Read Sangtam Naga EZEKIEL 16 Bible Online

EZEKIEL 16 - Sangtam Naga bible

EZEKIEL 16

²“Nyitsarü tsurü,” Jerusalem te abükyünü athrünyinung nguchicho tsü tho ngung.

³Jerusalem te Amichahba ABÜDONGBAnü tu yoro hütsü young: “Nüh Kanan la surocho. Nüu Amor-rü, ko nü tpa Hitlarü thsacho.

⁴Nüh surode, nü mülee tsehrü mahkhang nü thsüthohrü mahkhang mihnü nijürü mahkhang shü la müshürü mülicho.

⁵Hiri nü nengdang nguchijünung nüh müi lümrü süsü mülicho. Nüh surode, sünüsü nüh mümüicho. Nüh yanglong la peh jocho.

⁶“Hütsüde Ih lahkhucho ko nüh ashüh la suchi ngucho. Nüh ashühnü müyühtipü licho, ta Ihnü khütakhi nüh müsüsohcho.

⁷Ihnü nüh singdong anyünyeh kyo zisohcho. Nüh rezeh athseng zicho ko lazarü kangcho. Nü mama tsa chürocho, nü kuva chicho, ta nüh tbhüdeng licho.

⁸“Ih anyüpiu lahkhucho ko müitanung becho chihcho Ihnü müdhecho. Ihnü I fükhümnü nü füpüm lüptijücho ko nüh müinung Ihnü nyengchocho. Ho, Ihnü nü te kukangba azengchotaba külüpcho, ko nüh I yo kangcho.” Amichahba ABÜDONGBAnü hita yore.

⁹“Hütsüde Ihnü kih hiro nü chahnü ashüh tsü thsüthohpehjücho. Ihnü nü fü la olive tuji münohjücho.

¹⁰Ihnü axücho jengki nüh khyüsohcho ko shuküp atsauba jingthri, ajengpa thahrümsing ko ariri fükhüm jücho.

¹¹Ihnü nü khyang thsidilung, khehmüyang ko lah lahsohcho.

¹²Ihnü nü khyang nabongmüshi ko nang müshi ko atsah atsa kuthri jücho.

¹³Nüh hon ko taripinü külüpcho atang jengki licho, ko nühnü lede anana ko ariri sehyahcho shü khyücho. Hüm atsaubanü külüpcho hümthse nühnü tsucho, ko thsakukih ko olive tuji licho. Nü tsah atsa tsü ariri kehcho ko nüh yangthsalatpü kangcho.

¹⁴Nü tsah tsachonü yanglih apüm la nüh anengkhong kangcho, tunüo nüh hütsüdoi tsasohba tsü Ihnü külüpjücho, Amichahba ABÜDONGBAnü hita yore.

¹⁵“Ta nühnü nü tsah tsacho chah dümpipü arorüh atümung te yüpcho.

¹⁶Nü jengki khürü nühnü mübüba müdüm tangsohnung sehyahcho ko nahtrahnaxenglarü kyo, nühnü atümung khyang nü akang jücho.

¹⁷Ihnü jüba hon ko taripi khyo nühnü adhrerü kyothri külüpcho, ko arüh te nahtrahnaxengcho.

¹⁸Ihnü jüba axücho shü khyo nühnü kyothri chah phakehjücho, ko Ihnü jüba olive tuji ko müchiji khyo kyothri khyang mübücho.

¹⁹Ihnü nü khyang hüm atsaubanü külüpcho tsuyongba, olive tuji, ko thsakukih jücho, ta nühnü hütsüri khyo kyothri chahnü amüwa nguhnung arüh khyang mübücho Amichahba ABÜDONGBAnü hita yore.

²⁰“Hütsüpü nühnü I khyang nümüsujüba tsuzarü khyo kyothri khyang kangmübü jücho. Nü mabomashicho tsünü mükükyürü do?

²¹I tsuzarü khyo kyothri khyang nühnü kangmübü trüp mübücho.

²²Nüh athrünyinung akang mabomashi lide, nühnü nü zade, nütbhüdeng, nübükyü ashüh la suchi jocho khüdupi dusü mülümcheh.”

