Read Sangtam Naga EZEKIEL 43 Bible Online

EZEKIEL 43 - Sangtam Naga bible

EZEKIEL 43

¹Nyitsarüba tsünü nyüchürolang piba tbükhüm lang tsü Ih norocho,

²ko hütsüla Israel Tsingrang ahechi nyüchürolangnü rocho Ihnü ngucho. Tsingrangba yuva tsü kihdi khongcho kyo rengcho, ko limih chah abi ariri tsünü tehcho.

³Hiba müngucheh hi Jerusalem changjünung Tsingrangba roba khüi Ihnü Chebar Yongkhi te ngucho hütsüroh-i licho. Hütsüde Ih alih la thsütsucho.

⁴Hiba ahechi tsü nyüchüro tbükhüm lahkhu ropü Amübükuh la züducho.

⁵ABÜDONGBA nbünü Ih dhikehcho ko ayonglangba kukhüm lang Ih nowücho, hütsüla Amübükuh tsü ABÜDONGBA ahechinü jeng Ihnü ngucho.

⁶Nyitsarüba tsü hütsüla I müshüm yacho, ko Amübükuh la tsünü ABÜDONGBAnü I te chotacho Ihnü yuchicho:

⁷“Nyitsarü tsurü, I Yangthsaba pümji hila lile. Ih hila Israelrü yola linung ko achangka müli arüh michah yangthsa thsanung. Israelnü nye mahkhang arüh yangthsarünü nye adelü aparü tsingrang mübo mahkhang hiba müdüm la arüh yangthsarü me dhrürangcho khu I neng mümünyijünung.

⁸Ihrü kahla züdi khüdu du zehnungthsa yangthsarütinü I amübükuh trahtri-bekhüm ko kuhkhangdong deta arüh trahtri-bekhüm ko kuhkhangdong thsacho. Arühnü athrünyinung apüm nguchi Ih Amüsa neng münyijücho, ko hütsü khu I rihlong chüro arüh Ihnü changjücho.

⁹Ade arühnü aparü tsingrang mübüba nyehlieng ko arüh yangthsarüti me khyükhung. Arühnü hütsüta nguchikhang, Ih arüh yola lede linung.”

¹⁰Ko ABÜDONGBAnü mütozah yocho, “Nyitsarü tsurü, Amübükuh nengdang tsü Israelrü te young, ko hütsü lümchung yangchisohng. Arüh amünyi nguchi nengdang ashah khyüsohng.

¹¹Arühnü arüh nguchi nengdang shahkhang, arüh te Amübükuh lümchung tsü changnah young: abi athricho, azüduji ko atsiji, atsah lüpcho aküdangcho ko yuzeng lüpcho young. Lüpcho hi khüta küdangcho ko yuzeng hiri apüm bichikhang, arüh nengdang hiri apüm thrahchojünung.

¹²Amübükuh yuzeng tsü hi: Azong akhang ko hütsü mükang apüm tsü khütang Amüsa linung.”

¹³Amübükuh kihba akihsing bichi kihcho bholu akihchocho tsü hita licho. Bholu mükangmüla asohlang khehap khüdu, ko adilang khehap khüdu kihlising licho, ko dongkhu abekhüm athsenglang kyaa khüdu.

¹⁴Apohkiba bholu athahlangnü ajinglang tashi athsenglang khehap anyüh licho. Anyüuba xi tsü mükangmüla khehap khüdu lanü hütsü athsenglang khehap müyü licho.

¹⁵Amungthriba kangmübü trüpji tsü athsenglang khehap müyü thsacho. Jongnah müyü la ajüh tsü aparü tenü athsengthsengu licho.

¹⁶Bholu singtang tsü apümlang khehap dhüre-anyünyüh licho.

¹⁷Alonglaba ngah tsüsü apümlang khehap dhüre-müyüyü, dongkhulang abekhüm athsenglang kyaa khüdu licho. (Kihlising tsü adilang khehap khüdu thsacho.) Bholu lang küduba phaqu tsü nyüchüro lahpi licho.

¹⁸Amichahba ABÜDONGBAnü I te yocho, “Nyitsarü tsurü, I yu hi nyieng. Khode bholu tsü külüpnang, hütsü michah kangmübü trüp ko kangmübü jüba kanglungrü shüh tsünü xahkeh nührünü hütsü müsachehng.

¹⁹Ih dikehnung I licho la ronung tsü Zadok chahnü trahchocho Levi hung lanü bebürüti du thsanung. Ih, Amichahba ABÜDONGBAnü hi mülare. Münyi nengdang kangmübü mübünung arüh khyang misüza khüdu jünung.

²⁰Nührünü ashüh tsü khürü khyo bholu jongnah jüh chah, ko along la ajüh ko abemong mükangmüla apüm chah münohng. Hütsüta nührünü bholu tsü müsachehng.

²¹Nührünü münyi nengdang kangmübü jüba misüpung tsü khyo amübükuh bete athrochehcho müdüm la tsü trüpm.

²²Nyümong khüu tsü münyi nengdang nührünü lapha mükeh miza khüdu khyo amübü jüng. Nührünü misüpung khyüde nguchicho kyo, ashüh tsünü bholu tsü müsachehng.

²³Nührünü hütsüta nguchide, lapha mükeh misüpung khüdu ko mizapung khüdu khyüng, ko arüh tsü I yanglang norung.

²⁴Bebürütinü arüh chah mii xahkehjünung ko I khyang amübü trüpnung.

²⁵Nyümong dhünyeh nyümong mükhu münyi nengdang miza khüdu, misüpung khüdu ko mizapung khüdu kangmübü jüng. Kanglungrü tsü apüm lapha mükeh thsanungbae.

²⁶Nyümong dhünyeh bebürünü bholu tsü bichinung nengdang rungnüm müsacheh ying.

²⁷Khode hütsüba nyükhih tsü khunang, bholu chah tsü amübü jünung ko trüp mübü ko müyurü akehta mübü jünung dikehnung. Hütsüde nührü apüm te Ihnü künyangnung. Ih, Amichahba ABÜDONGBAnü choko.”