah licho.

²⁰Ihnü arüh tsü Chebar Yongkhi shündhün Israel Tsingrang pohki nguba kanglungrü hütsüriepü dhengchehcho.

²¹Arüh müipi romih müyüyü, aqo müyüyü ko aqo müipi pohki nyitsarü kheh kyo kehcho.

²²Arüh romih tsü Ihnü Chebar Yongkhi shündhün nguba romih tsatsa thsacho. Kanglungrü müipi tsü müchongkhüti belang tsicho.