Read Sangtam Naga EZEKIEL 24 Bible Online

EZEKIEL 24 - Sangtam Naga bible

EZEKIEL 24

¹Ihrü yangtsi la licho kang düku, choo dhüre ko nyümong dhüreu la, ABÜDONGBAnü I te chotacho.

²Abinü yocho, “Nyitsarü tsurü, chünye nyümong thrahng, tunüo hiba nyümong Babylon Yangthsabanü Jerusalem khyünung dikehcho.

³I nyümrü nyitsarü hiri te, Ih, Amichahba ABÜDONGBAnü arüh khyang yukitaba hi lilepü young: “Michang chah füh tsü dhikehng, ko hütsü kihnü jengsohng.

⁴Hütsüla shuh atsati yohng apünurü ko ajing shuh athrochehcho arühti hütsüla yohng.

⁵San atsauba khyüng; füh pohki sing tsü zang bhüm. Kih tsü tsüchisohng; arüh ko ashutsa tsü ngüpm.”

⁶Amichahba ABÜDONGBAnü hita yore: “Amapsehrü yangdi tsü ahohah! Hütsü khodesü müthsüthohcho dhrong tsukehcho füh kyole. Shudsi khüdu khüdunü khyüchehko, ko khüdusü münying.

⁷Yangdi la tsü amapsehrü licho, ta lihwünü phetinungthsa alih la ashüh tsü mükhadoh; hütsü lung michah khatohcho.

⁸Hütsü mümüyümkhohnung ko zichüro rühyangnungthsa, Ihnü ashüh tsü hütsüla pehjücho.”

⁹Amichahba ABÜDONGBAnü hita yore: “Amapsehrü yangdi tsü ahohah! Ipunü sing khangnung.

¹⁰Sing khü hirung! Michang tsü mehching! Shuh tsü chong! Hikih tsü tsüchisohng! Shurüh tsü trüp-pehng!

¹¹Ade imüyeng füh adeng tsü michüh chah tsü dhikehng ko hütsü hemohsohng.

¹²Hütsüde michang la tsü dhrong tsukehba tsü mütsünahkhangnye, hütsü trüp-pehkonülü füh tsü ayah müsa kangpehnung.

¹³Jerusalem, nührü mabomashi nguchinü nührü münyiko. Ihnü nührü müsachehjünung müküp nye, nührünü münyi du lire. I rihlong ajeng nührünü müthsatsüde, nührü thali müthseng mükangnung.

¹⁴Ih, Amichahba ABÜDONGBAnü choko. Ihnü nguchinung becho chihko. Ihnü nührü münyi layü pehnung mahkhang yanglilüm ko amüi ngusohnung mükoh. Nührü nguchi ngang nührü khingchinung.” Amichahba ABÜDONGBAnü choko.

¹⁵ABÜDONGBAnü I te chota yocho,

¹⁶“Nyitsarü tsurü,” “nühnü müthsüm liba nyüh khüdu tsü Ihnü khüdupi shingchonü khyümüipehnung. Nühnü longmüso mahkhang tra mahkhang nahshükih müthrehnung.

¹⁷Nüh küthuseh tracho tsü tüyuchisoh. Nü longricho müdhesohnung thah mümüshüpü mahkhang jingshühnü tüwü. Nü romih tümüshü mahkhang meshü tsang tütsu.”

¹⁸Anyangnyü mütoh Ihnü müyurü te chotacho. Hütsü anyüzehlang I nitpü sücho, ko nyümong khüu I te yocho kyo Ihnü nguchicho.

¹⁹Müyurünü I te tsingdhengcho, “Tuepü nühnü hiroh-i nguchiro?”

²⁰Hütsünü Ihnü arüh te yocho, “ABÜDONGBAnü I te chotacho ko nührü Israel te yusi hi yonung I te yocho:

²¹Nührünü Amübükuh tase la müthsehre. Nührünü hütsü thrünyire ko xodhengnyüre, ta ABÜDONGBAnü hütsü münyijünung. Ko Jerusalem la nying lirü, nührü kukhiti la kunu khiyohti tsü khata la kyüsehnung.

²²Hütsüde Ihnü nguchiba tsü nührünü nguchinung. Nührünü nührü romih mümüshünung mahkhang meshü tsang mütsunung.

²³Nührünü ku mümüshüpü mahkhang jingshüpü müwünung mahkhang me müshünung mahkhang mütranung. Nührü münyi ngang nührü changpehnung, ko nührü khüdunü khüdu nengdang rühchinung.

²⁴Hütsüde Ih nührü nengdang amüdhethsa linung; ko Ihnü nguchicho lüpcho nührünü ngunung. Hi tikehde nührünü Ih, ABÜDONGBA lilepü müdhenung Abinü yore.”

²⁵ABÜDONGBAnü yocho, “Ade, Nyitsarü tsurü, Ihnü arüh tenü, arüh akünyang ko müthsehba, arühnü dhengnyüba ko xodhengnyüba akhümkhüm Amübükuh tsü hitsinung. Ko Ihnü arüh tsurü ko tsularüti hitsinung.

²⁶Ihnü hi nguchi nyümong, achangba lanü tsichehrü khürünü ro hütsü nengdang yonung.

²⁷Hütsü nyümong achahba yuchonung zii tsü nührünü thali ngunung, ko nührünü abi te chotanung. Hiroh-i müyurü nengdang nüh amüdhethsa linung ko arühnü Ih, ABÜDONGBA müdhenung.”