Read Sangtam Naga EZEKIEL 21 Bible Online

EZEKIEL 21 - Sangtam Naga bible

EZEKIEL 21

¹ABÜDONGBAnü I te chota yocho.

²“Nyitsarü tsurü,” “Jerusalem mülangjüng. Müyurünü mübüba müdümti mülangjüng.

³Ih, ABÜDONGBAnü hita yorepü Israel lih te müzahsohng: Ih nührü rorüh. Ihnü I nohsheng tohcheh nührü amüsarü ko amünyirü apüm kyüsehnung.

⁴Ihnü kihjingnü kihku chii nyitsarü apüm nyüm I nohsheng bichinung.

⁵Ih, ABÜDONGBAnü nohsheng tsü tohchehko ko hütsü thali müyohnungepü atümungnü müdhenung.

⁶“Nyitsarü tsurü, nü lasih thsangnyang lümtrücho tsirü kyo rühching. Apümnü ngunung la longri rühching.

⁷Nüh tuepü rühchiropü arühnü tsingdhengkhang, aroba yusi khu nührünü laling. Khode hütsü ronang, adrünü arüh lasih jengnung, arüh kheh tsingkehpehnung, arüh suhzahnung, ko arüh mükhong lahkehtanung. Becho tsü chihko; hütsü hila lile.” Amichahba ABÜDONGBAnü choko.

⁸ABÜDONGBAnü I te yocho,

⁹“Nyitsarü tsurü, choyohng. Ih, ABÜDONGBAnü tu yoro hütsü müyurü te young: “Nohsheng, nohsheng khüdu xengchehko ko sehko.

¹⁰Hütsü akyüsehnung xengchehko, ningmüla kyo mülanung sehko. Hütsüla akünyangta mülipehnung, tunüo müzahsohcho ko akhingchi apüm I müyurünü mükhichi.

¹¹Nohsheng tsü sehyale, bichinung rungnümre. Hütsü zachehko ko sehko, akyüsehrü khehla yohjünung.

¹²Longri züdeing, nyitsarü tsurü; hiba nohsheng hi I müyurü ko Israel langnürü apüm nengdang lile. Arüh kyüsehnung I müyurü apüm yola. Nührü dreng hamching.

¹³Ihnü I müyurü thsatsüre, arühnü lasih müthsamülakhang, hiri apüm arüh chah tikehnung.

¹⁴“Nyitsarü tsurü, ade choyohng. Nü kheh tang, ko nohsheng tsünü thali-thali kyühnung. Hi akyüsehba nohsheng, nehsoh kyüsehba nohsheng.

¹⁵Hinü I müyurü suhzahsoh ko müthikehsohre. Ihnü arüh yangditi ningmüla kyo mülachiba ko kyüsehnung rungnüm liba nohshengnü drüsohre.

¹⁶Tsalang fülilang kyüng, nüh akoh nohsheng! Nüh ximülacho apümlang kyüng.

¹⁷Ihnüsü I kheh tangnung, ko I zichürocho nyehlinung. Ih, ABÜDONGBAnü choko.”

¹⁸ABÜDONGBAnü I te chota yocho,

¹⁹“Nyitsarü tsurü, Babylon Yangthsaba anohsheng bipü ronung lang anyüh amüdhethsa yohpüng. anyüding tsü limih khüdu la dunü shemüsunung. Lang tsü khüde tsirünang amüdhethsa khüdu thongu yohpüjüng.

²⁰Khüdunü Yangthsaba te Amonrü Raba yangdi thongunung, ko akhüunü Juda lang, lungtbü Jerusalem yangdi thongunung.

²¹Babylon Yangthsaba lang amüdhethsa thonguba te tsü yanung. Khüiba lang lahpi tsinung müdhenung, abinü tbüdeng tsü shühchinung; abinü abi kyothri te kihtanung; abinü kangmübü jüba kanglungrü lasih tsü müchehnung.

²²Ade! Akheh tsalangnü ‘Jerusalem’ lahpi thonguba tbüdeng tsü marehnung. Hütsünü abi te wünung yonung ko tbü map-phohnung külüpnung, khata züdenung, tbükhüm chah ngakeh tbü map-phohsing yohpünung, alih müjung sühnung ko threhju junung.

²³Jerusalemrünü hi müyudsinung, tunüo arühnü yangtsa külüp lile. Ta hiba müngucheh yu tsünü arüh münyi lümchehsohnung ko arüh kohchehnung arüh müzahsohnung nengdang licho.

²⁴Hütsükhang hi Ih, Amichahba ABÜDONGBAnü yoba tsü linung: Nührü münyi mishako. Atümungnü nührü mülangcho müdhele. Nührü münyi tsü nührü nguchi la ngusohre. Nührü mülangpehko ko Ihnü nührü rorüh khehla jünung.

²⁵“Nüh akhürah, amümüsa Israelrü yangthsarü, nü nyümong, nüh achangka akhingchi nyümong tsehle.

²⁶Ih, Amichahba ABÜDONGBAnü choko. Nührü Yangthsaba kuthri ko thahyühji khyüchehng. Tusü thali akyokyo mülinung. Ailümrü khyang tase jo dhimüsung! Yangthsarüti tsü nüchoung!

²⁷Athsangnyang, athsangnyang! Ho, Ihnü yangdi tsü thsangnyangsohnung. Ta hiba yangdi khingchisohnung Ihnü throchehba tsü mürode, hi mütikehnung. Hütsüpü Ihnü hütsü abi khyang jünung.

²⁸“Nyitsarü tsurü, choyohng. Israel müthsamünyürü Amonrü te Ih, Amichahba ABÜDONGBAnü tu yoro hütsü young. Arüh te hita young: “Changjünung nohsheng khüdu rungnüm lile; Hütsü kyüsehnung sehko, ningmüla kyo mülanung.

²⁹Nührünü nguba müngucheh tsü amükang ko nührünü choyohba tsü arahkheh. Nührü akhürah ko amünyi ko nührü nyümong, nührü achangka nyümong tsü chihle. Nohsheng tsü nührü hong la longkehnung thsako.

³⁰“Nohsheng tsü zahkehng! Ihnü nührü thriba müdüm la ko nührü suroba lih la nührü yukhanung.

³¹Ihnü I rihlong chüroba nührü chah michang kyo mükhakehjüde nührünü müdhenung. Ko Ihnü achangjürü axangchehrü khehla nührü jünung.

³²Nührü michangnü nührü changnung. Nührü shüh nührübürü lih la threhnung ko adelü sünüsü nührü mülümkehnung.” ABÜDONGBAnü choko.