Read Sangtam Naga EZEKIEL 40 Bible Online

EZEKIEL 40 - Sangtam Naga bible

EZEKIEL 40

¹Hütsü kangsi la adhüre nyümong, khüiba ihrü yangtsi lang nowüpü kang mükyüpü müngau ko Jerusalem mahchehpü kang dhüre-müyüu thsacho. Hütsü nyümong I chah ABÜDONGBA zehcho müdhecho ko Abinü Ih notsicho.

²Müngucheh la Tsingrangbanü Ih Israel lih lang nowücho ko azong athseng khüdu chah pümsohcho. I bete Ihnü yangdi khüdu kyo kuh mülungo ngucho.

³Abinü alaa shündhün Ih nowücho ko imüyeng kyo heba nyitsarü khüdu Ihnü ngucho. Abinü akihsing anana ayo khüdu ko adong khüdu bipü tbükhüm te yacho.

⁴Abinü I te yocho, “Dheng, Nyitsarü tsurü. Longi nyieng ko Ihnü nü te ngusohcho lüpcho tsü müsijo nyieng, tunüo hi nengdang nüh hila norocho. Nühnü ngucho lüpcho Israelrü te nühnü yonung lile.”

⁵Ihnü nguba tsü Amübükuh, ko hütsü mükang tbünü tbüticho. Nyitsarüba tsünü ashenglang kehap dhüroh akihsing adong tsü hirocho ko tbü tsü kihcho. Hütsü athsenglang khehap dhüroh ko achehlang khehap dhüroh licho.

⁶Hütsüpü abinü nyüchürolang piba tbükhüm lang tsü wücho. Abi phaqu la küducho ko amunglangnü abinü trahtri tsü kihcho; hütsü asohlang khehap dhüroh licho.

⁷Hütsü pohki tsü lang khüdu licho ko anyüdinglang anyahrü kuh asang-sang licho. Achongsah apüm tsü adi-asheng sako licho, khehap münga-nga, ko anyüh kahla züdi tsü achehlang khehap münga licho. Anyahrü kuh pohki tsü lang khüdu ashenglang khehap münga, amübükuh trahtri lang piba züduji licho.

⁸Abinü hiba chongsah kihcho, ko hütsü asohlang khehap keh thsacho.

⁹Hütsünü Amübükuh münyeh-u trahtri kangsohcho ko züdi achangka lang tsü achehlang khehap anyüh thsacho.

¹⁰(Lang anyüdinglang anyahrü kuh tsü adi-asheng sako licho, ko züdi tsüsü achehlang sako du licho.)

¹¹Hütsüpü, nyitsarüba tsünü tbükhüm la lang adilang tsü kihcho. Hütsü apümnü khehap dhüre asang thsacho, ko khangthru liba trahtri adukah tsü khehap dhüre thsacho.

¹²Anyahrü kuh müipi bete tsü tbü amünyüm khüdu-khüdu athsenglang ko achehlang khehap khüdu thsacho. (Achongsah tsü adi-asheng khehap dhürüroh thsacho.)

¹³Hütsüpü abinü achongsah khüdu akhanglang züdi lanü lang lahkhuba achongsah akhanglang chii adukah tsü kiidhengcho, ko hütsü khehap mükyüpü münga thsacho.

¹⁴Achangkaba chongsah la tsünü kekhüm lang chüducho. Abinü hütsüba chongsah tsü kiidhengcho ko hütsü adilang khehap mükyü thsacho.

¹⁵Dongkhu tbü lanü achangkaba chongsah chii tbükhüm ashenglang tsü khehap dhünyang thsacho.

¹⁶Chongsah apüm dongkhu züdi la tsü ko chongsahti kahla ayonglang züdi apüm la akhi aikyükyah tpehcho. Langlang liba ayonglang züditi la tsü sedong thrikeh licho.

