Read Sangtam Naga EZEKIEL 23 Bible Online

EZEKIEL 23 - Sangtam Naga bible

EZEKIEL 23

²“Nyitsarü tsurü,” “khüdupi afü-ani anyüh licho.

³Anyüh Ijip la azarüthsa lide, arüh akang thsangnyangcho ko nahtrahnaxenglarü kangcho.

⁴Azitpü neng Ohola (abükyü tsü Samaria mülih) ko azatpü neng Oholiba (Jerusalem mülih) licho. Ihnü anyüding khyücho ko anyünü I khyang azarü nümüsujücho.

⁵Abükyü tsü I nitpü thsanye, Oholanü mütozah nahtrahnaxengcho ko Assyria lanü amüyangrü dee mükhyah licho.

⁶Arüh tsü anyahrüm rothsarü jengki la licho, azirü ko adirü licho; arüh atümung pümtrung atsa ko kuri rothsarü michah anüchirüti licho.

⁷Abükyü tsü Assyriarü adirüti atümung nengdang shutsa-ilarü licho, ko abükyü mükhyahmürahnü Assyriarü kyothri mübo abükyü münyicho.

⁸Abükyünü Ijip la abükyü akang thsangnyang nahtrahnaxeng dikehba tsü mütozah nguchicho.

⁹Hütsünü Ihnü abükyünü mükhyahba Assyriarü abükyünü müibarü khehla jücho.

¹⁰Arühnü abükyü shü khohpehjücho, abükyü tsuzarü rangcho ko abükyü tsü nohshengnü kyüsehcho. Apümlang khingkurütinü abükyü nengdang chocho.

¹¹“Ani Oholibanü hütsü nguh nye, abükyü tsü Ohola tenü alaa amütsauba nahtrahnaxenglarü thsacho.

¹²Abükyünü Assyriarü azirü, adirü rothsarüti jengki avisa la lirü ko kuri rothsarü michah anüchirüti, hütsüri nyükheh atsa dhrezarüti tsü dira mükhyahcho.

¹³Abükyü tsü khüdupinü mabomashi Ihnü ngucho, hütsüta ani tsü afü tenü amütsauba thsacho.

¹⁴“Abükyü mabomashi la amütsau kangcho. Abükyü tsü Babylon adirü kyothri züdi la xangyohcho, amohnü tonü, shünü kihrümpü arüh thah la shünü yühpü, hiri tsünü dira müshülicho.

¹⁵

¹⁶Abükyünü arüh ngudu dira mükhyahpehcho ko Babylon lang arüh yang yusi hirü müthehcho.

¹⁷Babylonrünü abükyü te mükhongnung rocho. Arühnü abükyü bichicho ko dira münyijüchonü achangka lalü abükyünü arüh thrünyipehcho.

¹⁸Abükyünü mishanü abükyü tsü shutsa-irüepü atümung khyang müdhesohcho. Ihnü afü te kyo abükyü tesü thrünyita kangcho.

¹⁹Abükyünü alaa amütsau laza bekhyah Ijip la nahtrahnaxengde kyo mabomashi kangcho.

²⁰Kuri ko gadu zabongzatanyücho kyo, abükyünü adhrerü alaa mükhyahcho.”

²¹(Oholiba, nüh lazade, Ijip la adhrerünü nü mama te shaja ko nü kang thsangnyangba mabomashi nguchi tsü nühnü thali nguchinyüre.)

²²“Hütsüeko ade, Oholiba, Ih, Amichahba ABÜDONGBAnü nü te hi yore. Nüh hütsüri nü müirütinü müthohko, ta Ihnü arüh zichürosoh ro nüh mükangtisohnung.

²³Ihnü Babylonrü ko Khaldearü, Pekod, Shoa, ko Koa lanü nyitsarüti ko Assyriarü apüm noronung. Ihnü hütsüri nyükheh atsa azirü ko adirüti, ayingthsarü adirüti ko Kuri rothsarü michah anüchirüti apüm nübülungnung.

²⁴Arühnü kihku langnü kuri kari ko kari chahnü rothsarü khütang noro nüh mahnung. Arühnü tsung bipü ko idhse kuthri thripü ronü mükangtinung. Ihnü nüh arüh khehla jünung ko arühnü arüh yuzengnü nüh yukhanung.

²⁵Ih nü te zichürochonü, arüh rihlong chüro khingchisohnung Ihnü nührü arüh khyang jünung. Arühnü nührü nabong ko nangku tsehpehjünung ko nührü tsuzarü kyüsehnung. Ho, arühnü nührü tsurü ko tsularü nowü akangnü michang la trüpnung.

²⁶Arühnü nührü jengki rehnahjünung ko nührü thsidilung khyüjünung.

