Read Sangtam Naga EZEKIEL 39 Bible Online

EZEKIEL 39 - Sangtam Naga bible

EZEKIEL 39

¹Amichahba ABÜDONGBAnü yocho, “Nyitsarü tsurü, Meshek ko Tubal yuchoti yangthsarü ayingba Gog mülangjüng, ko abi te Ih abi rorüh lilepü young.

²Ihnü abi lang palang nünung ko abi kihkulang ashu la Israel zong müchihde nüchehchüpehnung.

³Hütsüpü fülilang akheh lanü abi singthsalu ko tsalang akheh lanü abi tbüdeng xüpchehchü pehjünung.

⁴Gog ko abi rothsarü ko abi lahpi zehrü Israel azong la so jonung ko arüh me tsü uzati ko rangmü kanglungrü tsang kangsohnung.

⁵Arüh jungchah khülu sünung. Ih, Amichahba ABÜDONGBAnü choko.

⁶Ihnü Magog lih la ko naying liba kihjüp ayung la michang müthehnung ko apümnü Ih, ABÜDONGBAepü müdhenung.

⁷Ihnü I müyurü Israelrü khyang Ih Amüsa neng müdhesohnung, ko adelü I neng chah ashah mühirosohnung. Hütsüde yuchotinü Ih ABÜDONGBA Israel Amüsa Tsingrang müdhenung.”

⁸Amichahba ABÜDONGBAnü yocho, “Ihnü choba nyümong tsü roriri.

⁹Israel yangditi la lirünü chüdunung ko apehcho thsunohrü tsü michanghi thsanung khyübülungnung. Arühnü michang tsü tsung, singthsalu, tbüdeng, thsuh ko singkingnü thsanung ko kang dhünyeh tahxah linung.

¹⁰Arühnü rangmü lanü sing müyunung mahkhang mürong lanü sing mürenung, tunüo apehcho thsunohrü tsü atahnung kükyo linung. Arüh chahnü mahpü kengcho tsiba tsü arühnü mahnung ko kengcholinung.” Amichahba ABÜDONGBAnü choko.

¹¹ABÜDONGBAnü yocho, “Khode hiri apüm tikehnang, Asü Kihdi nyüchürolang, Shitsehrü Ngah la, Ihnü Israel lih hütsüla Gog rangnung alih jünung. Gog ko abi rothsarü apüm hütsüla dhrürangnung ko hütsüba ngah te, ‘Gog Rothsarü Ngah pü dsinung.’

¹²Me tsü apüm dhrürangnung ko alih tsü thali müsa kangnung Israelrünü choo dhünyeh khyünung.

¹³Hütsüla lirü apümnü me rangnung la tsü tronung, ko Ih akoh nyümong hütsü nengdang arüh dhichinung. Ih Amichahba ABÜDONGBAnü choko.

¹⁴Choo dhünyeh tsü khuko khanglang, alih tsü müsasohnung arühnü anyingcho me yangchi thro dhrürangnung nyitsarü throchehnung.

¹⁵Arühnü alih la tsü tuwüli jürolide, nyitsarü rüh ngu müipi, kong jurünü hütsü ngu Gog Rothsarü Ngah la thro rangnungthsa hütsü te amüdhethsa yohpünung.

¹⁶(Hütsüla rothsarü nengla tsü yangdi khüdu linung.) Hütsüta alih tsü thali müsa kangnung.”

¹⁷Amichahba ABÜDONGBAnü I te yocho, “Nyitsarü tsurü, Ihnü arüh nengdang kangmübü rungnümba hi tsunung apümlangnü uzati ko kanglungrü dsibülung. Hütsü Israel zong la thsüti arangcheh linung, hütsüla arühnü shuh tsunung ko ashüh yongnung.

¹⁸Arüh apüm mizapung mahkhang san mahkhang miza mahkhang misü akangpü mapsehcho kyo arühnü rothsarüti shuh tsunung, ko limih yangthsarü shüh yongnung.

¹⁹Khode Ihnü hiri nyitsarü kangmübü roh-i mapsehnang, uzati ko kanglungrünü müchehthohtashi tsunung, ko arüh ashühnü mümücha tashi yongnung.

²⁰I tsingthsang chah arühnü kohcho kuri ko hütsü chah pümrüti ko rothsarüti tsunung. Ih, Amichahba ABÜDONGBAnü choko.”

²¹ABÜDONGBAnü yocho, “Ihnü yuchoti khyang I ahechi ngusohnung Ih yuje adhrongcheh nguchinung I zii khüta bichirü hütsü ngusohnung.

²²Hütsütinü Israelrünü Ih ABÜDONGBA arüh Tsingrangepü müdhenung.

²³Ko Israelrünü Ih nyüm amünyi shitpahcho ngang arüh yangtsi lang wüsohchoepü yuchotinü müdhenung. Ih arüh tenü ximülacho ko arüh rorünü arüh kohcho, ko khata la arüh kyüsehcho.

²⁴Arüh mümüsacho ko khürahcho aleng Ihnü arüh khyang jücho, ko arüh tenü ximüla tsicho.”

²⁵Amichahba ABÜDONGBAnü yocho, “Ta ade Ihnü Jakob trah, Israelrü te yanglilümnung, ko arüh thali müwasohnung. Ihnü I Amüsa neng tsungtinung.

²⁶Arüh thali arühbürü lih la, sünüsü arüh müdrüsohpü lide, Ih kihyochücho ngang arüh khüta wahsohcho hütsü arühnü nbüchopehnung.

²⁷Yuchoti te I Amüsaba ngusohnung, arüh rorüh liba yangditi apüm lanü Ihnü I müyurü thali noronung.

²⁸Hütsüde I müyurünü Ih arüh Tsingrang ABÜDONGBAepü müdhenung. Arühnü hi müdhenung, tunüo Ihnü arüh arangyoh lang wüsohcho ko ade arühbürü lih lang süsü müpehjüpü nüli rore.

²⁹Ihnü Israelrü chah I nbü mükhakehjünung ko khodesü thali arüh tenü ximüla mütsinung. Ih, Amichahba ABÜDONGBAnü choko.”