Read Sangtam Naga EZEKIEL 41 Bible Online

EZEKIEL 41 - Sangtam Naga bible

EZEKIEL 41

¹Hütsüpü, nyitsarüba tsünü chongsah along, Amüsa Müdüm lang tsü Ih no züducho. Hütsülang züduba lang tsü abinü kiidhengcho: hütsü asohlang khehap dhüroh

²ko adilang khehap dhüre, ko anyüdinglang züdi achehlang khehap münga licho. Abinü achongsah abükyü tsüsü kiidhengcho: hütsü ashenglang khehap yüre, ko adilang khehap mükyü thsacho.

³Hütsüpü abinü ayonglangba chongsah lang wücho. Abinü hütsülang züduba lang tsü kiidhengcho: hütsü asohlang khehap anyüh, ko adilang khehap dhüroh, ko anyüdinglang züdi achehlang khehap dhünyeh licho.

⁴Abinü achongsah abükyü tsüsü kiidhengcho, ko hütsü apümlang khehap mükyü-kyü thsacho. Hütsüpü abinü I te yocho, “Hiba hi Amüsauba Müdüm tsü lile.”

⁵Nyitsarüba tsünü Amübükuh ayonglangba züdi achehlang kiidhengcho, ko hütsü khehap dhüroh thsacho. Hiba züdi chah chungkeh Amübükuh mükangmüla adilang khehap müyü-yünü chongsah adrong licho.

⁶Hiri chongsahti tsü chung asang kuhla, chung müipi chongsah sangrere licho. Chongsahti tsü dhrüze müzehpü yachehnung nengdang, Amübükuh dongkhu züdi tsü achung müipi apohkiba achung tenü ajengpau thsacho.

⁷Hütsünü dongkhu langnü dhengde, amübükuh züdi tsü amungthriba chii achehlang sako roh-i ngucho. Apohkiba chung lanü alongla ko amunglangba chung lang küduchehnung, Amübükuh dongkhu züdi chah ngakeh chongsahti mihlang loba anyüh külüpcho.

⁸Hiri chongsah mihlang tsü achehlang khehap münga thsacho; Amübükuh kihkulang chongsahti lang trahtri khüdu ko kihjinglang nengdang trahtri khüdu licho. Ko Amübükuh tsü mükangmüla müdongkehsing adilang khehap münga licho Ihnü ngucho, hütsü alih lanü khehap dhüroh, ko amübükuh tbü te müjang licho. Bebürü liba kuh ko müdongkehsing nyüh kahla Amübükuh mükangmüla khehap mükyü adukah yohpücho.

¹²Amübükuh nyüzüdulang adukah achangka la tsü kuh khüdu ashenglang khehap kuhre, ko adilang khehap nyühre licho; ko züdi tsü mükangmüla achehlang khehap münga licho.

¹³Nyitsarüba tsünü Amübükuh dongkhu tsü kiidhengcho, ko hütsü ashenglang khehap thsih khüdu thsacho. Ko Amübükuh akhanglangnü nyüzüdulang Amübükuh kahla adukah tsü lahsah hütsüsü khehap thsih khüdu licho.

¹⁴Amübükuh belang anyüdinglang adukah zeh, hütsüsü khehap thsih khüdu licho.

¹⁵Abinü anyüdinglang kuh yonglang lang zeh nyüzüdulang kuh ashenglang tsü kiidhengcho, ko hütsüsü khehap thsih khüdu thsacho. Amübükuh trahtri chongsah, Amüsa Müdüm ko Amüsauba Müdüm

¹⁶alih lanü nyübongkhi chii singnü müshücho. Hiri nyübongkhiti tsü müshütinung koh licho.

¹⁷Amübükuh ayonglang züdi tsü trahtri kukhang mihlang chii

¹⁸sedong ko cherubim aqo anyüh kehba kanglungrünü jeng thrikeh licho. Sedong khüdu khanglang kanglungrü khüdu, hütsürinü chongsah tsü mükang külüp licho. Kanglungrü müipi romih anyünyüh kehcho:

¹⁹khüulang sedonglang pii nyitsarü romih ko singdong khüulang pinü kihkhünying romih licho.

²⁰Hütsüroh-i alih lanü trahtri mungthri chii züdi mükang thrikeh licho.

²¹Amüsa Müdüm kukhang dong tsü müyüdinglang sako licho. Amüsauba Müdüm trahtri bete tsü

²²singnü külüpcho bholu kyo lango licho. Hütsü athsenglang khehap asang, ko adilang khüdu licho. Ajongnah dongdi, adhikehji ko ajüplang apüm tsü singnü külüpcho licho. Nyitsarüba tsünü I te yocho, “ABÜDONGBA bete liba tsingthsang tsü hi lile.”

²³Amüsa Müdüm lang züduba lang achangka la kukhang khüdu lile ko Amüsauba Müdüm lang wüba achangkalasü khüdu lile.

²⁴Hütsü kukhang tsü kung anyüh thsacho.

²⁵Züdi chah thrikehba kyo, Amüsa Müdüm kukhang chahsü sedong ko cherubim aqo anyüh kehba kanglungrü thrikeh licho. Ko azüduba chongsah michah tsü singnü khümcho.

²⁶Hiba chongsah jüp tsü nyübongkhi licho ko züdi tsü sedong yah thriyoh licho.