Read Sangtam Naga EZEKIEL 22 Bible Online

EZEKIEL 22 - Sangtam Naga bible

EZEKIEL 22

¹ABÜDONGBAnü I te chota yocho.

²“Nyitsarü tsurü,” “amapsehrünü jeng liba yangdi tsü yukhanung nüh rungnüm mülio? Abükyünü nguchicho athrünyinung nguchiti apüm abükyü te tsitsa young.

³Yangdi te tsü Ih, Amichahba ABÜDONGBAnü yocho yu young: Nührünü nührübürü nyitsarü hütsüdoi kyüseh lichonü ko kyothri mübo nührübürü münyichonü, nührü becho chihko.

⁴Hütsüri amapsehrü ko nührübürü külüpcho kyothrinü münyichonü, nührü becho chihko, nührü nyümong khuko! Hütsünü yucho apüm khyang nührü müthsamünyüsohcho ko yucho apümnü nührü münyodhengsohcho.

⁵Nührünü yuzeng layürachonü, ashu ko amünyeh la liba yuchotinü nührü münyodhengnung.

⁶Israel langnürüti apümnü arühbürü re la longlangre ko kyüsehre.

⁷Yangdi la sünüsü tpurü khyang jengreng müjüre. Shuparü kihyochüre ko chomilarü ko mürürü nganglangnü thsatsa khyüre.

⁸Nührünü amüsa müdüm mükhichire ko Sabath müyohpüre.

⁹Nührü nyitsarü khürünü aparü süsohnung arahkeh chore. Arüh khürünü kyothri khyang kangmübü jücho tsure. Khürünü lede arüh mükhyahmürah la longnyüpre.

¹⁰Khürünü au nitpürü te yüpre. Khürünü khingkurü arüh ayah pii bekhyah mii khing mükhongre.

¹¹Khürünü nahtrahnaxengre, ko aparünü arüh tsunyahlarü mahkhang atpa-thsatpü tsularü te mükhongre.

¹²Khürünü shühkhatohnung pohsa khyüre. Khürünü ajünirü Israelrü khyang thsi nyajücho la ajehyoh khyonü arüh alirü kangre. Arühnü Ih nbüchopehko.” Amichahba ABÜDONGBAnü choko.

¹³“Ihnü nührü fühkhohrü ko amapsehrü michah I kheh thahnung.

¹⁴Ihnü nührü khingchide, nührü chah re nying linung mah-o? Mahkhang nührü kheh mii dhimüsuchehnung do? Ih, ABÜDONGBAnü choko ko Ihnü I yu yohpünung.

¹⁵Ihnü nührü nyitsarü yucho ko yanglih apümlang shupehnung ko nührü nguchi amütsa changkajünung.

¹⁶Hütsüta aparü yuchotinü nührü mükhimüngunung, ta nührünü Ih, Amichahba ABÜDONGBAepü müdhenung.”

¹⁷ABÜDONGBAnü I te yocho,

¹⁸“Nyitsarü tsurü, Israelrü tsü I nengdang tu athsütah müle. Arüh tsü michang lanü taripi tahcheh khyüpü apehcho idhse, imüyeng ko iichüh kyo lile.

¹⁹Hütsünü ade, Ih, Amichahba ABÜDONGBAnü arüh tsü hütsü kyo akhyüchah mülepü yore.

²⁰Taripi, imüyeng, idhse ko iichüh apüm müthsengcheh khyübülungcho kyo, Ihnü arüh apüm Jerusalem la nübülungnung. Michangnü idhse shenahcho kyo, I zii ko rihlongnü arüh changjünung.

²¹Ho, Ihnü arüh Jerusalem la nübülungnung, arüh yonglang michang thsanung ko I rihlongnü arüh changjünung.

²²Michang la taripi shenahcho kyo, Jerusalem la arüh changnung, hütsüde arühnü ABÜDONGBA rihlong chürolepü müdhenung.”

²³ABÜDONGBAnü I te thali chotacho.

²⁴Abinü yocho, “Nyitsarü tsurü,” “Israelrü te arüh lih tsü mümüsa, hütsünü Ihnü hütsü I rihlong chüro khingchirepü young.

²⁵Langnürüti tsü kihkhünyingnü shuh mükahseh yohpüpü rengcho kyole. Arühnü nyitsarü kyüsehrü, thsi ko kuthsi khyüjürü, ko arühnü kyüsehcho khu chomilarü adrong kangsohre.

²⁶Bebürünü I yuzeng thsangnyangre ko amüsa tsü mükhichire. Arühnü Amüsa ko amünyi tu papa mübichire. Arühnü amüsa ko amümüsa kohro papa nengdang müdore ko Sabath mükhichire. Hütsüta Israelrünü I jengreng müdrüre.

²⁷Thsazirüti tsü rangfünü kanglungrü mükahseh rehnahcho kyole. Arühnü alirü kangnung nengdang bürü mapsehre.

²⁸Nyitsarünü züdi athrunü münohcho kyo, azikehrünü arüh münyi rangre. Arühnü arahkheh müngucheh ngure ko arahkheh choyohre. Arühnü Amichahba ABÜDONGBA yu chorepü yore, ta Ih, ABÜDONGBAnü arüh te müchota.

²⁹Alirünü kihyochüre ko kengchore. Arühnü ailümrü mükhimüchore ko shuparü michah thsanyücho thsare.

³⁰Ihnü nyitsarü khürü sünü tbü khüdu külüpchehnung, sünü tbü trümnahcho müdüm la tsü yachehnung ko I rihlong chüro hütsü thsangnyangjünung thsade tsungtichehnung, hitari yangchire, ta Ihnü hütsütari müngure.

³¹Hütsünü Ihnü arüh chah I rihlong chürore ko arüh nguchi ngang michangnü kyo Ihnü arüh changjünung.” Amichahba ABÜDONGBAnü choko.