Read Sangtam Naga EZEKIEL 32 Bible Online

EZEKIEL 32 - Sangtam Naga bible

EZEKIEL 32

¹Ihrü yangtsi la licho kang dhüre-anyüh choo dhüre anyüu la akhudiba nyümong, ABÜDONGBAnü I te chotacho.

²Abinü yocho, “Nyitsarü tsurü,” Ijip Yangthsaba khyang amüzahnung yu jüng. Abi khyang I chahnü yusi hi jüng: Nühnü yanglihti bete kihkhünying kyo nguchiko, ta nüh yongkhi la chii tsiba kijang khüdu du kyo lile. Nü jingnü ningjo yongkhi tsü münyijüre.

³Khode yucho adrong shibülungnang, nüh I yojeh la xohnung ko yojeh tsü kihbekhüm la tphahchehsohnung.

⁴Ihnü nüh dongkhu dhichehchüpehnung ko limih la uzati ko kanglungrüti nü shuh tsu akang linung.

⁵Nü me sühchonü angah ko azong apüm jengsohnung.

⁶Nü shühnü azong tsü mülüptide ko yongkhi tsü müjengde Ihnü nü shüh tungpehnung.

⁷Ihnü nüh changjüde, ning shütisohnung ko chenghiti lüptijünung. Nyü tsü nyükhi pohki rangnung ko chonunü atsingse müjünung.

⁸Ihnü ning chah avisa apüm yatinung ko nü limih apüm marürahsohnung. Ih, Amichahba ABÜDONGBAnü choko.

⁹“Nührünü müyuchidhengcho yuchoti lanü khode Ihnü nührü changjünung yusi sobhoro, yuchoti adrong chongchanung.

¹⁰Ihnü nührü chah nguchiba tsünü yucho adrong nehnung. Khode Ihnü I nohsheng dhimüsunang, yangthsarüti adrüchonü dhridhrinung. Nüh khülu nyümong, arüh apüm arühbürü akang nengdang dro dhridhrinung.”

¹¹Amichahba ABÜDONGBAnü Ijip Yangthsaba te yore, “Nühnü Babylon Yangthsaba nohsheng dhsükehnung.

¹²Ihnü akhürah yuchoti lanü rothsarü khyang arüh nohsheng tohchehsohnung ko nyitsarü apüm kyüsehnung. Nühnü dümpi müthsehba nü müyurü ko aparü apüm changjünung.

¹³Ihnü kihyongchah apüm la nührü kanglungrü mapsehnung. Adelü kih ningjünung nyitsarü mahkhang kanglungrü süsü mülinung.

¹⁴Ihnü nü yongkhi jamkeh müsingsoh ko longlümnü pohsohnung. Ih, Amichahba ABÜDONGBAnü choko.

¹⁵Ihnü khode Ijip apehcho kangsoh ko hütsüla lirü apüm changsohnang, arühnü Ih, ABÜDONGBAepü müdhenung.

¹⁶Hiba amüzahnung yu hi meshü khi kangnung. Yuchoti la khingkurütinü hütsü Ijip ko abi nyitsarüti meshü khi kang bichinung. Ih, Amichahba ABÜDONGBAnü choko.”

¹⁷Ihrü yangtsi la licho kang dhüre-anyüh choo akhudiba ko dhüre-müngau nyümong, ABÜDONGBAnü I te chotacho.

¹⁸Abinü I te yocho, “Nyitsarü tsurü,” Ijiprü nyitsarü khütango nengdang meshüng. Arüh tsü rezeh yuchoti yola asü lih yang züdusohng.

¹⁹Arüh te young: “Aparü apüm tenü nüh atsah atsauepü nühnü lümrü mah-o? Nüh asü lih yang züdunung ko hütsüla müyudsirü yola yüpjonung.

²⁰“Ijiprü tsü khata la sürü yola khülunung. Arüh apüm kyüsehnung nohsheng khüdu rungnüm lile.

²¹Akurahrü ko Ijiprü lahpi sürünü khatacho arühnü asü lih yang khyüchore. Arühnü züdecho: ‘Müyudsirü sürü khata la sücho arüh züro hila lile ko arüh hila yüpjole!’

²²“Assyria tsü mükangmüla abükyü rothsarüti kongyo liba hütsüla lile.

²³Arüh apüm khata la sücho ko arüh kong tsü asü lih asoh-uba la lile. Abükyü rothsarüti apüm khata la khülucho ko arüh kongnü abükyü kong mükangti lile. Ta khüdupi arühnü alimih nehsohcho.

²⁴“Elam tsü mükangmüla abükyü rothsarüti kong liba hütsüla lile. Arüh apüm khata la sücho, ko arüh asü lih lang tsü mümüjüp-pehpü züducho. Akang lide arühnü adrünung sobhocho, ta arüh ade hila ashah khyo so lile.

²⁵Elam tsü khata la sürü yola yüpjole ko rothsarüti kong tsü abükyü mükangmüla lile. Arüh apüm mümüjüp-pehcho ko khata la sücho. Akang lide arühnü adrünung sobhocho, ta arüh ade hila so ko ashah khyo khata la sürü müngu changta lile.

²⁶“Meshek ko Tubal tsü mükangmüla arüh rothsarüti kongyo la lile. Arüh apüm mümüjüp-pehcho ko arüh apüm khata la kyüsehcho. Ta khüdupi arühnü akang lirü nehsohcho.

²⁷Arüh tsü papade kyo akurahrü roh-i jengreng jo, asü lih yang jengki apüm khyüpü arüh thah te arüh nohsheng ko arüh tsung yohpüpü müdhrürangcho. Hiri akurahrüti khüdupilü akang lirü mii nehsohnungthsa rezeh licho.

²⁸“Hütsüta Ijiprü tsü mümüjüp-pehrü, khata la sürü kyo so jonung.

²⁹“Edom hütsüla abükyü yangthsarüti yola lile. Arüh rezeh rothsarüti, ta ade arüh khata la süba mümüjüp-pehrü yola yüpjole.

³⁰“Limih la yangthsarüti apüm hütsüla lile, ko Sidonrüsü hütsüla lile. Arüh tasenü khüdupi adrüba chürosohcho, ta ade arüh mümüjüp-pehrü khata la sürü yola ashah khyo yüpjole. Arühnü asü lih la ashah khyo züdurü suro changtare.

³¹“Khata la kyüsehrü hiri apüm nguba tsü Ijip Yangthsaba ko abi rothsarü nengdang akünyang licho.” Hi Amichahba ABÜDONGBAnü yore.

³²“Ihnü akang lirü nengdang Ijip Yangthsaba tsü adrüba kangsohcho, ta mümüjüp-pehrü ko khata la kyüsehrü yola, abi ko abi rothsarüsü yüpjosohnung.” Amichahba ABÜDONGBAnü choko.