Read Sangtam Naga EZEKIEL 14 Bible Online

EZEKIEL 14 - Sangtam Naga bible

EZEKIEL 14

¹Israelrü langnürü khürü I yanglang ABÜDONGBA lümlong tsingdhengnung rocho.

²Hütsüde ABÜDONGBAnü I te chota yocho.

³“Nyitsarü tsurü,” hiri nyitsarünü kyothri khyang arüh lasih jopehko ko amünyi yang kyothrinü nowüre. Ihnü arüh te lalingnung nührünü lümrü do?

⁴“Ade arüh te chotaang ko Ih, Amichahba ABÜDONGBAnü yocho yu tsü arüh te young: kyothri khyang arüh lasih jüba Israelrü müipi ko hütsü abi münyi shitpahpü azikehrü yanglang müchehnung rorüh I chahnü alalingba ngunung, abi kyothri adrong amii ngunung.

⁵Hütsüri kyothritinü I tenü Israelrü nümülacho, ta Ihnü lalingcho khu arüh nüli ronung longdire.

⁶“Hütsüeko ade, Israelrü te Amichahba ABÜDONGBAnü hita yore: Ximülang ko nührü athrünyinung kyothriti pehjüng.

⁷“Khode Israelrü mahkhang arüh yola liba shuparü nyüh khüdunü I tenü ximüla kyothri mübonang, ko azikehrü te tsingdhengnung wonang, Ih, Amichahba ABÜDONGBAnü abi khyang alalingba jünung.

⁸Ihnü abi nyümnung. Ihnü abi tsü adüzü khüdu kangsohnung. Ko nührünü Ih ABÜDONGBA müdhesohnung Ihnü abi I müyurü yolanü pehnung.

⁹“Azikehrü khüdunü arahkheh alalingba jo kihyochükhang, hütsü Ih, ABÜDONGBAnü abi kihyochüko. Ihnü abi Israelrü yolanü pehnung.

¹⁰Azikehba ko amüchehba anyüding müjang khingchinung.

¹¹Israelrünü Ih thrüchahchü müpehsohnung ko arühbürü münyinü arüh mümünyisohnung Ihnü hütsüta nguchinung. Arüh I müyurü ko Ih arüh Tsingrang thsanung. Amichahba ABÜDONGBAnü choko.”

¹²ABÜDONGBAnü I te chota yocho.

¹³“Nyitsarü tsurü,” “yucho khüdunü amünyi shitpah ko I te yuje müchokhang, Ihnü I kheh müyungchü arüh tsuyongba rolang yatijünung. Ihnü yangkong rosohnung ko hütsünü nyitsarü ko kanglungrü apüm süsohnung.

¹⁴Hiri nyüh asang Noa, Daniel ko Job hütsüla linye, arüh tsacho ngang arüh akang du khümchonung.” Amichahba ABÜDONGBAnü choko.

¹⁵“Mahkhang müyurüti mükahsehsohnung kanglungrü müthehnung ko sünüsü hütsüba lih mülahkhuchehnung nengdang alih tsü dee dhsürü kangsohnung,

¹⁶ko hütsüri asang tsü hütsüla linye Ih, Amichahba ABÜDONGBA, akang Tsingrang linülü arühnü arühbürü tsuzarü mii mükhümchochehnung. Arühnü arühbürü akang du khümchochehnung ko alih tsü rangmü kangnung.

¹⁷“Mahkhang Ihnü hütsüba yucho chah khata hirojünung ko nyitsarü ko kanglungrü apüm wohpehnung nengdang achangba thsunohrü müthehnung,

¹⁸ko arüh asang hütsüla linye Ih, Amichahba ABÜDONGBA akang Tsingrang linülü arühbürü akang chah khu arühnü arühbürü tsuzarü mii mükhümchochehnung.

¹⁹“Ihnü hütsüba yucho michah rümra mütheh ko I rihlong la akang adrong khyükhang, nyitsarü ko kanglungrü kyüsehkhang,

²⁰Noa, Daniel ko Job, arüh asang hütsüla linye, Ih, Amichahba ABÜDONGBA, akang Tsingrang linülü arühnü arühbürü tsuzarü mii mükhümchochehnung. Arüh tsacho ngang arühbürü akang du khümchochehnung.”

²¹Amichahba ABÜDONGBAnü hita yore: “Ihnü Jerusalem michah akhingchi amütsauba müyü müthehnung, khata, yangkong, rangmü kanglungrü ko dhsara hirinü nyitsarü ko kanglungrüti changjünung.

²²Nyüh khüdu nyingnü apu tsuzarü khümchokhang, nührü yang rode arüh dheng. Arüh khüta amütsanang dheng, ko Ihnü Jerusalem chah hiroba akhingchi tsü athsalangepü müdheing;

²³hütsüde, Ihnü nguchiba lüpcho tsü athsalang nguchirepü nührünü müdhenung.” Amichahba ABÜDONGBAnü choko.