Read Sangtam Naga EZEKIEL 20 Bible Online

EZEKIEL 20 - Sangtam Naga bible

EZEKIEL 20

¹Hütsü ihrü yangtsi la licho kang dhünyeh, choo münga ko nyümong adhüreu la licho. Israel yucho la langnürü khürü ABÜDONGBA lümcho tsingdhengnung ro I bete arühnü pümcho.

²Hütsüde ABÜDONGBAnü I te chotacho.

³Abinü yocho, “Nyitsarü tsurü, hiri nyitsarü te chotang ko arüh te Amichahba ABÜDONGBAnü hiroh-i yoreding: Nührü I lümlong tsingdhengnung rocho, mah-o? Ih, akang Tsingrang linü, Ihnü nührü khyang tusü mütsingdhengsohnung. Ih, ABÜDONGBAnü choko.

⁴“Nyitsarü tsurü, nühnü arüh yukhanung rungnüm lirü mah-o? Khang hütsüta nguching. Arüh tpurünü athrünyinung nguchicho tsü arüh khyang müdhesohng.

⁵Ihnü yoba tsü arüh te young. Israel throchehde, Ihnü arüh khyang lango nyengchosohcho. Ijip la Ipu jangjang arüh te misha ngusohcho ko arüh te yocho: Ih ABÜDONGBA nührü Tsingrang lile.

⁶Hütsütade Ihnü arüh Ijip lanü nüchehnung ko anyengchocho lih, nyikih ko thsakukih pohyaba lih lang nowünung nyengchocho.

⁷Ihnü arüh te arühnü müi liba athrünyinung kyothri pehnung ko arahkheh Ijiprü tsingrang mübo arüh mümünyinung yocho, tunüo Ih, ABÜDONGBA arüh Tsingrang lile.

⁸Ta arühnü Ih mükhimücho I yu münyicho. Arühnü athrünyinung arüh kyothri mahkhang Ijiprü tsingrang müpehcho. Ihnü arüh khyang Ijip la tsü I rihlong müdhesohnyücho.

⁹Ta arüh sako lirü apüm bete Ihnü Ijip lanü Israel tsü nüchehnungepü yocho khu, I neng amütsa thsakhang mütsapü Ihnü hütsüta münguchicho.

¹⁰“Hütsünü Ihnü arüh Ijip lanü lipilih lang nüchehcho.

¹¹Sünü I yuzeng bichinang akang ngunung nengdang, Ihnü arüh khyang I amülaba jücho ko I yuzeng docho.

¹²Sabath mungba tsünü Ihsa kahla amüdhethsa khüdu, ko Ih, ABÜDONGBAnü arüh müsa kangsohcho müdhesohnung Ihnü külüpjücho.

¹³Ta lipilih la mii arühnü Ih mükhimüngucho. Arühnü Ih amülaba thsangnyangcho, ko I yuzeng nyirü akang linung yocho arühnü mükhyüchocho. Arühnü khüdupinü Sabath nyümong tsü münyijücho. Ihnü hütsüba lipilih la tsünü arüh khyang I rihlong müdhesoh arüh changjünung lümcho.

¹⁴Ta, Ihnü Ijip lanü Israelrü nücheh nguba yuchoti te I neng amütsa thsakhang mütsapü hütsü münguchicho.

¹⁵Hütsünü Ihnü arüh khyang jüba nyikih ko thsakukih pohba lih lang tsü arüh münowünung lipilih la anyengchotaba khüdu külüpcho.

¹⁶Ihnü anyengchotaba tsü külüpcho, tunüo arühnü I amülaba mükhyücho, I yuzeng thsangnyangcho ko Sabath münyijücho, ko arühnü arüh yo kyothri du mübünyücho.

¹⁷“Ta Ihnü arüh müi lümcho. Arüh hütsü lipilih la arüh mükyüsehnung dhrongchehcho.

¹⁸Hütsü mülih, Ihnü arüh yola kunuti te müzahsoh yocho: Nührünü nührü jümürünü külüpcho yuzeng tüyohbü; arüh yah tüithsa mahkhang arüh kyothrinü nührübürü tümünyisoh.

¹⁹Ih ABÜDONGBA nührü Tsingrang. I yuzeng ko amülaba bichieng.

²⁰Ihsanü külüpba azengchotaba amüdhethsa yohpünung nengdang, Sabath müsa yohpüng, ko hütsü Ih, ABÜDONGBA nührü Tsingrangepü nührünü müdhenung.

²¹“Ta hütsüba shang nüsü Ih mükhimüngucho. I yuzeng bichirü khyang akang jüba yuzeng arühnü thsangnyangko ko I amülaba mübichi. Arühnü Sabath münyijüko. Ihnü lipilih la tsünü arüh khyang I rihlong müdhesoh arüh apüm kyüsehnyücho.

²²Ta Ijip lanü Ihnü Israelrü nüchehcho nguba yuchoti yola I neng amütsa thsakhang mütsapü Ihnü münguchicho.

²³Achotsü Ihnü lipilih la apa khüdu nyengchocho. Ihnü arüh lihküp la shupishuzasohnung yuchümcho.

²⁴Arühnü Ih amülaba mükhyücho, I yuzeng thsangnyangcho, Sabath münyijücho ko arüh jümürünü dikehba kyothri du tsü mübüchonü Ihnü hi nguchicho.

