Read Sangtam Naga EZEKIEL 31 Bible Online

EZEKIEL 31 - Sangtam Naga bible

EZEKIEL 31

¹Ihrü yangtsi la licho kang dhüre-kheh-u choo asang akhudiba nyümong, ABÜDONGBAnü I te chotacho.

²Abinü yocho, “Nyitsarü tsurü,” Ijip Yangthsaba ko abi müyurü apüm te young: Nüh khüta re azeh! Ihnü nüh tu te kihtanung?

³Nüh Lebanon la cedar sing kyo, Atsah atsa, ajengza adhülüm, singdong athseng nyükhi chiinü.

⁴Hütsü zisohnung kih lile, hütsü kangnung alih yonglang kih. Singdong yaba müdüm tsü kih xahcho ko mürong la singdong apüm khyang yongkhi pohsohcho.

⁵Hütsü kih thangchi jüchonü, apa tenü athsengu zicho. Ajengzati dhülüm ko athseng zicho.

⁶Ajengza chah tsü uzati hung apüm arüh süp shüre; Hütsü khümki rangmü kanglungrü arüh za mütrüre; Abi khümki lihküp la yuchoti kyahshangre.

⁷Singdong tsü khütoh-i atsah tsacho hütsüdoi athseng, ajengza kehpü. Asoh-u la yongkhi chii raa züducho.

⁸Tsingrangba tbü la cedar singdong te hütsü mükihtacheh. Fir singdong hütsü kyo mülidheng, Plan singdong jengza hütsü kyo müle. Tsingrangba apu tbü la mii hütsü kyo müle.

⁹Ihnü hütsü ajengza khyangdang atsah tsa külüpcho. Hütsü Tsingrangba tbü, Eden la singdong apüm mükhyahba thsacho.

¹⁰“Hütsüeko ade, nyükhi müchide ziba, singdong hütsü chah tu tikehnung Ih, Amichahba ABÜDONGBAnü nü te yonung.

¹¹Hütsü athsengu zide amüthseh-u kangcho; hütsünü Ihnü thsongliko ko hütsü shuparü yangthsarü khyang jünung. Abinü hütsüba singdong khyang abi mütsacho aleng jünung.

¹²Achomang mükeh shuparünü hütsü retsu pehjünung. Abi jengza ko avanü limih la azong ko angah apüm la shohjonung. Abi khümki liyaba yuchoti apüm tsipehnung.

¹³Uzati ronü singme chah tsü kehnung ko ajengzati michah rangmü kanglungrünü tsehchinung.

¹⁴Hütsüta, ade tinü, kih khüdoi tihcho singdong thsanye, tu singdong hütsü kyo thseng müzinung ko amülenü nyükhi chii müzinung. Nyitsarü kyo arüh apüm changkako. Asü lih la züdunungrü kyo mülangjüko.”

¹⁵Amichahba ABÜDONGBAnü hita yore: “Singdong tsü asü lih lang züduba nyümong, longricho amüdhethsa Ihnü alih yonglang kih khyang hütsü michah tingtisohnung. Ihnü yongkhiti ranglinung ko yongna adrong müpohtsisohnung. Singdong tsü süchonü, Ihnü Lebanon zong tsü marürahsohnung ko mürong la singdongti apüm mükupehsohnung.

¹⁶Ihnü hütsü asü lih yang müthehde, hütsü khüluba yuva tsünü yanglihti shühchinung. Eden la singdongti apüm, athrocheh apüm ko kih thangchi jüba Lebanon la singdong apüm sürü alih yonglang tsipü liro, apümnü abi khülucho ngu künyangnung.

¹⁷Tsipehpü lirü yola zehnung, arüh abi yola asü lih lang wünung. Ko abi khümki libati apüm yuchoti yola shupishuzanung.

¹⁸“Singdong tsü Ijip Yangthsaba ko abi müyurü apüm. Eden la mii singdong hütsüdoi athseng ko atsa mülicho. Ta ade, Eden la singdongti kyo, hütsü asü lih lang züdunung ko Tsingrangba mümüdherü ko khata la sürü yola zehnung. Ihnü choko.” Amichahba ABÜDONGBAnü yore.