²³Amichahba ABÜDONGBAnü yocho, “Nüh ahohah! ahohah! Nühnü amünyiecho apüm nguchiko ko hütsüpü

²⁴langjüp apüm la nühnü kyothri amübükuh thsa mabomashi nguchiko.

²⁵Nühnü nü tsah atsa chah chongbong münohko. Nühnü alahkhurü apüm khyang nübükyü akang jüko, ko nyümong mükhu nüh alaa mabomashilarü kangre.

²⁶Mabomashi nü kurümrü, Ijiprü nü te no yüpko, ko nühnü I rihlong chürosoh mabomashire.

²⁷“Ade Ihnü nüh khingchinung ko nü chahnü amüwa hitsinung. I kheh dhimüsuko. Nüh amümüsa nguchi ngang nü thrünyirü Filistinrü khehla jüko.

²⁸“Tunüo nühnü aparünü nüh longmünyüpchonü, nühnü Assyriarü khanglang iiwücho. Nüh arüh mabomashirü thsacho, ta arühnüsü nüh longmünyüp.

²⁹Nüh shithsabhülehba yucho Babylonrü tesü mabomashiko, ta arühnüsü nüh longmünyüp.”

³⁰Amichahba ABÜDONGBAnü hita yore: “Nühnü hiri apüm ashahmükeh mabomashilarü kyo nguchiko.

³¹Yangdong apüm la nühnü kyothri mübüji külüp hütsürila mabomashi nguchiko. Ta shehsherü mabomashilarü kyo, nühnü thsi nengdang münguchi.

³²Nü nii müinung mülih shirü te nahtrahnaxenglarü khüdu kyo nüh lile.

³³Mabomashirünü angang khyüre, ta nühnü apüm langnü ro nü te yüpsohnung nü müirü apüm khyang jiyü ko pohsa jüre.

³⁴Nüh alaa mabomashirü khüdu lile. Hütsütari kangnung sünüsü nüh mükhing. Nühnü angang mükhyü; nühnü arüh khyang jücho! Ho, nüh pathsa khüdu lile.”

³⁵Hütsüeko ade, Jerusalem, nüh mabomashilarü! ABÜDONGBAnü yocho nyieng.

³⁶Amichahba ABÜDONGBAnü hita yore: “Nahtrahnaxenglarü kyo, nühnü nü jengki khohpehpü nühnü müirü ko athrünyinung kyothriti khyang nü jangjang jücho, ko kyothri khyang nü tsuzarü kangmübü jücho.

³⁷Hütsü ngang nühnü müiba ko nühnü thrünyiba nü shangrü ahiti dsibülungnung. Ihnü arüh nü mükang noronung, ko nü shü khohpehjüpü arüh khyang nüh tbhüdeng ngusohnung.

³⁸Nühnü nahtrahnaxengcho ko mapsehcho nengdang Ihnü nüh mülangjünung ko Ihnü I rihlong la nüh khingchi süsohnung.

³⁹Ihnü arüh khehla nüh jünung ko nü mabomashiji ko kyothri mübüji arühnü thsangnyangjünung. Arühnü nü jengki ko thsidilung khyüjünung ko nü tbhüdeng pehjünung.

⁴⁰“Arühnü lungnü nüh mapsehsohnung amülung khüdu thsümüsunung, ko arüh nohshengnü nüh zangzang khanahnung.

⁴¹Arühnü nü kuh trüp-pehjünung ko nüh khingchicho khingkurüti khyang ngusohnung. Ihnü nüh mabomashi ko nü müirü khyang jiyü jüba lanü zahsohnung.

⁴²Hütsüpü du I rihlong zahnung, ko Ih tbachi kangnung. Adelü Ihnü zii müchüronung mahkhang nah mümohnung.

⁴³Nü zade Ihnü nüh khüta xükümcho nühnü nbüchüko, ko nü nguchicho lüpchonü I zichürosohko. Hütsünü Ihnü nü khyang hütsüri apüm nengdang thsasohcho. Tuepü nühnü athrünyinung nguchi apa nguchicho chah mabomashi lahkehcho?” Amichahba ABÜDONGBAnü hita yore.