²⁵“Hütsüde Ihnü arüh khyang amütsa yuzeng jücho ko akang müjüba amülaba jücho.

²⁶Arühbürü amübünü arüh münyisohcho ko arüh tsurü aukhuba kangmübü jüsohcho. Hütsü arüh khingchinung ko Ih, ABÜDONGBA müdhesohnung nguchicho.

²⁷“Hütsüeko ade, nyitsarü tsurü, Ih, Amichahba ABÜDONGBAnü Israel te yoba yu hi arüh te young. Hi arüh tsurünü I te yuje müchonü Ih müthsamünyücho lalingba khüdu lile.

²⁸Ihnü anyengchocho lih la arüh norocho. Khode arühnü akhang athseng singdong adhülüm ngucho, hütsüri apüm khyang arühnü kangmübü jücho. Arühnü trüpba kangmübü ko yongkha amübü hirochonü I zichürosohcho.

²⁹Ihnü arüh te tsingdhengcho: Nührü wüba akhang athsengthseng hi tuo? Hütsütinü arüh te ‘Akhang Athseng’ pü dsicho.

³⁰Ade Israelrü te Ih, Amichahba ABÜDONGBAnü yocho yu tsü young: Tuepü nührünü nührü tpurünü nguchiba amünyi nguchiro ko kyothri yang shangro?

³¹Chünye mii amübü jiyü jonü michang la nührü tsuzarü kangmübü jo nührü jangjang münyiro? Hütsüpü nührü Israelrünü I lümcho tsingdhengnung rore. Ih, Amichahba ABÜDONGBA akang linü, Ihnü nührü khyang I te tu mütsingdhengsohnung.

³²Nührünü aparü yucho kyo, aparü yucho la lirü kyo singlung mübünung dhrongchehko. Ta hütsü roh-i khodesü müthsanung.

³³“Ih, Amichahba ABÜDONGBA akang linü, Ihnü nührü michah I rihlong I kheh tasenü ko I zii apümnü yangthsa thsanung.

³⁴Ihnü nührü shupishuza licho yuchoti apüm lanü nührü nübülungde, nührü te I zii ko rihlong ngusohnung.

³⁵Ihnü nührü ‘Yuchoti Lipilih’ ko hütsüla Ihnü nührü romih te mülangjünung.

³⁶Ihnü Sinai lipilih la nührü tpurü mülangjücho kyo, ade Ihnü nührü mülangjünung,” Amichahba ABÜDONGBAnü choko.

³⁷“Ihnü nührü drengdreng rahsehnung ko azengchotaba bichisohnung.

³⁸Ihnü nührü yolanü anyümrü ko münyirüti nükhunung. Arüh ade liyaba lih lanü Ihnü arüh nücheh tsinung ko Ihnü arüh Israel lih lang müthalisohnung. Hütsüde Ih, ABÜDONGBA nührünü müdhenung.”

³⁹Amichahba ABÜDONGBAnü yore, “Ko ade, nührü Israelrü apüm, wüng ko nührü kyothri mübüng! Ta hütsü khanglang nührünü I yu nyinung ko nührü kyothri khyang jiyü mübü jo I Amüsa neng tümünyijü pü Ihnü nührü müzahsohre.

⁴⁰Hütsüba lih la, Amüsa zong chah, Israel azong athsenguba chah, nührü Israelrü apümnü Ih mübünung. Ihnü nührü te künyangnung ko nührünü kangmübü, amübü atsauba ko nührü amüsa jiyü hironung longdinung.

⁴¹Nührü shupishuza liba yuchoti lanü Ihnü nührü nücheh müjang nübülungpü, nührünü trüpcho kangmübü tsü Ihnü khyüchonung ko yuchotinü Ih amüsaba müdhenung.

⁴²Ihnü nührü jümürü te nyengchocho lih Israel lang nührü thali noroko khanglang du, Ih, ABÜDONGBA nührünü müdhenung.

⁴³Hütsüde nührünü ashahnung nguchi nührübürü münyicho apüm tsü lümchehnung. Nührünü nguchicho amütsa apüm nengdang nührübürünü nührü thrünyinung.

⁴⁴Ihnü I jengreng tsungtinung müküpde, nührü Israelrünü Ih ABÜDONGBA müdhenung, tunüo Ihnü nührü akhürah ko nguchi amütsa aleng mükhang.” Amichahba ABÜDONGBAnü choko.

⁴⁵ABÜDONGBAnü I te chota yocho.

⁴⁶“Nyitsarü tsurü, kihjinglang dheng. Kihjinglang nyüm choung ko kihjing mürong nyüm choung.

⁴⁷Kihjing lahpi mürong te tsü Ih Amichahba ABÜDONGBA yu nyinung young: Dheng! Ihnü michang thsürangre ko hütsünü nü chah sing axeng nye asücho nye apüm trüp-pehnung. Tunüsü hütsü mümehchehsohnung. Hütsü kihjing langnü kihkulang chii trüp wünung ko mihmüle tsü atümungnü müdhenung.

⁴⁸Hütsü michang Ih, ABÜDONGBAnü thsürang trüpsohre ko hütsü sünüsü mümehchehsohcho arühnü müdhenung.”

⁴⁹Ta Ihnü thsonglicho, “Amichahba ABÜDONGBA, hütsü I khyang tünguchisoh! Ihnü lede yukita la chorepü apümnü mükünyangre.”