Read Sangtam Naga EZEKIEL 35 Bible Online

EZEKIEL 35 - Sangtam Naga bible

EZEKIEL 35

¹ABÜDONGBAnü I te chota yocho,

²“Nyitsarü tsurü, Edom yucho mülangjüng.

³Müyurü te Ih, Amichahba ABÜDONGBAnü tu yoro hütsü young: “Ih nührü rorüh, Edom zongti! Ihnü nüh apehcho kangsohnung.

⁴Ihnü nührü yangdi changjünung, ko nührü lih apehcho kangsohnung. Hütsüde Ih, ABÜDONGBA nührünü müdhenung.

⁵“Nüh Israel mükyangba rorüh licho ko abükyü nyitsarü achangba la rümsohcho, abükyü münyi ngang achangba akhingchi.

⁶Hütsünü ade, Ih, ABÜDONGBA, Tsingrangba akang linü, asüba tsü nü müngu ko nühnü hütsü lanü mütsicheh. Nüh mapsehcho ngang mülangko ko mapsehba tsünü nüh iironung.

⁷Ihnü Edom akhang lih adeng kangsohnung ko hütsü lahkhurü apüm kyüsehnung.

⁸Ihnü azong tsü menü bhümtisohnung ko khata la kyüsehcho me tsünü akhang ko angah bhümtisohnung.

⁹Ihnü nüh lede nengdang apehcho kangsohnung ko nührü yangditi la sünüsü mülinung. Hütsüde nührünü Ih, ABÜDONGBAepü müdhenung.

¹⁰“Ih, nührü ABÜDONGBA Tsingrang thsanye, yucho anyüh, Juda ko Israel, anyüding ko anyüh lih zeh nühnü khyünungepü yoko.

¹¹Hütsü ade, Ih, Amichahba ABÜDONGBA Tsingrang akang linü, I nyitsarü te nühnü zichürocho, nahmohcho ko thrünyicho ngang Ihnü nü khyang thali jünung. Nührünü arüh chah nguchicho ngang Ihnü nührü khingchirepü arühnü müdhenung.

¹²Hütsüde nührünü Israel zongti apehcho arüh tsü nührünü münyopehnung mülangjo chocho Ih, ABÜDONGBAnü yuchikopü nührünü müdhenung.

¹³Nührünü Ih nyüm athrünyinung yu tüzümükhüm chocho Ihnü yuchiko.”

¹⁴Amichahba ABÜDONGBAnü yore, “Ipu yo Israel changde nührü künyangtacho kyo,

¹⁵nührü khülude limih apüm künyangnungthsa, Ihnü nührü apehcho kangsohnung. Seir zong, ho, Edom lih apüm apehcho kangsohnung. Hütsüde apümnü Ih, ABÜDONGBAepü müdhenung.”