Read Sangtam Naga EZEKIEL 34 Bible Online

EZEKIEL 34 - Sangtam Naga bible

EZEKIEL 34

¹ABÜDONGBAnü I te chota yocho,

²“Nyitsarü tsurü,” Israel yangthsarü mülangjüng. Arüh te choyohng ko Ih, Amichahba ABÜDONGBAnü arüh te hita yoreding: Nüh ahohah, nüh Israel san-nyahrü! Nühnü nüpu du xükümre, ta khodesü sanlü müxükümre.

³Nühnü nyikih yongre, shunbühnü kyahcho shü müpire ko san atsauba mapseh tsure. Ta khodesü sanlü müxükümre.

⁴Nühnü tase müzehrüti müdheng, füthsa libati mükyangjü, lerohpeh libati mürümjü, thrümeh tsibati münoro mahkhang chah libati müyangchi. Hütsü mülih, nühnü arüh dee mütsa bichiko.

⁵San tsü anyahrü mülichonü, arüh shupishuza lile ko rangmü kanglungrünü mükahseh tsure.

⁶Hütsünü I santi akhang azong chah rachire. Arüh alimih tpah la shupishuzako ko sünüsü arüh müyangchi mahkhang arüh yangchinung mümüküp.

⁷“Ade, nührü san-nyahrüti, Ih, ABÜDONGBAnü yocho yu nyieng.

⁸Ih akang liba Tsingrang linü, nührünü I yu nyicho atsau thsanung. I santi rangmü kanglungrünü mükahseh tsuko, tunüo san-nyahrü mülicho. I san-nyahrütinü san yangchinung mümüküp. Arühnü san mahpü arühbürü du xükümre.

⁹Hütsüeko, nührü san-nyahrüti, I yu nyieng.

¹⁰Ih nührü rorüh lilepü Ih, Amichahba ABÜDONGBAnü misha yore. Ihnü I santi notsinung ko khodesü nührü arüh nyahrü müthsasohnung. Ihnü khodesü thali nührübürü du müxükümsohnung. Ihnü nührü kheh lanü I san rohchonung ko nührü khyang arüh mütsusohnung.

¹¹“Ih, Amichahba ABÜDONGBAnü nührü te yore, san-nyahrünü abi san shupishuza liba xükümcho ko thali nübülungcho kyo, I punü I santi yangchinung ko xükümnung.

¹²Achangba ko amarürah nyümong arüh shupishuza pehba müdümti lanü Ihnü arüh thali noronung.

¹³Ihnü yangpirü lih langnü arüh nüchehnung, arüh müjang nübülungnung ko arühbürü lih lang thali noronung. Ihnü arüh thali Israel azong ko yongkhi la nowünung ko zanu yola arüh kangnung.

¹⁴Ihnü arüh Israel lih akhang, ko alesha amüyah zanulih la khümcho lamungsohnung.

¹⁵I san anyahrü tsü Ipu thsanung ko arüh kyahshangsohnung Ihnü müdüm khüdu yangchijünung. Ih, Amichahba ABÜDONGBAnü choko.

¹⁶“Ihnü achahcho yangchinung, thrümeh tsiba nüli ronung, lerohpeh liba rümjünung ko thsangnang liba kyangjünung; ta rezeh ko ashukehti Ihnü changjünung, tunüo Ih tu athsalang hütsü du nguchiba san-nyahrü.

¹⁷“Hütsünü ade, I santi, Ihnü nührü apüm yukhanung ko amütsa lanü atsa changsahnung, miza lanü san throshonung.

¹⁸Zanu atsauba tsuchonü longmünyüpba nührü khürü lile; nührünü mütsucho mii nührünü dhrümnahpehre! Nührünü kih amüseng tsü yongre ko nührü müyongcho dhrümning pehjüre.

¹⁹Ko nührünü dhrümnahpehba zanu tsü I yo san apanü tsure ko nührünü dhrümning pehjüba kih tsü arühnü yongre.

²⁰“Hütsüeko ade, Ih, Amichahba ABÜDONGBAnü nührü rezeh ko remüzeh san kahla yukhanung.

²¹Nührünü füthsarüti nyümpehre ko santi yolanü throchehpehre.

²²Ta Ihnü I santi khümchonung ko adelü arüh mükhimücho mübichisohnung. Ihnü I san müipi yukhanung ko amütsa lanü atsa throsahnung.

²³I dikehrü David kyo, Ihnü arüh san-nyahrü khüdu kangsohnung Yangthsaba khüdu jünung ko abinü arüh xükümnung.

²⁴Ih, ABÜDONGBA, arüh Tsingrang thsanung ko I dikehrü David arüh Yangthsaba kyo Ih arüh Yangthsaba thsanung. Ihnü choko.

²⁵Arüh khümcho linungthsa Ihnü azengchotaba khüdu külüpnung. I santi rangmü la ko mürong la alümxü müli khümcho li ko yüpnungthsa, Ihnü alih la dhsürü kanglungrü apüm iipehnung.

²⁶“Ihnü arüh müwajünung ko I amüsa khang mükang arüh lisohnung. Hütsüla Ihnü arüh khyang tsing rosoh müwajünung.

²⁷Singdongtinü asih sihnung, alihnü tsahma chüronung ko nyitsarü apüm palu lih la khümcho linung. Ihnü I müyurü arüh ayurüthsa yohpüba ixilih lanü lehcheh jüde, Ih, ABÜDONGBAepü arühnü müdhenung.

²⁸Adelü müyudsirü yuchotinü arüh mümahchehnung ko rangmü kanglungrünü arüh mükahseh mütsunung. Arüh khümcho linung ko sünüsü arüh müdrüsohnung.

²⁹Ihnü arüh khyang asu lih jünung ko alih la yangkong mülisohnung. Adelü aparü yuchotinü mümüthsamünyünung.

³⁰Israel tsü I müyurü ko Ihnü arüh tsungtirepü apümnü müdhenung. Ih, Amichahba ABÜDONGBAnü choko.

³¹“Nührü, I san, Ihnü kangba santi, nührü I müyurü ko Ih nührü Tsingrang” epü Amichahba ABÜDONGBAnü yore.