Read Sangtam Naga EZEKIEL 25 Bible Online

EZEKIEL 25 - Sangtam Naga bible

EZEKIEL 25

¹ABÜDONGBAnü I te chota yocho,

²“Nyitsarü tsurü,” Amon yucho mülangjüng.

³Ih, Amichahba ABÜDONGBA yu nyinung arüh te young: I Amübükuh münyicho ngu ko Judarü yangtsilang wücho ngu nührü künyangcho.

⁴Nührü künyangchonü nyüchürolang lirü yuchoti khyang nührü mahsohnung. Arühnü nührü lih la müdong hütsüla lipehnung. Nührü yo thsanung liba singsih tsü arühnü tsunung ko nyikih arühnü yongnung.

⁵Ihnü Raba yangdi tsü ut yohpüji müdüm kangsohnung, ko Amon yucho apüm san yohpüji kangsohnung, hütsüpü du nührünü Ih, ABÜDONGBAepü müdhenung.

⁶“Amichahba ABÜDONGBAnü hita yore: Akünyangnü nührü kheh tangko ko tsohchiko. Nührünü Israel lih mükhimünguko.

⁷Nührünü hütsüta nguchichonü, nührü kengchosohnung ko mahsohnung, ko yucho parü khehla Ihnü nührü jünung. Adelü nührü yucho khüdu kang mülinung mahkhang nührübürü yucho khüdu thsa mülisohnung ko Ihnü nührü riri changsohnung. Hütsüde nührünü Ih, ABÜDONGBAepü müdhenung.”

⁸Amichahba ABÜDONGBAnü yocho, “Juda tsü aparü yucho khüdu roh-i duepü Moabnü yochonü,

⁹Ihnü Moab lurü nyahrü yangditi yangdi atsauba Beth Jeshimoth, Baal Meon, ko Kiriathaim zeh mahsohnung.

¹⁰Ihnü nyüchürolang liba yuchoti khyang Amon zeh Moab mahsohnung, hütsünü du Moab tsü yucho khüdu kang mülinung.

¹¹Ihnü Moab khingchinung ko arühnü Ih, ABÜDONGBAepü müdhenung.”

¹²Amichahba ABÜDONGBAnü yocho, “Edomrünü Juda chah dee mütsa rühyangcho ko hütsüba rühyangba tsünü Edom chah müchangkaba mülang hirocho.

¹³Ade Ihnü Edom khingchinung ko hütsüla lirü nyitsarü ko kanglungrü apüm kyüsehnung züdere. Ihnü Teman yangdi lanü Dedan yangdi chii changsohnung ko müyurü tsü khata la süsohnung.

¹⁴I müyurü Israelrünü I nengdang Edom chah rühyangnung ko arühnü Edom khyang I rihlong müdhesohnung. I rühyangba tsü tu khütarünang Edomnü müdhenung.” Amichahba ABÜDONGBAnü choko.

¹⁵Amichahba ABÜDONGBAnü yocho, “Filistinrünü arüh jümü rorüh chah dee mütsa rühyangko ko arühnü thrünyinü arüh changjüko.

¹⁶Hütsünü Ihnü Filistinrü mahnung ko arüh changsohnung züdere. Ihnü Filistin Ngah la lirü anyingchoti apüm changjünung.

¹⁷Ihnü arüh khütang khingchinung ko arüh chah ajeng rühyangnung. Arühnü I rihlong müdhenung. Hütsüde arühnü Ih, ABÜDONGBA müdhenung.”