Read Sangtam Naga EZEKIEL 28 Bible Online

EZEKIEL 28 - Sangtam Naga bible

EZEKIEL 28

¹ABÜDONGBAnü I te chota yocho,

²“Nyitsarü tsurü, Ih, Amichahba ABÜDONGBAnü yu hi Tyre Yangthsaba te yorepü young: Amüthsehnü jeng, nühnü nüh tsingrangbaepü yore. Kihdinü mükangtipü Tsingrangba kyo Yangthsaba pümji la pümcho nühnü yore. Nühnü Tsingrangba khüdu kyo lümnung kohle, ta, mah, nüh tsingrangrü mah, nyitsarü khüdu du lile.

³Nühnü nü tenü tu rang müyohpücheh, nüh Daniel tenü amüdheu-epü lümre.

⁴Nü lümlong ko amüdhenü nüh hon ko taripi khyübülung alirü kangcho.

⁵Nühnü dee sihthsa shithsabhüleh ajingcho külüpko. Nü kuthsi la nüh khüta amüthseh!

⁶“Hütsünü ade, Ih, Amichahba ABÜDONGBAnü hita yore: Nühnü nüh tsü tsingrang kyo lümzehlepü lümchonü,

⁷nüh mahnung Ihnü akurahrü arorüh norore. Nühnü nü lümlong ko sihthsanü khyübülungcho atsah atsa kohroti apüm thsangnyangjünung.

⁸Arühnü nüh kyüsehnung ko kih yonglang nüh müthehnung.

⁹Arühnü nüh kyüsehnung rode, hütsü yingcheh nüh tsü tsingrangepü nühnü yochehnung mah-o? Ta arüh kyüsehrü dhsükehde, nüh tsingrang mah, nyitsarü du linung.

¹⁰Nüh Tsingrangba mümüdherü shuparü khehla füza kyo sünung. Ih, Amichahba ABÜDONGBAnü yuzeng tsü jüko.”

¹¹ABÜDONGBAnü thali I te chota yocho,

¹²“Nyitsarü tsurü, Tyre Yangthsaba chah tikehnung liba müngu nengdang wahng. Abi te Ih, Amichahba ABÜDONGBAnü tu yoro hütsü young. Khüdupi nüh adekheng adüzüthsa licho. Nüh khüdoi lümlong ali ko pümtrung atsa licho!

¹³Nüh Tsingrangba tbü, Eden la licho ko thsidi kohroti lüpcho khyücho: rubies ko diamond; Topaz ko beryl, Karnelian ko Jasper; Safir, emerald ko karnet. Nüh hon jengki licho. Hütsüri tsü nüh külüp nyümong nü khyang thrijücho.

¹⁴Ihnü hütsüla nüh nyahnung adrünungkeh ninglang riwürü khüdu yohpücho. Nüh I amüsa zong chah licho ko ariri lung michah tsehchicho.

¹⁵Nüh thri nyümongnü nühnü amünyi nguchiba bekhyah chii nü saying adekheng thsacho.

¹⁶Nüh müpaseh shithsabhüleh licho ko hinü nü shühkhatoh ko amünyi langi nücho. Hütsünü Ihnü nüh I amüsa zong lanü iipehcho, ko nüh nyah liba ninglang riwüba tsünü nüh iipehcho.

¹⁷Nü pümtrung tsachonü nüh müthsehcho ko nü nengsenü nüh amüsithsa kangsohcho. Hütsü khu Ihnü nüh alih la khülusohcho ko aparü Yangthsarü nengdang adüzü kangsohcho.

¹⁸Nühnü lihcho ko icho la hitoh-i amünyi nguchi nü mübüji münyisohcho. Hütsünü Ihnü yangdi la michang thsürangjo hütsü alih la rongkeh trüpsohcho. Ade nüh dhengrü atümungnü nüh asongsong kangcho ngunung.

¹⁹Nüh changkako, lede nengdang kingkako, ko nüh müdhe rorüh yuchotinü nü müngu hi arüh chah tikehnung arühnü drüre.”

²⁰ABÜDONGBAnü I te yocho,

²¹“Nyitsarü tsurü, Sidon yangdi mülangjüng.

²²Arüh te Ih, Amichahba ABÜDONGBAnü arüh nengdang hita yoreding: Ih nü rorüh lile, Sidon; Ihnü nü chah nguchicho nengdang müyurünü Ih senung. Ihnü nü yola lirü khingchide, Ih, ABÜDONGBA khüdoi amüsa arühnü müdhenung.

²³Ihnü nü chah dhsara müthehnung ko nü yanglong la ashüh pohsohnung. Apümlangnü nüh betinung ko nü nyitsarüti kyüsehnung. Hütsüde nührünü Ih, ABÜDONGBAepü müdhenung.”

²⁴ABÜDONGBAnü yocho, “Israel mütsa bichiba mükangmüshü yuchoti tusü adelü Israel nengdang zeng mülinung. Ko arühnü Ih, ABÜDONGBAepü müdhenung.”

²⁵Amichahba ABÜDONGBAnü yocho, “Ihnü shuu pehba yuchoti lanü thali Israelrü noronung ko yuchoti apümnü Ih Amüsaba müdhenung. Israelrünü arühbürü lih, Ihnü I dikehrü Jakob khyang jüba lih la linung.

²⁶Arühnü kuh thsanung ko shükusih khyümnung. Arüh mütsa bichiba yuchoti Ihnü khingchinung ko Israel khümcho linung. Hütsüde arühnü Ih, ABÜDONGBA arüh Tsingrang müdhenung.”