Read Sangtam Naga EZEKIEL 13 Bible Online

EZEKIEL 13 - Sangtam Naga bible

EZEKIEL 13

¹ABÜDONGBAnü I te chota yocho,

²“Nyitsarü tsurü,” “arüh lümcho choyohrü Israel azikehrüti tsü mülangjüng. Arüh te ABÜDONGBA yu hi nyinung young.”

³Amichahba ABÜDONGBAnü hita yore: “Hiri amüthsehthsa azikehrüti ahohah! Arühnü arühbürü lümcho yu jüko ko arühbürü müngucheh dochehko.

⁴Israelrü, nührü azikehrüti tsü athsangnyangcho yangdi la liba shirung kyo lile.

⁵Arühnü atrümnahcho tbü tsü münyahre, mahkhang tbü tsü mükülüpchire, hütsünü ABÜDONGBA nyümong chita rode Israelrü khümcho mülichehnung.

⁶Arüh müngucheh tsü amüthsalang, ko choyohba tsü arahkheh. Arühnü I chahnü yusi rorepü yore, ta Ihnü arüh mümütheh. Ta arühnü arüh yu tsü tikehnung longdire!

⁷Ihnü arüh te yore: Nührünü nguba müngucheh ko choyohba tsü arahkheh. Nührünü choba tsü I yuepü yore, ta Ihnü nührü te müchota!”

⁸Hütsünü Amichahba ABÜDONGBAnü arüh te yore, “Nührü yu tsü amüthsalang ko müngucheh tsü arahkheh. Ih nührü nyüm lile.

⁹Ihnü nührü arahkheh münguchehrü ko arahkheh choyohrüti khingchinung thsako. I müyurü adhrongchehba külüpnung shimükhongde nührü hütsüla müzhehnung; Israelrü shutsakhung thrahbülungba la tsü nührü neng müzehnung; nührü khodesü nührü lih lang müthalinung. Hütsüde Ih, ABÜDONGBA nührünü müdhenung.

¹⁰“Azikehrütinü apüm tsalepü yo I müyurü nümülacho. Apüm yuje atsa mah! I müyurünü lungnü tbü tbücho, ko azikehrütinü ro athrunü müyüticho.

¹¹Azikehrüti te arüh tbü tsü khülunungepü young. Ihnü tsing rosohnung. Shurü sühsohnung, ko tsingxinyübong hütsü chah fükehsohnung.

¹²Tbü tsü khülunung, ko nührü te athru münohba tsü tu jingchocho pü tsingdhengnung.”

¹³Ade Amichahba ABÜDONGBAnü hita yore: “I rihlong chüro, tbü tsü thsangnyangjünung tsingxinyübong, tsing ko shurü rosohnung.

¹⁴Arühnü athru münohba tbü tsü thsangnyangjünung, shühnyangjünung, ko akhyümdi lung tsü adeng yohpüjünung. Hütsü trümtsunung ko nührü apüm süsohnung. Hütsüde nührünü Ih, ABÜDONGBA müdhenung.

¹⁵“Tbü ko sürünü hütsü athrunü münohtiro arühnü I rihlong müdhenung. Hütsüde tbü tsü khüluko ko hütsü athrunü müyürüti,

¹⁶ko mütsa lipü Jerusalemrü te tsalepü yorü azikehrüti apüm changkopü Ihnü nührü te yonung!” Amichahba ABÜDONGBAnü choko.

¹⁷ABÜDONGBAnü yocho, “Nyitsarü tsurü, ade nührü yola choyohlarüti dheng.

¹⁸Arüh mülangjüng ko arüh te Amichahba ABÜDONGBAnü yocho yu tsü young: “Nührü khingkurüti ahohah! Bürü akang müshülinung nengdang nührünü nyitsarü müipi khehla rümba ko thahyühba shü xüre. Nührünü I müyurü michah nührü jingchonung nengdang akang asü zii khyünyücho.

¹⁹Lüdi müyo khüdu ko hümthse tpah azikyah ngang müyurü bete nührünü Ih mükhimüngucho. Asünung mülengcho nyitsarü nührünü kyüsehcho, ko akang linung mülengrü akang lisohcho. Hütsüta I müyurü te arahkheh cho arüh yudsisohcho.”

²⁰Ade Amichahba ABÜDONGBAnü hi yore: “Akang asü rahsehba zii khehla rümba tsü Ihnü thrünyire. Ihnü nührü kheh lanü hütsüri lehchehnung ko nührünü rah liba nyitsarüti müthehchünung.

²¹Ihnü nührü thahyühba tsü drichehjünung ko nührü kheh lanü I müyurü lede nengdang lehchehnung. Hütsüde Ih, ABÜDONGBA nührünü müdhenung.

²²“Ihnü lerohpehjünung mülümba nyitsarü nührü arahkheh yunü suhzahsohko. Amütsarü amünyi lanü arüh akang khümchonung nührünü yatire.

²³Hütsünü ade nührü arahkheh müngucheh ko choyohba khuko. Nührünü Ih, ABÜDONGBA müdhenung, Ihnü I müyurü nührü kheh lanü khümchore.”