Read Sangtam Naga EZEKIEL 4 Bible Online

EZEKIEL 4 - Sangtam Naga bible

EZEKIEL 4

¹Tsingrangbanü yocho, “Nyitsarü tsurü, atahlung khüdu hirung, ko hütsü michah Jerusalem yangdi thrikehng.

²Hütsüpü betinung amüdhethsa, arang lang jung, alih bhümkehng, müdongji thsaang, ko hütsü mükang map-phohji külüpm.

³Idhsetpah khüdu hirung ko hütsü yangdi nühjü kahla tbü roh-i yangdi lahpi pii müdong. Hütsü betiko, ko hütsü betiba tsü nüh. Israel yucho nengdang hütsü amüdhethsa khüdu linung.

⁴“Hütsüpü nü fülilangthringnü yüpjoung, ko Ihnü nü chah Israel yucho mülang yohpüjünung.

⁵Nüh hütsüla nyümong 390 arüh münyi ngang khingchi linung. Ihnü arüh khingchi ayung, kang khüdu la nyümong khüdu nüh khingchinung.

⁶Khode nüh hütsü changkanang, nü tsalang ximülang ko Juda münyi nengdang akhingchi kang müipi nyümong khüdu-khüdu nyümong yüre chongchang.

⁷“Jerusalem beticho lahpi nü be pieng. Yangdi chah tsü nüjing tiipehng ko hütsü nyüm choyohng.

⁸Hütsü beba tsü mükhude nüh müximülachehnungthsa, Ihnü nüh rah yohpünung.

⁹“Ade litoh, lüdi, lengli, honu, titse ko xutse aza hirung. Arüh apüm yohrütaang ko hümthse külüpm. Ko nüh nyümong 390 nü fülilangnü yüpjode, hütsü du tsunung.

¹⁰Nü khyang nyümong la hümthse gram 230 jünung, ko hütsünü nyümong khüu yingcheh bichinung.

¹¹Nü khyang kihsü akyahchocho, nyümong la shing anyüh du jünung.

¹²Nühnü nyitsarü chüh kungchonü michang thsanung, ko hütsü chah tsünü hümthse ruhnü apümnü ngu nühnü tsunung.”

¹³ABÜDONGBAnü yocho, “Ihnü arüh shuparü limih lang shupishuza pehjüde, yuzengnü mümülacho Israelrünü hiroh-i tsunung amüdhethsa linung.”

¹⁴Ta Ihnü lalingcho, “Doh, Amichahba ABÜDONGBA! Ihnü khodesü Ipu mümünyi. I zadenü Ihnü khodesü amükangnü sücho mahkhang rangmü kanglungrünü mükahsehcho shuh tsu müro. Amümüsa tsuyongba Ihnü khodesü mütsu.”

¹⁵Hütsünü Tsingrangbanü yocho, “Dee tsale. Ihnü hütsü mülih misü chüh bichisohnung, ko nühnü hütsü michahnü hümthse külüpm.”

¹⁶Abinü hisü yocho, “Nyitsarü tsurü, Ihnü Jerusalem nengdang tsuyongba chixiba yatinung. Hütsüla lirü nyitsarütinü arüh tsuba tsang ko arüh yongba kih tsü müchehdhengde wahnung ko lümxünung.

¹⁷Arüh tsang ko kih kingkanung; mükünyang linung ko arüh münyi ngang arüh khingchinung.”