Read Sangtam Naga EZEKIEL 26 Bible Online

EZEKIEL 26 - Sangtam Naga bible

EZEKIEL 26

¹Ihrü yangtsi la licho kang dhüre-kheh, choo akhudiba nyümong la, ABÜDONGBAnü I te chotacho.

²Abinü yocho, “Nyitsarü tsurü,” “Tyre yangdi la lirü nyitsarütinü hi münyodhengcho. Arühnü züdecho, ‘Jerusalem nyangnyangle! Abükyü kuthsi zii changko! Adelü abükyü Ihsa rorüh müthsanung!’

³“Hütsüeko ade, Amichahba ABÜDONGBAnü hita yore: Tyre yangdi, Ih nü rorüh lile. Nüh mahnung Ihnü yucho adrong noronung ko arüh tsü kihdi kihloh kyo ronung.

⁴Arühnü nührü yangdi tbü ko nührü rosheng kuh thsangnyangjünung. Hütsüde Ihnü lung du pehjüpü asongsong apüm wohpehnung.

⁵Hütsüla kihdi la yaba lung chah tsü ngurangrünü arüh yojeh tbhünung. Ih Amichahba ABÜDONGBAnü choko.

⁶Yuchotinü Tyre mahnung ko arüh nohshengnü arüh angah la yangditi la lirü kyüsehnung. Hütsüde, Tyrenü Ih, ABÜDONGBAepü müdhenung.”

⁷Amichahba ABÜDONGBAnü yore: “Ihnü Yangthsarü adiuba Babylon Yangthsaba Tyre mahnung noronung. Abinü kihku langnü rothsarü khütang kuri, kuri kari ko kuri rothsarüti nüpü ronung.

⁸Angah yangditi la lirüti khata la kyüsehnung. Arorühnü threhju junung, alih bhümkehnung ko nührü nyüm tsungtinung tbü adrengdreng külüpnung.

⁹Arühnü nührü tbü chah tsü ashingsingnü shingnung ko nührü rosheng kuh tsü idhsedongnü tphahtsujünung.

¹⁰Arüh kuritinü lihwü dhrümchehba tsünü nührü phatinung. Arühnü achangcho tbükhümti lahkhu tside, arüh kuri kari ko kari yuvanü nührü tbü nyangnyangnung.

¹¹Arüh kuri chah pümrütinü arüh nohshengnü nührü nyitsarü kyüseh nührü yanglong sehcheh tsinung. Nührü adrengdreng dongditi alih la khülusohnung.

¹²Nührü rorünü nührü kuthsi arüh thsanyücho thsa woh tsinung. Arühnü nührü tbü tphahtsunung ko nührü kuh atsa tsü shühchijünung. Arühnü singlungrü ko tsangnyangba kohro apüm kihdi la zangyohchünung.

¹³Ihnü nührü khi ko honglilah yuva apüm zahsohnung.

¹⁴Ihnü ngurangrünü arüh yojeh tbhüba lung du nyingjünung. Yangdi tsü khodesü mükülüpchichehnung. Ih, ABÜDONGBAnü choko.”

¹⁵Amichahba ABÜDONGBAnü Tyre yangdi te hi yore: “Nührü mahchehde, akingthrümchoti rühchicho yuchi kihjüp lirüti drümüyangnung.

¹⁶Hütsüde kihjüp liba yangthsarüti arüh pümji lanü jüronung. Arühnü arüh fükhüm ko axücho jengki khohpehnung ko alih la dhridhri pümnung. Nührü suro ngu arüh dhridhriba tsü müzahnung.

¹⁷“Arühnü meshü khi hi nührü nengdang thsanung: Anengkhong yangdi tsü changko! Abükyü kihkuhti kihdi lanü müyehtsiko. Hiba yangdi la lirünü kihdi michah thsare, Ko kihjüp lirüti drümüyangsohcho.

¹⁸Ade hütsü khülu nyümong, mütroti dhridhrire, Ko hitari achangba ngu nehre.”

¹⁹Amichahba ABÜDONGBAnü yore: “Süsü müliba yangditi kyo Ihnü nührü changsohnung. Ihnü nührü kihjü kihnü mülümphasohnung.

²⁰Papade lirü yola zehsohnung Ihnü nührü asü lih lang züdusohnung. Ihnü nührü hütsüri asürü yola, achangka müli changpehba alih yonglang lirü yola nührü lisohnung. Hütsüta nührü akang lirü yola khodesü mülitpahnung.

²¹Ihnü nührü tsü adrünung adüzü kangsohnung ko nührü nengdang hütsü achangka thsanung. Nyitsarünü nührü yangchinung, ta khodesü müngunung.” Amichahba ABÜDONGBAnü choko.