Read Sangtam Naga EZEKIEL 29 Bible Online

EZEKIEL 29 - Sangtam Naga bible

EZEKIEL 29

¹Ihrü yangtsi la licho kang dhüreu, choo dhüre nyümong dhüre anyüu la, ABÜDONGBAnü I te chotacho.

²Abinü yocho, “Nyitsarü tsurü, Ijip Yangthsaba mülangjüng. Khüta abi ko Ijiprü apüm khingchinung hütsü abi te young.

³Amichahba ABÜDONGBAnü Ijip Yangthsaba te hita yoreding: Ih nü rorüh lile, nüh yongkhi la yüpjoba kijang kangdi. Nühnü Nile tsü nüyo ko hütsü nühnü külüpchoepü yore.

⁴Ihnü nü kümjing la shumütsa khüdu yohjünung ko nü yongkhi la liba ngu tsü nü chah tahkehsohnung. Hütsüpü Ihnü Nile lanü nüh ko nü chah mütsakeh liba ngu apüm tphahchehnung.

⁵Ihnü nüh ko ngu apüm rangmü lang tsü tsayohchüpehnung. Nü fü alih la khülunung ko müdhrürangpü pehjünung. Ihnü hütsü uza ko kanglungrü tsangdhi thsasohnung.

⁶Hütsüde Ijiprü apümnü Ih, ABÜDONGBAepü müdhenung.” ABÜDONGBAnü yore, “Israelrünü arüku nengdang nührü Ijiprü chah ngakehcho, ta nüh alüleh ja tenü tu atsauba mah.

⁷Arühnü nü chah ngakehde, nüh khyahsahnü arüh bipüm la müsühcho ko arüh rung khyahcho.

⁸Hütsüeko ade nohshengnü nührü mahsohnung nyitsarü noronung ko arühnü nührü nyitsarü ko kanglungrü kyüsehnung. Ih, Amichahba ABÜDONGBAnü yore.

⁹Ijip tsü apehcho kangnung. Hütsüde nührünü Ih ABÜDONGBAepü müdhenung. “Nühnü Nile tsü nüyo ko hütsü nühnü külüpchoepü yochonü,

¹⁰Ih nü rorüh ko Nile rorüh lile. Ihnü Ijip apüm kihkulang Migdol yangdi lanü kihjinglang Aswan yangdi chii ko Ethiopiarü lurü chii apehcho kangsohnung.

¹¹Nyitsarü mahkhang kanglungrü tunüsü hütsü mülahkhunung. Kang yüre hütsüla tusü mülinung.

¹²Ihnü Ijip tsü limih la apehlih khüdu kangsohnung. Kang yüre yangditi tsü aparü yangdi tenü alaa suro amütsau lisohnung. Ihnü Ijiprü tsü atsichirü kangsohnung. Arühnü yucho apümlang dro tsinung ko aparü nyitsarü yola linung.”

¹³Amichahba ABÜDONGBAnü yore, “Kang yüre khanglang Ihnü shupishuza pehba yuchoti lanü Ijiprü noronung,

¹⁴ko Ihnü arüh kihjinglang arühbürü jümü lih la lisohnung.

¹⁵Hütsüla arüh alü yanglih khüdu, apüm tenü alüu yanglih thsa linung ko adelü arühnü khodesü aparü yucho michah yangthsa müthsanung. Ihnü arüh khütang apohkiba kangsohnung, hütsünü arühnü aparü yanglih arüh pohki münorochehnung.

¹⁶Adelü Israelnü arüh chah khodesü müdümpinung. Ijiprü suro ngu arüh chah dümpiba tsü amüthsalangepü Israel khyang lümchehsohcho. Hütsüde Israelrünü Ih, Amichahba ABÜDONGBAepü müdhenung.”

¹⁷Ihrü yangtsi la licho kang mükyüpü-dhünyeh-u, akhudiba choo, akhudiba nyümong, ABÜDONGBAnü I te chotacho.

¹⁸Abinü yocho, “Nyitsarü tsurü,” Babylon Yangthsaba Nebukadnezarnü Tyre mahko. Abinü abi rothsarüti bha mülingra hisohchonü arüh thahküp shohchehko ko arüh pünurü aküp nehpehko, ta arüh chongchacho ngang yangthsaba nye mahkhang abi rothsarü nye tu müngu.

¹⁹Hütsünü, ade Ih, Amichahba ABÜDONGBAnü hita yore: “Ihnü Ijip lih Yangthsaba Nebukadnezar khyang jüre. Abinü mahnü ko kengchonü abi rothsarü nyükheh ngang, Ijiprü kuthsi apüm hitsinung.

²⁰Ihnü abi dikehcho ngang Ijip jüre, tunüo abi rothsarütinü I nengdang nguchijücho. Ih, Amichahba ABÜDONGBAnü choko.

²¹“Hütsü tikehde, Ihnü Israelrü rezeh kangsohnung ko nüh, Ezekiel khyang apümnü yuchinungthsa chosohnung, hütsüpü du arühnü Ih, ABÜDONGBAepü müdhenung.”