Read Sangtam Naga EZEKIEL 42 Bible Online

EZEKIEL 42 - Sangtam Naga bible

EZEKIEL 42

¹Hütsüpü nyitsarüba tsünü dongkhu kekhüm lang Ih nowücho ko Amübükuh nyüzüdulang achangka kuh lanü dee müzapü kihkulang Amübükuh lang kuh khüdu lang Ih norocho.

²Hiba kuh tsü ashenglang khehap thsih khüdu, ko adilang khehap dhünyang licho.

³Khüulangthring khehap mükyü adukah lahpi picho ko akhüulang dongkhu kekhüm lang picho. Hütsü chung asang apohkiba chung tenü khü züdupü chungkehta thsa licho.

⁴Hiba kuh kihkulang ayung tsü lang khüdu adilang khehap dhüre, ko ashenglang khehap thsih khüdu khüulang azüduji zehpü licho.

⁵Chongsah amungthriti tsü alonglabarü tenü asümsau licho, tunüo arüh tsü khü züdupü licho.

⁶Hiri chung asangding la chongsahti tsü kukhüm la apa kuh roh-i dongdinü müthüyehpü tsingthsang dhimüsu yohpücho michah licho.

⁷Apohkiba chung la kuh dongkhu züdi tsü ashenglang khehap dhünyang, ko anyingcho khehap dhünyang la tsü achongnahcho licho.

⁸Amichahba chung la kuh ashenglang khehap dhünyang, ko hütsü pepita ayung tsü khehap thsih khüdu licho.

⁹Hiri chongsah anyüh pohki tsü kuh nyüchüro achangka kekhüm züdi müsucho, hütsüla dongkhu kekhüm lang chüdunung trahtri khüdu licho.

¹⁰Amübükuh kihjinglang nyüzüdu achangka la kuh tenü dee müzapü akyota kuh khüdu licho.

¹¹Chongsahti bete tsü kihkulang liba kyo tsü lang khüdu licho. Hütsü akihchocho sako, athricho sako ko trahtri sako du licho.

¹²Kihjinglang kuh züdi müshüba nyüchüro achangka la tsü chongsahti trahtri khüdu licho.

¹³Nyitsarüba tsünü I te yocho, “Kuh anyüding hi Amüsa. Hiri la ABÜDONGBA yang züdurü bebürütinü Amüsauba amübü tsure. Chongsah tsü Amüsa thsachonü, hütsüla bebürünü Amüsauba amübüti yohpüre: tsang mübü ko münyi nengdang kangmübü jücho ko sahliba amübü.

¹⁴Khode bebürü tsü Amübükuh la züdu linang ko dongkhu kekhüm lang chüdunyünang, ABÜDONGBA dikehde arühnü khyüba Amüsa jengki tsü chongsah hiri la pehjüre. Müyurü shibülung liba lang müchüduede, arühnü apa jengki khyübae.”

¹⁵Khode nyitsrüba tsünü Amübükuh ayonglang kihba tsü thümcho, abinü nyüchüro tbükhüm khu Ih nochüducho ko dongkhu tsü kiidhengcho.

¹⁶Abinü akihsing dong tsü hirocho ko nyüchüro langthring tsü kihcho ko hütsü khehap thsih münga thsacho.

¹⁷Hütsüpü abinü kihkulang, kihjinglang ko nyüzüdulang kiidhengcho,

²⁰ko mükangmüla züdi adi-asheng khehap thsih münga thsacho. Züdi tsünü amümüsa lanü Amüsa changsahcho.