²⁷Ihnü nührü mükhyahmürah zahsohnung ko nührü Ijip la lidenü bichi roba mabomashi nyehlisohnung. Nührünü adelü kyothri nengdang mülümnung mahkhang adelü Ijip nengdang tu mülümchinung.”

²⁸Amichahba ABÜDONGBAnü hita yore: “Nührünü thrünyirü khehla Ihnü nührü jünung.

²⁹Ko arühnü nührü thrünyichonü, nührü tbhüdeng nahtrahnaxenglarü kyo pehjüpü nührünü nguchichehcho lüpcho hitsijünung.

³⁰Nührü mükhyahmürah ko nahtrahnaxengnü nührü chah hi tikehnung. Yuchoti nengdang nührü nahtrahnaxenglarü thsacho ko arüh kyothri khu nührü münyicho.

³¹Nühnü nühfü jingdrang la tsehcho, hütsünü Ihnü hütsü akyokyo akhingchi shing tsü nü khyang tinung.”

³²Amichahba ABÜDONGBAnü yore, “Nühnü nühfü shing lanü yongnung; hütsü amülah ko asoh. Atümungnü nüh yübünung ko nüh müthsamünyünung; shing tsü jeng lile.

³³Hütsünü nüh chongchasohnung ko müchasohnung, hütsüba adrüba ko athsangnyang shing, nühfü Samaria shing.

³⁴Nühnü yongnung ko hütsü kungpehnung, ko hütsü amapnahcho tsünü nü mama thsangnyangsohnung. Ih, Amichahba ABÜDONGBAnü choko.”

³⁵Ade Amichahba ABÜDONGBAnü hita yore: “Nühnü Ih nbüchüchonü ko I lahpi nü khang pichonü, nüh mükhyahmürah ko nahtrahnaxengcho ngang nüh chongchanung.”

³⁶ABÜDONGBAnü I te yocho, “Nyitsarü tsurü, Ohola ko Oholiba nyüh yukhanung nüh rungnüm mülio? anyünü athrünyinung nguchi nguchicho ngang, anyüh mülangjüng.

³⁷anyünü nahtrahnaxengko ko mapsehko, kyothri te nahtrahnaxengko ko I khyang nümüsujücho tsuzarü mapsehko. anyünü I tsuzarüti arüh tsingrang khyang kangmübü jüko.

³⁸Ko anyünü nguchiba tsü hütsü du mah. Arühnü I amübükuh münyijüko ko Ihnü müsachehcho Sabath thsangnyangko.

³⁹anyünü I tsuzarü arüh kyothri khyang kangmübü jünung kyüseh nyümong tsü anyünü I Amübükuh lang ro hütsü münyijücho.

⁴⁰“Ashu lanü nyitsarü dsiyohnung arühnü yusi hirü loli loli müthehcho, ko nyitsarüti tsü rocho. Afüe ani nyühnü tsehkhucho ko nah la tonü thsidilung jengkicho.

⁴¹Arühnü chongnong atsah atsa chah pümrü, ko arüh bete Ihnü jücho müchiji ko olive tuji zeh kohro atsanü tsingthsang khüdu khyangti yohpücho.

⁴²Amürahsehrü mülung khüdu khongtacho yuva khüdu yuchicho, lipilih langnü norocho adhrerü mülung khüdu. Arühnü khingkurü bipüm la khehmüyang sehsohcho ko arüh thah chah kuthri thrijücho.

⁴³Ko Ihnü lümcho, nahtrahnaxengrünü bichi threhcho khingkurü khüdu te arühnü mabomashile.

⁴⁴Arühnü hiri mabomashilarü chah loli loli wücho. Arühnü mabomashilarü Ohola ko Oholiba nyüh yanglang thali züducho.

⁴⁵Arüh tsü nahtrahnaxeng ko mapsehchonü amüsarünü arüh mülangjünung, tunüo arühnü nahtrahnaxeng bichire ko arüh kheh chah ashüh kehle.”

⁴⁶Amichahba ABÜDONGBAnü hita yore: “Arüh khingchisohnung ko kengchosohnung mülung khüdu chürosohnung.

⁴⁷Amülung tsünü arüh chah lungnü kengsohnung ko nohshengnü arüh mahnung, arüh tsuzarü kyüsehsohnung ko arüh kushirü trüp-pehjünung.

⁴⁸Ko anyünü nahtrahnaxengcho roh-i khingkurü müipi münguchisohnung amüzahnung khüdu roh-i, limih apümlang Ihnü amümüsa nguchi yatinung.

⁴⁹Ko nühjü jüninyü, nühjü mabomashi nguchi ko kyothri mübücho nengdang Ihnü nühjü khingchinung. Hütsüde nührünü Ih Amichahba ABÜDONGBA müdhenung.”