Read Sangtam Naga EZEKIEL 36 Bible Online

EZEKIEL 36 - Sangtam Naga bible

EZEKIEL 36

¹ABÜDONGBAnü yocho, “Nyitsarü tsurü, Israel azongti te chotaang

²ko arüh nengdang Ih Amichahba ABÜDONGBAnü yocho yu nyinung arüh te young: Israel rorünü müthseh yore, ‘Adelü jümü azong lih ihrü yoe!’

³“Khang choyohng ko Ih, ABÜDONGBAnü yoba tsü sobhoung. Khode mükangmüshü liba yuchotinü Israel azongti mahchehcho, arüh apümnü Israel müthsamünyücho.

⁴Hütsüeko ade Ih, Amichahba ABÜDONGBAnü tu yoro hi nyieng, nührü azongti ko akhangti, nührü kihnatung ko angahti, chang liba müdümti te ko nührü mükangmüshü liba yuchotinü mahcheh ko münyüjo liba apehcho yanglihti.

⁵“Ih, Amichahba ABÜDONGBAnü mükangmüshü liba yuchoti ko alathsa Edom nyüm I rihlong chüroko. Künyang ko mükhimüngu, arühnü I lih kohcheh zanulih zeh khyücho.

⁶“Hütsüeko Israel lih te choyohng; akhang azong, kihnatung ko angah te yuchotinü müthsamünyo ko nyüpmüseh arüh bichicho nengdang nahthsa zichüro Ih, Amichahba ABÜDONGBAnü yore.

⁷Mükangmüshü liba yuchoti nyüpmüsehnung Ih, Amichahba ABÜDONGBAnü yuchüm nyengchore.

⁸Ta I müyurü Israelrü khyang Israel zong chah singdongti ava thümlangnung ko asih sihjünung. Tunyah mülipü nührü kuh lang thalinung.

⁹Ih nührü lahpi lile, ko Ihnü nührü luh thali xüsohnung ko hütsüla majüh shusohnung.

¹⁰Ihnü nührü mono suhsohnung. Nührünü yangdila linung ko chang liba lüpcho tsü külüpchinung.

¹¹Ihnü nyitsarü ko kanglungrü suhsohnung. Nührü akhulang tenü adrongu kangnung, ko tsuzarü khütang nümüsunung. Ihnü nührü akhulang roh-i hütsüla lisohnung ko nührü alaa pungrohirosohnung. Hütsüde nührünü Ih, ABÜDONGBAepü müdhenung.

¹²Ihnü I müyurü Israelrü, nührü hütsü lih la thali lisohnung noronung. Hütsü nührübürü lih kangnung ko hütsünü adelü khodesü nührü tsuzarü müyangkongsohnung.

¹³“Ih, Amichahba ABÜDONGBAnü yore: Bürünü nyitsarü shuh tsurü lih pü dsiba ko azarü rohchoba yucho pü yoba tsü yuje lile.

¹⁴Ta adelü nührü tsurü kengcho nyitsarü shuh tsurü mah, Ih, Amichahba ABÜDONGBAnü choko.

¹⁵Adelü nührünü müthsamünyüba mahkhang münyodhengba yuchoti te münyinung. Adelü alihnü nührü chahnü nührü tsuzarü kengcho mükhyünung. Ih, Amichahba ABÜDONGBAnü choko.”

¹⁶ABÜDONGBAnü I te chota yocho,

¹⁷“Nyitsarü tsurü, Israelrünü arüh lih la lide, arüh akang ko nguchinü hütsü münyijücho. Ihnü arüh tsü khingkurü ayah rode münyicho kyo khichire.

¹⁸Arühnü hütsüla mapsehcho ko kyothri khu münyichonü Ihnü arüh khyang I rihlong müdhesohcho.

¹⁹Arüh akang ko nguchi khu Ihnü arüh mülangjücho ko shupa lih jeng shupishuzasohcho.