⁴⁴ABÜDONGBAnü yocho, “Müyurünü choyoh yu hi nü nengdang bichinung, Jerusalem: ‘Atpa khütanang atsularü hütsü kyonung.’

⁴⁵Nüh yujeba nü tpa tsularü. Abükyünü anii ko tsuzarü thrünyicho. Nüh nü nilarü, sürünü arüh niirü ko tsuzarü thrünyicho arüh kyole. Nü tpa Hitlarü ko nüu Amor-rü licho.

⁴⁶“Nühfü azitpü tsü kihku lahpi liba yangdongti ko Samaria lile. Nü nilarü tsü kihjing lahpi liba yangdongti zeh Sodom lile.

⁴⁷Arüh jingdrang la tsehnung ko arüh athrünyinung nguchi iithsanung nühnü longsücho do? Mah, nühnü nguchicho lüpcho la arüh tenü nüh amütsau thsacho tunyah mülie.

⁴⁸“Ih akang liba Tsingrang linü,” Amichahba ABÜDONGBAnü yore, “Nü nilatpü Sodom ko yangdongtinü nüh ko nü yangdongtinü amünyi nguchicho kyo khodesü münguchidheng.

⁴⁹Abükyü ko atsularütinü müthsehcho, tunüo arüh atsunung thangchi licho ko atbachi la longlüm licho, ta arühnü ailümrü ko suromüchürü müdhengcho.

⁵⁰Arüh amüthseh ko ahongzi ko Ihnü thrünyiba nguchi du nguchicho, hütsünü Ihnü arüh changjücho, nühnü müdhele.

⁵¹“Samariarünü nühnü nguchicho amünyi achangshosü münguchi. Abükyü tenü nührünü alaa amünyi nguchiko. Nührü athsangnyang khu nührü nilarü alaa achomükeh ngusohre.

⁵²Ade nührünü nührü ashah rangchonungbae. Nührü münyi nührü nilarü tenü khurachonü arüh nührü jingte achomükeh ngusohre. Ade shahng ko nührü ashah rangchoung, tunüo nührünü nührü nilarüti amüsau ngusohko.”

⁵³ABÜDONGBAnü Jerusalem te yocho, “Ihnü Sodom ko abükyü yangdongti ko Samaria ko abükyü yangdongti anyüpiu müwajünung. Ho, Ihnü nührüsü müwajünung.

⁵⁴Nührübürü nengdang nührü ashah khyünung, ko nührü ashah khyüchonü nührü nilarü khüdoi atsanang hütsü ngusohnung.

⁵⁵Arüh thali zehzang kangnung ko nührü ko nührü yangdongtisü külüpchinung.

⁵⁶Nührü suro tsa lide ko nührü münyi mümishaede, Sodom nengdang nührünü mütülacho do?

⁵⁷Ade abükyü tsü kyo, Edomrü, Filistinrü ko nührü thrünyirü mükangmüshü lirü münyüdong nührü kangko.

⁵⁸Nührü mabomashi ko athrünyinung nguchi nengdang nührünü hinung.” Amichahba ABÜDONGBAnü choko.

⁵⁹Amichahba ABÜDONGBAnü yore, “Ihnü nührü aleng nührü bichinung, tunüo nührünü anyengchocho pehjücho ko azengtacho thsangnyangcho.

⁶⁰Ta Ihnü nührü zade nührü te azengchotaba külüpcho tsü lümkehnung ko müchangkaba azengchotaba khüdu Ihnü nührü te külüpnung.

⁶¹Nührü nguchi nührünü lümchehnung ko nühfü ko nü nilarüti thali rode nührünü shahnung. Hi azengchotaba la müzeh nye, Ihnü arüh nührü tsularüti kangsohnung.

⁶²Ihnü nührü te azengchotaba külüpchinung, hütsüde nührünü Ih, ABÜDONGBA müdhenung.

⁶³Nührü thsamehcho apüm Ihnü mülangpehjünung, ta nührünü hütsüri lümchehnung ko ashahchonü be mükhangthrunung.” Amichahba ABÜDONGBAnü choko.