¹⁷Nyitsarüba tsünü kekhüm tsü khu Ih nowücho. Dongkhu tbü chah nyingkeh chongsah sangre thsa licho ko hütsüri bete Kekhüm tsü mükang lungnü chungcho angah licho.

¹⁸Hiba dongkhu tbükhüm tsü ayonglang kukhüm tenü apohkithsa licho.

¹⁹Ayonglang kekhüm lang züduba lang te tsü amunglangthring trahtri khüdu licho. Nyitsarüba tsünü trahtri anyüh kahla tsü kiidhengcho, ko hütsü khehap thsih khüdu thsacho.

²⁰Hütsüpü nyitsarüba tsünü dongkhu kekhüm lang chüduba kihkulang tbükhüm tsü kiidhengcho.

²¹Lang anyüdinglang chongsah asang-asang, arüh kahla züdi ko nyüchüro tbükhüm la liba akihchocho sako chongsah arangcheh licho. Tbükhüm ashenglang apüm tsü khehap dhünyang, ko adilang khehap mükyüpü münga.

²²Chongsah arangcheh, nyübongkhi, ko sedong thrikehba tsü nyüchüro tbükhüm la liba kyo licho. Hila trahtri lang tsü phaqu dhünyeh küdu licho, ko chongsah arangcheh tsü achangka la kekhüm lahpi pipü licho.

²³Hiba kihkulang tbükhüm lanü Kekhüm tsü khu nyüchürolang liba akihchocho sako ayonglang kukhüm lang züduba tbükhüm khüdu licho. Nyitsarüba tsünü hiba tbükhüm anyüh kahla tsü kiidhengcho ko hütsü khehap thsih khüdu thsacho.

²⁴Hütsüpü, nyitsarüba tsünü kihjinglang Ih nowücho, ko hütsüla ihrünü tbükhüm apa khüdu ngucho. Abinü ayonglang züdi ko trahtri chongsah tsü kiidhengcho, ko arüh tsü aparü roh-i du licho.

²⁵Apa la roh-i du tsü chongsah la tsü nyübongkhi licho. Tbükhüm ashenglang apümnü khehap dhünyang, ko adilang khehap mükyüpü münga.

²⁶Hütsülang phaqu dhünyeh küducho, ko trahtri chongsah tsü achangkalang kekhüm lahpi pii licho. Langlang piba ayonglang züdi chah tsü sedong thrikeh licho.

²⁷Hilasü, ayonglang kukhüm züduba lang trahtri khüdu licho. Nyitsarüba tsünü hiba anyüuba trahtri tsü chii kiidhengcho, ko hütsü khehap thsih khüdu thsacho.

²⁸Nyitsarüba tsünü kihjinglang tbükhüm tsü khu ayonglangba kukhüm lang tsü Ih no züducho. Abinü tbükhüm tsü kiidhengcho, ko hütsü dongkhu tbü doi tsü thsacho.

²⁹Anyahrü kuh, chongsah arangcheh, ko ayonglangba züdi apüm tsü apa tbükhüm roh-i du tsü licho. Hiba tbükhüm chongsahti la tsü nyübongkhi licho.

³⁰Ashenglang apümnü khehap dhünyang, ko adilang khehap mükyüpü münga licho.

³¹Trahtri chongsah tsü apa kekhüm lahpi pii licho, ko lang ayung la züdi chah tsü sedong thrikeh licho. Hiba tbükhüm lang tsü phaqu keh küdu licho.

³²Nyitsarüba tsünü nyüchüro tbükhüm tsü khu ayonglang kukhüm lang tsü Ih no züducho. Abinü tbükhüm tsü kiidhengcho ko hütsü aparü roh-i thsacho.

³³Anyahrü kuh, chongsah arangcheh, ko ayonglangba züdi apüm tsü apa tbükhüm roh-i du licho. Mükangmüla nyübongkhi vicho, ko chongsah arangcheh lasü licho. Ashenglang apümnü khehap dhünyang, ko adilang khehap mükyüpü münga licho.

