Read Sangtam Naga EZEKIEL 37 Bible Online

EZEKIEL 37 - Sangtam Naga bible

EZEKIEL 37

¹I chah ABÜDONGBA zii rocho Ihnü müdhecho, ko Abi nbünü Ih nowü arühnü bhümti liba ngah khüdu la pümsohcho.

²Abinü Ih nüpü angah tsü mükangcho, ko arühlungrü khütang sühpücho Ihnü ngucho ko arüh tsü akungcho licho.

³Abinü I te yocho, “Nyitsarü tsurü, hiri rühlungrü akang kanglinung kohnung mah-o?” Ihnü lalingcho, “Amichahba ABÜDONGBA, Nüh dunü müdhele!”

⁴Abinü yocho, “Rühlungrü te tsü choyohng. Hütsüri rühlungrü te tsü ABÜDONGBA yu nyinung young.

⁵Arüh te hi Ih, Amichahba ABÜDONGBAnü yoreding: Ihnü nührü chah sah mehyohjünung ko nührü akang kanglisohnung.

⁶Ihnü nührü khyang shutsa ko ayüh jünung, ko aküpnü lüptijünung. Ihnü nührü chah sah mehyohjünung ko nührü akang kanglisohnung. Hütsüde nührünü Ih, ABÜDONGBAepü müdhenung.”

⁷Hütsüta I te yocho kyo Ihnü choyohcho. Ih choyoh yade, Ihnü rühlungrü lahkehta yuva khüdu yuchicho ko rühlungrü tsü chungkehtamüsucho.

⁸Ihnü dheng yade, rühlungrü tsü shutsa ko ayüh, hütsüpü aküpnü lüpticho. Ta afü la tsü asah mülicho.

⁹Tsingrangbanü I te yocho, “Nyitsarü tsurü, nyübong te choyohng. Asücho meti la asah mehyohjünung ko arüh akang kanglisohnung apümlangnü fünung ABÜDONGBAnü nyübong te yuzeng jürepü young.”

¹⁰Hütsüde I te yocho kyo Ihnü choyohcho. Fü la tsü asah züducho, ko arüh akang kangli yacho. Arüh rothsarü mülung amülah kangxah yacho.

¹¹Tsingrangbanü I te yocho, “Nyitsarü tsurü, Israelrü tsü hiri rühlungrü kyo lile. Arüh aronung alongdi tu müli kungpehkopü arühnü yore.

¹²Hütsüeko I müyurü Israelrü te hita choyoh young, Ih, Amichahba ABÜDONGBAnü arüh kong kangthrujünung. Ihnü arüh thali nücheh Israel lih lang noronung.

¹³Khode Ihnü I müyurü dhrürangcho tsü khangthru arüh nüchehnang, hütsüde arühnü Ih, ABÜDONGBAepü müdhenung.

¹⁴Ihnü arüh chah I sah mehyohjünung, arüh akang kanglisohnung, ko arühbürü lih la lisohnung. Hütsüde arühnü Ih, ABÜDONGBAepü müdhenung. Ihnü hütsü nguchinung nyengchoko, ko Ihnü nguchinung. Ih, ABÜDONGBAnü choko.”

¹⁵ABÜDONGBAnü I te thali chota yocho.

¹⁶“Nyitsarü tsurü,” “singking khüdu hirung ko hütsü chah yu hi thrahkeng, ‘Juda Yanglih’. Hütsüpü singking apa khüdu hirung ko hütsü chah ‘Israel Yanglih’ pü thrahng.

¹⁷Hütsüpü singking anyüh tsü khüdu kang ngunungthsa achang anyüh la tsü marehng.

¹⁸Nührü nyitsarünü nü te hütsü tu adüzüopü tsingdhengkhang,

¹⁹Ih, Amichahba ABÜDONGBAnü singking tsü Israel mülih hiro Juda mülih chah tsü yohpünung arüh te young. Anyüh tsünü singking khüdu kangsohnung ko I khehla binung.

²⁰“Singking anyüh tsü nü khehla bieng ko hütsü müyurü khyang ngusohng.

²¹Hütsüpü arüh te Ih, ABÜDONGBAnü arüh tsiwü liba yuchoti lanü nüchehnung, nübülungnung ko arühbürü lih lang nüli ronungepü young.

²²Ihnü Israel zong chah ko lih la arüh yucho khüdu kang kehtasohnung. Arüh michah yangthsanung yangthsarü khüdu du linung ko adelü yucho anyüh kang müchangnahnung.

²³Adelü arühnü athrünyinung kyothrinü arühbürü mümünyinung mahkhang amünyi la arühbürü müthsangnyangnung. Arüh amünyi shitpahba ko Ih kihyochüba lang apüm lanü arüh lehchehjünung. Ihnü arüh müsachehjünung; arüh I müyurü ko Ih arüh Tsingrang thsanung.

²⁴I dikehrü David kyo yangthsarü khüdu arüh yangthsarü linung. Yangthsarü khüdu pohki arüh kehtanung ko I yuzeng yuje cho bichinung.

²⁵Ihnü I dikehrü Jakob khyang jüba ko arüh jümürü liba lih la tsü arüh linung. Arüh hütsüla müchangka linung ko hütsüta arüh tsuzarü ko shümtsurü linung. I dikehrü David kyo yangthsarü khüdunü arüh michah lede yangthsanung.

²⁶Achangka müli arüh khümcho linungthsa Ihnü arüh te azengchotaba khüdu külüpnung. Ihnü arüh lisohnung ko arüh suhsohnung ko achangka müli linungthsa arüh lih la tsü I Amübükuh khüdu thsanung.

²⁷Ih hütsüla arüh yola linung; Ih arüh Tsingrang thsanung ko arüh I müyurü thsanung.

²⁸Lede nengdang Ihnü arüh yola I Amübükuh müdongde, yuchotinü Ih, ABÜDONGBAnü Israel tsü Ipu yo müyurü thsanung throchehchoepü müdhenung.”