Read Sangtam Naga EZEKIEL 38 Bible Online

EZEKIEL 38 - Sangtam Naga bible

EZEKIEL 38

¹ABÜDONGBAnü I te chota yocho,

²“Nyitsarü tsurü, Magog lih la Meshek ko Tubal yuchoti yangthsarü ayingba Gog mülangjüng.

³ko abi te Ih, Amichahba ABÜDONGBA tsü abi rorüh lilepü young.

⁴Ihnü abi ngumülasohnung, akümjing la shumütsa yohjünung, ko abi ko abi rothsarüti apüm tphahtsinung. Abi rothsarüti arüh kuri zehpü ko kuri rothsarüti tsü khütang ko rothsarü müipinü tsung ko nohsheng bikhang.

⁵Abi yola Persiarü, Ethiopiarü ko Libyarü zehcho ko arüh apümnü tsung ko idhse kuthri thricho.

⁶Abi yola kihkulang lirü Gomer ko Beth Togarmarü khatarü apüm ko apa yuchoti adrong lanü zehcho.

⁷Abi ko abi yuzeng la lirü rothsarüti apüm küdangnung young.

⁸Yucho adrong lanü nürüta liba ko mürothsapü liba nyitsarüti yanglih tsü mahnung kang adrong lipü Ihnü abi khyang yuzeng jünung. Anyahli thrüchahchü pehjo liba Israel azongti, ta ade nyitsarü apüm tbachi liba tsü abinü mahnung.

⁹Abi, abi rothsarü ko abi yola liba yuchoti adrong tsü tsingxinyübong ko nyükhinü alih shüticho kyo arühnü mahnung.”

¹⁰Amichahba ABÜDONGBAnü Gog te hita yore: “Hütsü shikhe chihde, nühnü lümchung amütsa khüdu nengdang lümnung.

¹¹Nühnü müyurü atbachi la liyacho ko tbünü mütbütipü khümcho liyaba re müzeh yangdi khüdu mahnung dhrongchehnung.

¹²Khüdupi chang liba yangditi la lirü nühnü mahnung ko arüh kohro zang khyünung. Arüh yucho papa lanü shimükhongcho, ko ade arüh akangthsi ko kuthsi lile ko liküprü langtpah la lire.

¹³Shebarü, Dedanrü ko Spain yangditi la shithsabhülehrünü nü te tsingdhengnung. ‘Nühnü zangnung ko kengchonung nengdang du nü rothsarü nübülung mahchoe ang? Nühnü hon ko taripi ko akangthsi ko kuthsi khyüpü athsangnyangcho hütsüdoi hipü tsinyücho do?’ ”

¹⁴Hütsünü abi lümcho Gog te yosohnung Amichahba ABÜDONGBAnü Ih müthehcho: “Ade I müyurü Israelrü khümcho lile,

¹⁵nührünü yucho adrong lanü rezeh rothsarü mülung amülah nüpü nührü müdüm lanü kihkulang ashu la arüh apüm kuri chahnü shemüsunung.

¹⁶Limih chah tsingxinyübong lahkhucho kyo, nühnü I müyurü Israelrü mahnung. Hütsüta shikhe chihde, yuchoti te Ih sünang ngusohnung, ko Ihnü nührü khu nguchichonü Ih amüsaba ngusohnung, I lih mahsohnung Ihnü nührü müthehnung.

¹⁷Aronung la Israel mahsohnung Ihnü nyüh khüdu chürosohnung Ihnü akhulangnü I dikehrü, Israel azikehrüti khu sobhoba tsü nüh lile.” Amichahba ABÜDONGBAnü choko.

¹⁸Amichahba ABÜDONGBAnü yore, “Gognü Israel mah nyümong, I rihlong chüronung.

¹⁹Hütsü nyümong Israel lih la alihyo atrehdi zingnungepü I rihlong chüro züdere.

²⁰Ngu ko uza apüm, kanglungrü aikyah ko amülah, ko limih chah amüi tsurü atümungnü Ih drüchonü dhridhrinung. Azongti khülunung, lungrah trümnahnung ko tbü apüm khülunung.

²¹Suro mütsa athangpinü Ihnü Gog drüsohnung. Ih, Amichahba ABÜDONGBAnü choko. Abi nyitsarü khüdunü khüdu nyüm nohsheng bichinung.

²²Ihnü abi dhsara ko shühkhatohnü khingchinung. Abi ko abi rothsarüti ko abi lahpi zehrü yuchoti chah tsing ko shurü serasah michang ko miphoh zeh thohchahchünung.

²³Hütsüta Ihnü yuchoti te Ih mülahcho ko Müsacho ngusohnung. Hütsüde arühnü Ih, ABÜDONGBAepü müdhenung.”