Read Sangtam Naga EZEKIEL 17 Bible Online

EZEKIEL 17 - Sangtam Naga bible

EZEKIEL 17

¹ABÜDONGBAnü I te chota yocho.

²“Nyitsarü tsurü,” “Ih, ABÜDONGBAnü arüh te hita yorepü müdhesohng,

³Israelrü te yukitaba khüdu young: Müdi arangcheh khüdu, atsah atsa anbüh ko aqo arangcheh kichehpü licho. Abinü Lebanon zonglang wücho

⁴ko cedar sing khüdu khungsah shithsabhülehrü lih lang hiwü shithsarü yangdi la yohpücho.

⁵Hütsüpü abinü Israel lih lanü singdong khüdu hiwücho ko kih thangchi liba asu lih khüdu la khyümcho.

⁶Singdong tsü thümlangcho ko münyüm shükusishü kang shüchicho. Ajengza tsü ninglang müdi lahpi zicho ko ara asoh rarangcho. Shükusishü tsü ajengza ko avanü lüpti licho.

⁷“Apa müdi arangcheh khüdu aqo amülah ko anbüh acheh licho. Ko ade shükusishü tsünü abi yang ara müthehcho ko tbü la liba tenü abi khyang kih alaa jünung alongdi la abi yang ava ximülacho.

⁸Ta shükusishü tsü tsa zi, asih sii ko shükusishü atsa khüdu kangsohnung kih thangchi licho la ko asu lih la hütsü khyümcho.

⁹“Hütsünü Ih, Amichahba ABÜDONGBAnü tsingdhengre: Shükusishü hi müsüpü zinung do? Akhudiba müdinü hütsü aranü rohcheh, shükusih tsü tphahcheh ajengza tsü khungsah mümükusohnung ang? Hütsü nengdang tase amülah müdhsüdah mahkhang hütsü tphahchehnung yucho amülah müdhsüdah.

¹⁰Ho, hütsü khyümko, ta hütsü müsüpü zinung do? Nyüchüro nyübong fükehde hütsü mümükunung ang? Zi yaba la tsü mümükupehnung ang?”

¹¹ABÜDONGBAnü I te yocho,

¹²“Hiri anyümrü te arühnü yukita adüzü tsü mümüdhenang tsingdheng. Babylon Yangthsaba Jerusalem lang ropü Babylon lang Yangthsaba ko abi pohki adirüti notsicho arüh te young.

¹³Abinü Yangthsaba kukhi lanü nyüh khüdu nowücho ko abi te yangtsa külüp ko abi pohki yochonyi linung yuchümsohcho.

¹⁴Ko abinü arüh yucho tsü thali müshemüsusohnung ko azengchotaba yohpüsohnung ayingthsarü nyitsarü khürü rang yohpücho.

¹⁵Ta Juda Yangthsabanü nyüm yacho ko Ijip lang kuri ko rothsarü khütang nünung müthehcho. Abinü kohnung do? Abinü hütsü bipü tsichehnung do? Abinü anyengchotaba tsü müthsangnyangchehnung ko mükhingchipü mülinung.

¹⁶“Ih akang liba Tsingrang linü,” Amichahba ABÜDONGBAnü yore, “hiba Yangthsaba hi Babylon la sünung tunüo abinü abi Yangthsaba kangsohba Babylon Yangthsaba te nyengchotacho thsangnyangko.

¹⁷Babylonrünü arüh khütang kyüsehnung shulüm threhju ju kumünyi külüpde, re azeh Ijip rothsarünü mii arüh mütrochehnung.

¹⁸Abinü yuchümba ko yangtsa külüpba tsü thsangnyangko. Abinü hiri apüm nguchiko ko ade abi mütsichehnung.”

¹⁹Amichahba ABÜDONGBAnü yore, “Ih akang Tsingrang linü, abinü I nengla yuchüm yangtsa külüpcho thsangnyangcho ngang Ihnü abi khingchinung.

²⁰Ihnü zeng khyangjünung ko hütsüla abi xohsohnung. Ihnü abi Babylon lang nowünung ko hütsüla abi khingchinung, tunüo abinü I te yuje mücho.

²¹Abi athrungrüti khata la tsü kyüsehnung ko anyingchoti apümlang shupishuzanung. Hütsüde Ih, ABÜDONGBAnü chokopü nührünü müdhenung.”

²²Amichahba ABÜDONGBAnü hita yore: “Ihnü cedar sing athseng amüle tsü hironung ko anu tsü khungsahnung; Ihnü hütsü azong athseng chah khyümnung,

²³Israel la akhang athsenguba chah. Hütsünü ajengza chinung ko asih sihnung, ko cedar sing arangcheh kangnung. Uza alangkhüru hütsüla linung ko hütsü khümki arüh ku münyinung.

²⁴Alih la singdong apümnü Ih ABÜDONGBAepü müdhenung. Ihnü sing athseng retsure ko sing akhikhi athseng zisohre. Ihnü sing amüyah mükusohre ko akungcho sing axeng kangsohre. Ih, ABÜDONGBAnü choko. Ihnü tu chocho hütsü Ihnü nguchinung.”