²⁰Arüh wücho apümlang, arühnü I Amüsa neng chah ashah hirojücho, tunüo müyurünü hita yocho, ‘Hiri ABÜDONGBA nyitsarü, ta arühnü abi lih pehjünung du kangko.’

²¹Hütsünü Ihnü I Amüsa neng nengdang lümxüre, tunüo Israelrünü arüh wücho apümlang ashah hirojücho.

²²“Hütsüeko ade, Israel khyang Ih Amichahba ABÜDONGBA yu himüchijüng: Ihnü nguchinungba hi nührü Israelrü khyanglangnü mah, ta nührü wücho yanglih apüm la nührünü ashah hirojüba I neng Amüsa khyanglangnü lile.

²³Khode Ihnü I neng Amüsa arangcheh nührünü ashah hirojüba neng yuchoti yola müdhesohnang, hütsüde arühnü Ih ABÜDONGBA müdhenung. Ih Amichahba ABÜDONGBAnü choko. Ih Amüsaepü yuchoti te ngusohnung nüh bichinung.

²⁴Ihnü yucho ko yanglih mükhu lanü nührü nüchehnung ko nührübürü lih lang noronung.

²⁵Ihnü nührü chah kih amüthseng xahkehjünung ko kyothri ko lüpchonü nührü münyijücho lanü müsachehjünung.

²⁶Ihnü nührü khyang lasih asi ko lümlong asi jünung. Ihnü nührü chahnü lung kyo lasih amüküp khyümüijünung ko yocho nyiba lasih jünung.

²⁷Ihnü nührü chah I nbü yohjünung ko nührü khyang I yuzeng ko I amülaba bichisohnung.

²⁸Hütsükhang, Ihnü nührü jümürü khyang jüba lih la tsü nührü linung. Nührü I müyurü thsanung ko Ih nührü Tsingrang thsanung.

²⁹Nührü münyijüba lüpcho lanü Ihnü nührü khümchonung. Hikholü yangkong mülisohnung, ko fürü pungrohirosohnung.

³⁰Nührü yuchoti bete yangkong mütoh ashah mükhyüsohnung, Ihnü singdong khyang asih sihsohnung ko luh la tsang khyüsohnung.

³¹Nührünü amünyi saying ko thsamehcho lümchehnung ko nührü münyi ko thsamehcho nengdang nührünü nührübürü thrünyinung.

³²Israel, Ihnü hiri apüm nührü khyanglangnü nguchirepü mülümsohnyüre. Nührü nguchi nengdang shah ko wahnü lümsohnyüre. Ih, Amichahba ABÜDONGBAnü choko.”

³³Amichahba ABÜDONGBAnü yore, “Ihnü khode nührü münyi apüm lanü nührü müsa kangsohnang, nührü yangditi la nührü lisohnung ko chang liba külüpchisohnung.

³⁴Nührü luh lahkhu tsehrü atümungnü hütsü rangmü kang chithoh ngucho, ta hütsü Ihnü nührü khyang thali thsasohnung.

³⁵Hütsüde, atümungnü khüdupi hiba lih akungase kang libasü khüta Eden tbü kyo kangcho, ko dhrümchi kengcho tsipü chang liba yangditisü khütapü ade nyitsarü li ko tbütipü liropü tsingdhengnung.

³⁶Hütsüde nying liba mükangmüshü lirü yuchotinü Ih, ABÜDONGBAnü chang liba yangditi külüpchi ko apehcho lih tsü thali khyümcho müdhenung. Ih, ABÜDONGBAnü hi nguchinung nyengchoko ko Ihnü nguchinung.”

³⁷Amichahba ABÜDONGBAnü yore, “Ihnü Israel khyang adesü I arüku chingsohnung ko arüh san atii kyo suhsohnung.

³⁸Ade chang liba yangditi tsü khüdupi Jerusalem thsüti la kangmübü jüba santinü jeng licho kyo nyitsarünü jeng lisohnung. Hütsüde arühnü Ih, ABÜDONGBAepü müdhenung.”