Read Sangtam Naga EZEKIEL 30 Bible Online

EZEKIEL 30 - Sangtam Naga bible

EZEKIEL 30

¹ABÜDONGBAnü I te thali chota yocho,

²“Nyitsarü tsurü,” choyohng ko Ih ABÜDONGBAnü tu yoro hütsü young. Nühnü yu hiri züde young: Adrünung nyümong khüdu tsehle!

³Nyümong tsü shündhün lile, ABÜDONGBAnü nguchinung nyümong, Yuchoti nengdang amarürah ko chongcha nyümong.

⁴Ijip la khata linung. Ko Ethiopia la alongri arangcheh. Ijip la khütang kyüsehnung; Yanglih tsü mahnung. ko chang pehjünung.

⁵“Hütsüba khata tsünü Ethiopia, Ledia, Libya, Arabia, Kub lanü amülihcho rothsarüti ko Ipu müyurü yolanü mii kyüsehnung.”

⁶Amichahba ABÜDONGBAnü yore, “Kihkulang Migdol lanü kihjinglang Aswan chiinü, khata la tsü Ijip akurahrüti apüm kyüsehnung. Ijiprü amüthseh rothsarüti changnung. Ih, ABÜDONGBAnü choko.

⁷Alih tsü lihküp la amütsau kangnung, ko yangditi tsü riri changpehjünung.

⁸Ijip chah Ihnü michang thsürangjüde ko arüh akurahrü apüm kyüsehde, arühnü, Ih, ABÜDONGBAepü müdhenung.

⁹“Hütsüba nyümong rode ko Ijip changde, Ihnü mülongdiba Ethiopiarü thsümüsuhnung kihkuh lanü yusi hirü müthehnung ko arüh drümüyangnung. Hütsüba nyümong tsü role!”

¹⁰Amichahba ABÜDONGBAnü yore, “Ijip kuthsi changkasohnung Ihnü Babylon Yangthsaba Nebukadnezar bichinung.

¹¹Abi ko abi amükhyu rothsarüti ronung ko abi tsü changsohnung. Arühnü nohshengnü Ijip mahnung ko alih tsü menü jengnung.

¹²Ihnü Nile kungsohnung ko Ijip tsü amütsarü pohki yohpünung. Shuparünü arüh limih changjünung. Ih, ABÜDONGBAnü choko.”

¹³Amichahba ABÜDONGBAnü yore, “Ihnü Memfis la kyothri ko arahkheh tsingrang thsangnyangjünung. Ijip michah yangthsanung süsü mülinung ko Ihnü nyitsarü apüm drüsohnung.

¹⁴Ihnü kihjinglang Ijip changsohnung ko kihkulang Zoan yangdi la michang thsürangjünung. Ihnü Thebes yangdiba khingchinung.

¹⁵Ihnü Ijiprü roshengvi arangcheh Pelusium yangdi khyang I rihlong müdhesohnung. Ihnü Thebes kuthsi changjünung.

¹⁶Ihnü Ijip chah michang thsürangnung ko Pelusium tsü lümtohnung. Thebes tbü khülunung ko yangdi tsü mülümphanung.

¹⁷Heliopolis ko Bubastis yangditi la dhrezarüti rothsa la sünung ko aparü tsü arangyoh lang notsinung.

¹⁸Ihnü Ijip tase thsangnyangjüde ko arüh dee müthsehba tase changkajüde, Tapanes chah amarürah ronung. Nyükhinü Ijip phatinung ko arüh yangditi apüm la lirüti rangyoh notsinung.

¹⁹Ihnü Ijip hiroh-i khingchide, arühnü Ih, ABÜDONGBAepü müdhenung.”

²⁰Ihrü yangtsi la licho kang dhüre-kheh choo akhudiba ko adhünyeh nyümong la, ABÜDONGBAnü I te chotacho.

²¹Abinü yocho, “Nyitsarü tsurü, Ihnü Ijip Yangthsaba kheh khyahsahjüko. Hütsü sünüsü mürümjü, mahkhang kyangpü thali noh bichichehnungthsa müjüpyehjü.

²²Hütsüeko ade, Ih, Amichahba ABÜDONGBAnü hita yore: Ih Ijip Yangthsaba rorüh lile. Ihnü akheh anyüding khyahsahjünung, atsalang ko thsangnyang liba akheh lanü nohsheng tsü longnung.

²³Ihnü Ijiprü tsü lihküp la shupishuza pehjünung.

²⁴Hütsüpü Ihnü Babylon Yangthsaba kheh rezehsohnung ko abi khehla I nohsheng yohjünung. Ta Ihnü Ijip Yangthsaba khehlü khyahsahjünung, ko abinü abi rorüh bete rühchi sünung.

²⁵Ho, Ihnü abi re müzehsohnung ko Babylon Yangthsaba rezehsohnung. Khode Ihnü abi khyang I nohsheng jünang ko abinü Ijip lahpi thongunang, atümungnü Ih, ABÜDONGBAepü müdhenung.

²⁶Ihnü Ijiprü tsü lihküp la shupishuzasohnung. Hütsüde arühnü Ih, ABÜDONGBAepü müdhenung.”