Read Sangtam Naga EZEKIEL 12 Bible Online

EZEKIEL 12 - Sangtam Naga bible

EZEKIEL 12

¹ABÜDONGBAnü I te chota yocho,

²“Nyitsarü tsurü,” “Nüh anyümrü nyitsarü yola lire. Arüh nahtse kehle, ta arühnü tusü müngure; nangku kehle, ta tu müyuchire, tunüo arüh anyümrü lile.

³“Ade, nyitsarü tsurü, yangtsilang würü kyo jengki loh bieng, ko mümade shemüsung. Nüh shemüsu müdüm palang tsiba tsü atümung khyang ngusohng. Kümüdeo anyümrünü nüh ngunung.

⁴Mümadenü, yangtsilang wünung nü jengki lohng; hütsü dunü arühnü nüh ngunung, ko nüh yangtsilang würü kyo anyüzehlang shemüsu tsi ngusohng.

⁵Arühnü dheng yade, nü kuh züdi map-phoung ko nü shüta tsü hütsü khu khyüchehng.

⁶Nühnü nü shüta nü pakyarü chah dhipü ko nü nah mapü amarürah lang tsü nüpunü mii khüde tsirünang mümüdhepü tsi arüh khyang ngusohng. Nühnü nguchiba tsü Israelrü nengdang amüzahnung linung.”

⁷ABÜDONGBAnü yocho roh-i Ihnü nguchicho. Hütsü nyümong atsichirü kyo Ihnü I jengki tacho, ko hütsü anyüzehlang ma rode, züdi la tsü I khehnü akhi juphoh hütsü khu chüducho. Atümungnü dheng yade, Ihnü shüta tsü I pakyarü chah dhikeh dhipü tsicho.

⁸Nyangnyü khüu ABÜDONGBAnü I te chota yocho,

⁹“Nyitsarü tsurü,” “ade hütsüri anyümrü Israelrünü nüh tu nguchiropü tsingdhengnung,

¹⁰arüh te Ih, Amichahba ABÜDONGBAnü yocho tsü young. Hiba yusi hi Jerusalem la yangthsarü ko hütsüla lirü müyurü apüm nengdang lile.

¹¹Nühnü nguchiba tsü arüh chah atikehnung amüdhethsa lilepü arüh te young, arüh arangyohrü ko atsichirü kangnung.

¹²Arüh michah yangthsaba tsünü amala ashüta pünurü chah dhipü arühnü abi khyang züdi la map-phohjüba akhi tsü khu tsinung. Abinü anah mapü khüde tsirünang müngupü tsinung.

¹³Ta Ihnü I yojeh kichehnung ko hütsüla xohsohnung. Hütsüpü Ihnü abi Babylon yangdi lang nowünung, hütsüla abi hütsü müngupü sünung.

¹⁴Ihnü abi kuhla lirüti, abi thrüzeti ko anyahrü apümlang shupishuza pehjünung, ko müyurünü arüh kyüsehnung yangchinung.

¹⁵“Ihnü arühbürü yucho ko shuparü limih la shu pehjüde du, arühnü Ih, ABÜDONGBA müdhenung.

¹⁶Yuchoti yola arüh athrünyinung nguchiti lümchehnung ko Ih, ABÜDONGBA müdhenung nengdang, khata, yangkong ko dhsara lanü Ihnü arüh khürü nyingjünung.”

¹⁷ABÜDONGBAnü I te chota yocho,

¹⁸“Nyitsarü tsurü,” “nühnü tsude ko yongde dronü dhridhrieng.

¹⁹Hiba yusi hi Amichahba ABÜDONGBA chahnü ade yingcheh arüh lih la liyaba Jerusalemrü nengdangepü yuchoti te young: Arühnü tsude ko yongde dro dhridhrieng. Arüh lih akung pehjünung, tunüo hütsüla lirü atümung yuzeng thsangnyangrüti lile.

²⁰Ade nyitsarünü jeng liba yangditi changnung ko alimih tsü mürong kangsohnung. Hütsüde arühnü Ih, ABÜDONGBA müdhenung.”

²¹ABÜDONGBAnü I te chota yocho,

²²“Nyitsarü tsurü,” “tuepü Israelrünü: ‘Bekhyah khure, ko choyoh yu adeng kangre,’ ba choyoh yu hi thali bichiro?

²³Ade hütsü nengdang Ih, Amichahba ABÜDONGBAnü tu yoro hütsü arüh te young. Ihnü hütsüba choyoh yu changkasohnung. Hütsü Israel la adelü müchosohnung. Hütsü mülih arüh te hi young: Bekhyah tsü chihko ko choyoh yu tsü tikehle!

²⁴“Israelrü yola adelü arahkheh müngucheh mahkhang arahkheh choyohrü mülinung.

²⁵Ih, Amichahba ABÜDONGBAnü arüh te chotanung, ko Ihnü tu yoro hütsüta nguchinung. Adelü mümünunung. Nührü anyümrüti, Ihnü nührü chah nguchinungepü yocho müjang Ihnü nührü akang lide nguchinung. Ihnü choko,” Amichahba ABÜDONGBAnü yore.

²⁶ABÜDONGBAnü I te yocho,

²⁷“Nyitsarü tsurü, nührü müngucheh ko nührü choyohba tsü bekhyah ashu lilepü Israelrünü lümre.

²⁸Hütsüeko arüh te Ih, Amichahba ABÜDONGBAnü hita yore: Adelü mümünunung. Ihnü tu yocho hütsüta nguchinung. Ih, Amichahba ABÜDONGBAnü choko!”