Read Sangtam Naga EZEKIEL 27 Bible Online

EZEKIEL 27 - Sangtam Naga bible

EZEKIEL 27

¹ABÜDONGBAnü I te yocho,

²“Nyitsarü tsurü, kihdi bekhüm la yapü kihjüp lirü atümung te shithsabhüleh nguchiba Tyre yangdi meshü khi khüdu thsaang.

³Amichahba ABÜDONGBAnü tu yoro hütsü abükyü te young: “Tyre, nü tsah tsacho nengdang nühnü müthsehko.

⁴Nü kuh tsü kihdi. Atsah atsa kihkuh kyo nüh külüpko;

⁵Arühnü Hermon zong lanü Fir sing singtpah bichiko. Ko Lebanon lanü dongdi thsanung cedar sing khyücho.

⁶Arühnü Bashan lanü kihtangtbheng thsanung langsing khyücho; Arühnü Cyprus lanü kee singnü nü kihtangkuh külüpcho. Ko thsüro-hanü hütsü lüpticho.

⁷Nü akising tsü shünananü külüpko, Ijip lanü shünananü xüyohcho, ashu lanü tsitsa dhengchehcho. Nührü anüba shü tsü atsauba shünü, Cyprus mütro lanü anyahrüm shü.

⁸Nü kihtang nürüh tsü Sidon ko Arvad yangditi lanü, Anürü tsü nührübürü nyitsarü axangchehrü licho.

⁹Kihkuh thsarüti tsü Byblos lanü asithsa nyitsarü licho. kihkuh tsiba müipi la anürü tsü, nü aikuh la shithsabhülehcho.

¹⁰“Persia, Ledia ko Libya lanü rothsarütinü nü rothsarü yola dikehcho. Arüh tsung ko idhse kuthri nü tbü chah vihpücho. Nü khyang ahechi kohjüba tsü arühnü licho.

¹¹Arvad lanü rothsarünü nü tbü nyahjücho ko Gamadrünü nü roshengkuh nyahcho. Arühnü arüh tsung nü tbü chah vihpücho. Nü tsah tsasohba tsü arühnü lile.

¹²“Nühnü Spain la shithsabhüleh nguchicho ko nüyo kohro apisa ngang taripi, idhse, itpah ko ilü khyücho.

¹³Nühnü Greece, Tubal ko Meshek la shithsabhülehcho ko ayurü ko imüyeng kohro nengdang shithsacho.

¹⁴Nühnü nü kohro Beth Togarma lanü akungse la rachiba kuri, khata kuri ko gadu ngang jücho.

¹⁵Rodesrünü nü te shithsabhülehcho; kihjüp lirü adrongnü nü khyang nü kohro müli thsüro-ha ko ebony sing jücho.

¹⁶Syriarünü nü te shithsacho ko nü lih lanü chürocho adrong licho. Arühnü emerald lung, anyahrüm shü, ariyohcho, shü anana, koral ko thsidilung nü kohro te shithsatacho.

¹⁷Nü kohro mülih Judarü ko Israelrünü litoh, thsakukih, olive tuji ko axümlichi kohro jücho.

¹⁸Damaskasrünü nü kohro mülih Helbon lanü yongkha ko Sahar lanü shunbüh shünü mülitacho.

¹⁹Arühnü nührü kohro ngang idhse ko axümlichinü mülitacho.

²⁰Dedanrünü nührü kohro ngang kuri rung la khyangba shünü mülitacho.

²¹Arabrü ko Kedar yangthsarünü nührü kohro ngang sanza, san ko mizanü mülitacho.

²²Nührü kohro ngang Sheba ko Rama shithsabhülehrünü thsidilung, hon ko atsauba axümlichinü mülitacho.

²³Haran, Kanne, ko Eden yangditi, Sheba la shithsabhülehrü, Asshur ko Kilmad yangditi arüh apüm nü te shithsabhülecho.

²⁴Arühnü nü te shü angang athsah, anyahrüm shü ko axüyohcho, visa sehyahcho akhyangsing ko dee tsa sehyahcho ayo ko rangshü hiri nü te icho.

²⁵Nü shithsabhüleh tsü kohro hiba adiuba kihkuh chah hire. “Nüh kihdi la kihkuh, Khe amüling zangkehba kihkuh.

²⁶Kihdi lanü nü kihtang nührünü norode, Nyüchüro nyübongnü nüh alih lanü ashu fopehnung.

²⁷Nü shithsabhülehba kuthsi apüm, nü kihtang nürüh atümung, Nü kihkuh thsarü ko shithsarü, Kihkuh la züroba rothsarü apüm, Kihdi la apüm changko. Nü kihkuh thsangnyangde.

²⁸Athsangsehrü anüchirü yuvanü kihbekhüm lang tehkehjüre.

²⁹“Ade kihkuh apüm thsangnyangko, anürü apüm kihbekhüm lang tsipehko.

³⁰Apümnü nü nengdang dee metrako, arüh thah chah lihwü kangkeh ko tavi la suchi.

³¹Arühnü nü nengdang thah hehpehko, ko müyahshü müpiko. Arühnü trade arüh lasih rehnahcho.

³²Nü nengdang meshü khi thsacho: ‘Sünü Tyre te kihtachehnung, Tyrelü ade kihdi la nayingle.

³³Nü shithsabhülehrü kihdi khu wüde, Yucho apüm thsütah desahcho. Yangthsarüti alirü kangsohcho, nü kuthsi kohronü.

³⁴Adelü kihdi la nüh thsangnyangko; Nüh kihjü asoh la shohyoh lile. Nü kohro ko nü yola nguchirü apüm nü yola kihdi la chahko.’

³⁵“Nü suro ngu kihjüp lirü apüm nehcho. Arüh yangthsarütinü nehcho ko arüh romih la drücho tsah licho.

³⁶Nüh changko, lede nengdang changko, ko lihküp la shithsabhülehrütinü drücho ko nü müngu hi tikehnung arühnü drüre.”