Read Sangtam Naga EZEKIEL 33 Bible Online

EZEKIEL 33 - Sangtam Naga bible

EZEKIEL 33

¹ABÜDONGBAnü I te chota yocho,

²“Nyitsarü tsurü, Ihnü alih la khata hirode tu tikehro hütsü nührü nyitsarü te young. Hütsüba yucho nyitsarünü roshengrü thsanung nyüh khüdu throchehre.

³Arorüh rocho abinü ngude, atümung müzahsohnung abinü züdere.

⁴Khürünü hütsü yuchipü layo pehjüko arorüh ro abi kyüsehkhang, abi süba tsü apu du mütangnung.

⁵Abi süba tsü apu mülang lile, tunüo müzahsohcho abinü münyi, abinü nyirelang, abi tsichehba thsako.

⁶Ta, roshengba tsünü arorüh ngupü müzüdekhang, arorüh tsü ronung ko münyirü kyüsehnung, ta arüh süba tsü Ihnü roshengba bha thsasohnung.

⁷“Nyitsarü tsurü, ade Ihnü nüh Israel yucho nengdang roshengrü kangsohre. Ihnü amüzahnung yu jüba tsü nühnü arüh te müdhesohng.

⁸Ihnü amütsarü khüdu sünung züdepü nühnü abi mülichisohnung mümüzahsohpü abi amünyi la li sükhang, abi süba tsü nü bha thsanung.

⁹Nühnü abi müzahsohpü abi amünyi nguchiba tsü müzahkhang ko abi amünyi la sükhang, ta nü akanglü khümchonung.”

¹⁰ABÜDONGBAnü I te chota yocho, “Nyitsarü tsurü, Israelrünü choba yu tsü thali young: ‘Ihrü münyi ko ihrü thsamehchonü ihrü bhamülingre. Ihrü chang tsile. Ihrü khüta linung?’

¹¹Ih, Amichahba ABÜDONGBA, akang Tsingrang linü, münyirü khüdu sücho la Ihnü mükünyangrepü arüh te young. Hütsü mülih, abinü amünyi münguchipü akang lisohnyüre. Israel, nührünü nguchiba amünyi tsü zahng. Tuepü nührü sünyüro?

¹²“Nyitsarü tsurü, ade Israelrü te young, khode nyitsarü atsa khüdunü amünyi shitpahnang, abinü atsa nguchiba tsünü abi mükhümchonung. Münyirü khüdunü amünyi nguchiba zahkhang, abi mükhingchinung ko nyitsarü atsa khüdunü amünyi bichinung dikehkhang, abi akang müpehjünung.

¹³Ihnü nyitsarü atsa te akang nyengchonung kohle, ta abinü atsicho abi nguchi atsa tsü kükyükopü lüm amünyi nguchinung dikehkhang, abinü atsa nguchicho tusü Ihnü mülümchehnung. Amünyi ngang abi sünung.

¹⁴Ihnü münyirü nyüh khüdu te nüh sünung pü amüzahnung yonung kohle, ta abinü amünyi lanü za atsa ko yuje tsü nguchinung dikehkhang

¹⁵adüzünü, abinü nyajünung nengdang yuzi khyücho tsü thali jükhang mahkhang abinü fühcho thali jükhang abinü amünyi nguchiba zahpü akang jüba yuzeng bichikhang, abi müsünung ta akang linung.

¹⁶Abinü shitpahba amünyi tsü Ihnü mülangpehjünung ko abi akang linung, tunüo abinü tu yuje ko atsa hütsü nguchiko.

¹⁷“Ko nührü nyitsarünü Ihnü nguchiba tsü athsalang mah pü yore! Mah, arühnü nguchiba tsü athsalang mah.

¹⁸Amüsa nyitsarü khüdunü atsa nguchi pehpü amünyi nguchinung dikehde, abi hütsü nengdang sünung.

¹⁹Khode münyirü khüdunü amünyi nguchi pehpü tu yuje ko atsa hütsü nguchinang, abinü abi akang khümchore.

²⁰Ta Israel, Ihnü nguchiba hi athsalang mah pü, nühnü yore. Ihnü nü nguchi aichi nü yukhanung.”

²¹Ihrü yangtsi la licho kang dhüre-anyüh choo dhüre ko amüngau nyümong la, Jerusalem lanü tsicheh rocho nyüh khüdu ro yangdi tsü khüluko pü yocho.

²²Abi mürode hütsü romang tsü, I chah ABÜDONGBA zii rocho Ihnü müdhecho. Nyitsarüba tsü nyangnyü khüu ro chihde, ABÜDONGBAnü I khyang chonung zii thali jücho.

²³ABÜDONGBAnü I te chotacho.

²⁴Abinü yocho, “Nyitsarü tsurü, Israel lih la athsangnyangcho yangditi la lirütinü yore: ‘Abraham tsü nyitsarü khüdu du ko abi khyang alimih apüm jücho. Ihsa adrong lile, hütsünü adelü alimih tsü Ihsa yo.’

²⁵“Ih, Amichahba ABÜDONGBAnü tu yoro hütsü arüh te young: Nührünü ashüh zeh shuh tsure. Nührünü kyothri mübüre. Nührünü mapsehre. Tu nganglangnü alih tsü nührü yoepü yoro?

²⁶Nührünü nohsheng chah dümpire. Nührü nguchi tsü athrünyinung. Atümungnü nahtrahnaxengre. Tu nganglangnü alih tsü nührü yoepü yoro?

²⁷“Ih, Amichahba ABÜDONGBAnü arüh te I Tsingrang akang linü achangba yangditi la lirüti tsü kyüsehnung young. Yanglih la lirüti rangmü kanglungrünü tsunung. Azong ko lungkhi la rang lirüti thsaranü sünung.

²⁸Ihnü limih tsü apehcho kangsohnung ko arüh müthsehsohba zii tsü changkanung. Israel azongti tsü khura adrünung linung, hütsünü sünüsü hütsü mülahkhunung.

²⁹Khode Ihnü müyurü tsü arüh münyi ngang khingchinang ko yanglih tsü apehcho kangsohnang, hütsüde arühnü Ih, ABÜDONGBAepü müdhenung.”

³⁰ABÜDONGBAnü yocho, “Nyitsarü tsurü, nührü nyitsarünü arüh yangdi tbü te shirütade mahkhang arüh trahtri lang la shirüta, arüh khüdunü khüdu te yorü, ‘Ihsanü wonung ko ade ABÜDONGBA chahnü tu yu rochonang nyinung.’

³¹Hütsünü nü yu nyinung I müyurü tsübülungre, ta nühnü arüh te yocholü arühnü münguchire. Arüh beküp la amüi yu chore, ta mütozah arühnü müxümüngure.

³²Arüh nengdang nüh tsü amüi khi thsa ko honglilah meh tülatüshirü khüdu tenü tu papa mah. Arühnü nü yu apüm nyire ko khüdusü mübichire.

³³Ta khode nü yu apüm tikehkhangnang ko arüh tsü yuje tikehnang, hütsüde arüh yola azikehrü khüdu licho arühnü müdhenung.”