Read Sangtam Naga EZEKIEL 19 Bible Online

EZEKIEL 19 - Sangtam Naga bible

EZEKIEL 19

¹ABÜDONGBAnü I te Israelrü yangthsarü anyüh nengdang hiba longri khi thsanung yocho:

²Nü tpa tsü khüta kihkhünying atrüh! Abükyünü adrünung kihkhünying apung yola azati kangchehcho.

³Abükyünü aza khüdu kangchehcho ko shu-iinung docho; abi nyitsarü shuh tsurü kangcho.

⁴Yuchotinü hütsü yuchicho, ko shukuh khüdu la abi xohcho. Kojamnü Ijip chii tphah hiwücho.

⁵Alongdi apüm mükhude, abükyünü yingcho. Hütsüpü apa aza khüdu kangchehcho, ko hütsü adrünung kihkhünying khüdu kangcho.

⁶Khode abi zii kangcho abinü apa kihkhünying yola yohrütacho. Abinü shu-iinung nyichocho ko nyitsarü shuh tsurü kangcho.

⁷Abinü roshengvi thsangnyangjücho, abinü yangditi changjücho. Abi khong müipi hütsüla lirü drümüyangcho.

⁸Yuchotinü abi te khatanung shibülungcho; apümlangnü nyitsarü rocho. Arühnü arüh zeng khyangcho ko arüh zeng la abi xohcho.

⁹Arühnü abi akhangti khüdu la yohcho, ko Babylon Yangthsaba yang hiwücho. Arühnü abi khangti nyahcho, abi khongcho thali müyuchinung nengdang, Israel khang chah.

¹⁰Nü tpa tsü yongkhi te khyümcho shükusishü kyo licho. Kih thangchi lichonü, shükusishü tsü ava ko asihnü mütsenglüp licho.

¹¹Ajengzati dee drengdreng licho, ko Yangthsaba ja thsa zicho. Shükusishü tsü nyükhi chihnyo athseng zicho; ava dhülümcho ko thsengcho tsü apümnü ngucho.

¹²Ta zichüroba khehnü hütsü aranü rohchehcho ko alih la tsayohchüpehcho. Nyüchüro nyübongnü hütsü kungpehjücho. Ajengza khungnahjücho; arüh kungpehcho ko trüpcho.

¹³Ade hütsü lipilih la khyümko, akung ko kih müli lih la.

¹⁴Shükusishü chah michang küdure; michangnü ajengza ko asih trüp-pehko. Ajengza tsü adelü mükhümkhümnung. Yangthsaba ja khodesü mükangcheh. Hiba hi alongri khi; hi loli loli thsacho.