³⁴Chongsah arangcheh tsü dongkhu kekhüm lang pipü licho. Lang ayung züdi chah tsü sedong thrikeh licho. Hiba tbükhüm lang tsü phaqu keh küdu licho.

³⁵Hütsüpü nyitsarüba tsünü kihkulang tbükhüm lang tsü Ih nowücho. Abinü hütsü kiidhengcho ko hütsü aparü roh-i du thsacho.

³⁶Hütsü kyo, hilasü anyahrü kuh licho, ko ayonglang asehyahcho züdi chongsah arangcheh khüdu, ko mükangmüla nyübongkhi licho. Ashenglang apümnü khehap dhünyang, ko adilang khehap mükyüpü münga licho.

³⁷Chongsah arangcheh tsü dongkhu kekhüm lahpi pii licho. Lang ayung züdi chah tsü sedong thrikeh licho. Hiba tbükhüm lang tsü phaqu keh küdu licho.

³⁸Dongkhu kekhüm la tsü kihkulang tbükhüm te tsü chongsah khüdu licho. Hütsünü kekhüm lahpi pii liba chongsah lang khangthrujücho, ko hütsüla arühnü kangmübü nengdang kanglungrü thsüthohcho.

³⁹Hiba chongsah arangcheh la tsü tsingthsang müyü licho, chongsah khüulang anyünyüh. Hiri tsingthsang chah, üpümshünü trüpba mahkhang münyi nengdang kangmübü mahkhang sahliba kangmübü mübünung arühnü kanglungrü mapsehcho.

⁴⁰Dongkhu tsü hütsütari tsingthsang müyü licho, kihkulang tbükhüm la züdulang khüu-khüu lang anyünyüh.

⁴¹Kangmübü nengdang kanglungrü mapsehnung apümnü tsingthsang keh licho: müyü kuh yonglang ko müyü dongkhu kekhüm la.

⁴²Trahtri te chongsah la lung tsingthsang müyü tsü üpümshünü kangmübü jünung khanahji thsacho. Hütsü adi-ashenglang khehap khüdupü achangsho, ko athsenglang khehap khüdu licho. Kangmübü kanglungrü mapsehde bichiba kohro apüm tsü hiri tsingthsang chah yohpücho.

⁴³Tsingthsang tsü mükangnü abemong la avihsing mükang yohpücho. Kangmübü la mübünung shuh apüm tsü hiri tsingthsang chah yohpücho.

⁴⁴Hütsüpü abinü ayonglangba kukhüm lang Ih nozüducho. Hütsüla chongsah anyüh khangthrupü khüdu kihkulang tbükhüm te kihjinglang pii ko akhüu tsü kihjinglang tbükhüm te kihkulang pipü licho.

⁴⁵Kihjinglang liba chongsah tsü Amübükuh la dikehrü bebürü nengdang,

⁴⁶ko kihkulang piba chongsah tsü bholu chah dikehrü bebürü nengdang licho nyitsarüba tsünü I te yocho. Bebürüti apüm tsü Zadok chahnü trahchocho; Levi hung lanü ABÜDONGBA liba la züdu dikehnung mülarüti tsü hiri du licho.

⁴⁷Nyitsarüba tsünü ayonglangba kukhüm tsü kiidhengcho, ko hütsü apümlang khehap thsih khüdu thsacho. Amübükuh tsü nyüzüdulang licho, ko hütsü bete tsü bholu licho.

⁴⁸Hütsüpü, Amübükuh lang züduba chongsah arangcheh lang tsü Ih nowücho. Abinü trahtri tsü kiidhengcho: hütsü asohlang khehap münga, ko adilang khehap dhüre-müyü, ko anyüdinglang züdi tsü achehlang khehap asang licho.

⁴⁹Trahtri chongsah lang züduba phaqu tsü adilang khehap mükyü, ko asohlang khehap dhüre-anyüh thsacho. Trahtri khüu-khüulang dongdi anyünyüh licho.