Read Sangtam Naga EZEKIEL 18 Bible Online

EZEKIEL 18 - Sangtam Naga bible

EZEKIEL 18

¹ABÜDONGBAnü I te chota yocho,

²“Israel lih la müyurünü thali-thali chochiba choyohyu hi tuo? Tburünü aci tsucho, Ta tsuzarü ha süre.

³“Ih akang Tsingrang linü, Amichahba ABÜDONGBAnü yore, Adelü Israel la nührünü hiba choyohyu hi mübichinung.

⁴Anbü apüm I yo, tpurü anbü ko tsuzarü anbüsü. Khüiba anbünü amünyi shitpahnang abi sünung.

⁵“Adüzünü yuje nyitsarü atsa khüdu amüsa ko nyüje lile.

⁶Abinü Israelrü kyothri mümübü mahkhang ayaticho amüsa müdüm la kangmübü jücho abinü mütsu. Abinü bürü nitpürü te mümükhong mahkang khingkurü khüdu abükyü ayah rode mümükhong.

⁷Abinü süsü mükihyochü mahkhang mükengcho khyü. Anyarünü yuzi yohpücho abinü thali jüre; yangseh lirü kangre ko tbhüdeng lirü khyang jengki jüre.

⁸Abinü ajehyoh zeh münyasoh. Abinü amütsa nguchinung thsonglire ko yuji la yuje yukhare.

⁹Hitari nyitsarünü I amülaba ko yuzeng bichire. Abi amüsa ko abi akang linung,” pü Amichahba ABÜDONGBAnü yore.

¹⁰“Adüzünü hiba nyitsarü khüdu liko, abinü kengchorü, kyüsehrü

¹¹ko abinü aunü khodesü münguchicho hiri nguchire. Abinü ayaticho amüsa müdüm la kangmübü jücho tsucho ko bürü nitpürü te mükhongcho.

¹²Abinü ailümrü kihyochücho, kengchocho ko anyarünü yuzi yohpücho müjücho. Abinü müyudsirü mübüji lang würü, athrünyinung kyothri mübürü

¹³ko ajehyoh zeh thsi nyajüre. Abi akang linung do? Mah, akang mülinung. Abinü hiri athrünyinung nguchi nguchicho, hütsünü abi sünung. Abi süba tsü apu mütangnung.

¹⁴“Ade adüzünü hiba anyüuba nyitsarü atsurü khüdu liko. Abinü aunü nguchiba amünyi apüm ngure, ta abi kyo münguchi.

¹⁵Abinü Israelrü kyothri mümübü mahkhang ayaticho amüsa müdüm la kangmübü jücho mütsu.

¹⁶Abinü bürü nitpürü te mümükhong mahkhang süsü müsehchi mahkhang mükengcho. Anyarünü yuzi yohpücho abinü thali jüre. Abinü yangseh lirü khyang tüpre ko tbhüdeng lirü khyang müpisohre.

¹⁷Abinü amütsa münguchire ko ajehyoh khyo thsi münyajüre. Abinü I yuzeng ko I amülabati bichire. Abi au münyi ngang müsünung, ta abi yuje akang linung.

¹⁸Aunülü kihyochücho kengchocho, ko lede apüm te amütsa nguchicho. Hütsüta abi apu münyi ngang sünung.

¹⁹“Ta nühnü tsingdhengcho: ‘Tuepü au münyi ngang atsurü müchongchanung?’ Alalingba tsü hi, atsurü tsünü tu athsalang ko atsa hütsü nguchicho. Abinü I yuzeng bichicho ko hütsüri dee müzah yohpücho, hütsünü abi yuje akang linung.

²⁰Sünü amünyi shitpahnang abi sünung. Au münyi ngang atsurü müchongchanung, mahkhang atsurü münyi ngang au müchongchanung. Nyitsarü atsa nguchi atsa nengdang jiyünung ko nyitsarü amütsa abinü amütsa nguchicho ngang khingchinung.

²¹“Amütsarü nyüh khüdunü amünyi münguchipü I yuzeng bichikhang, abinü athsalang ko atsa nguchikhang, abi müsünung; abi yuje akang linung.

²²Abi münyiti apüm mülangpehjünung ko abi akang linung, tunüo abinü athsalang tsü nguchicho.

²³Münyirü khüdu sücho ngu künyangrepü nührünü lümrü mah-o?” Amichahba ABÜDONGBAnü tsingdhengre, Mah, Ihnü abi lasih thsamüla akang lisohnyüre.

²⁴“Ta amüsarü nyüh khüdunü atsa nguchiti pehpü amütsarünü nguchiba nguchi amütsa ko athrünyinung nguchimüsukhang, abi lisohnung mah-o? Mah, abinü nguchicho atsa tusü mülümchehnung. Abi yuje müchocho ko apu münyi ngang abi sünung.

²⁵“Ta nührünü yore, ‘ABÜDONGBAnü nguchiba tsü athsalang mah.’ I yu nyieng, nührü Israelrü. Ihnü nguchiba hi amüthsalangepü nührünü lümrü mah-o? Nührü lang tsü amüthsalang lile.

²⁶Khode amüsarü nyüh khüdunü nguchi atsa nguchi pehjüpü amütsa nguchinung dikehnang ko abi sonang, abi süba tsü apu münyi nguchi ngang lile.

²⁷Khode münyirü khüdunü amünyi nguchiba tsü zahpü athsalang ko atsa nguchinang, abinü apu akang khümchore.

²⁸Abinü abi tu nguchiro hütsü lümchehre ko amünyi müshitpahre, hütsünü abi müsünung, ta akang linung.

²⁹Ko nührü Israelrünü yore, ‘ABÜDONGBAnü nguchiba tsü athsalang mah.’ Nührünü I nguchi tsü athsalangepü mülümrü, mah-o? Nührü lang tsü athsalang mah.

³⁰“Ade Ih, Amichahba ABÜDONGBAnü nührü palu nguchi aichi yukhanungepü nührü Israelrü te yore. Nührünü nguchiba amütsa apüm lanü ximülang ko amünyinü nührü tüchangsoh.

³¹Nührünü nguchi roba amütsa tsü pehng ko lasih asi ko lümlong asi khyüng. Tuepü nührü Israelrünü sünyüro?

³²Amichahba ABÜDONGBAnü yore, Ihnü süsü müsüsohnyüre. Nührü münyi lanü ximülang ko akang lieng.”