Read Sangtam Naga EZEKIEL 44 Bible Online

EZEKIEL 44 - Sangtam Naga bible

EZEKIEL 44

¹Nyitsarüba tsünü Amübükuh müdüm nyüchüro lahpi dongkhu tbükhüm lang Ih norocho.

²Tbükhüm tsü khangti licho, ko ABÜDONGBAnü I te yocho, “Hiba tbükhüm khangti du linung ko khodesü mükhangthrunung. Nyitsarü sü khyangsü hi bichinung mümüla, tunüo Ih Israel Tsingrang ABÜDONGBA hi khu zürocho. Hi khangti du linung.

³Ta ade Yangthsabalü hütsüla wü Amüsa yangtsu tsuyongnung kohle. Abinü ayonglangba achangka chongsah arangcheh khu züdunung ko tbükhüm tsü khu tsinung.”

⁴Hütsüpü nyitsarüba tsünü kihkulang tbükhüm tsü khu Amübükuh belang tsü Ih nowücho. Ko Ihnü dhengde, Amübükuh tsü ABÜDONGBA ahechinü jeng ngucho.

⁵Ihnü I romih alih la haprangcho, ko ABÜDONGBAnü I te yocho, “Nyitsarü tsurü, nühnü nguba ko yuchiba apüm la lasih jüng. Amübükuh yuzeng Ihnü nü te yonung. Amübükuh la sürü züdunung ko chüronung kohro ko sürü mükoh roba tsü longi dheng.

⁶“Ih Amichahba ABÜDONGBAnü adelü arühnü athrünyinung nguchi roba tsü mürangchonung anyümrü Israelrü te young.

⁷Arühnü amümüjüp-pehrü shuparü, I yu münyirüti Amübükuh la kangmübü jücho asu ko ashüh Ih yang müboyade zürosohnü I Amübükuh münyisohcho. Hütsüta I müyurünü athrünyinungti nguchi I azengtacho thsangnyangko.

⁸Arühnü I Amübükuh la amüsa ayah mübü nengdang nguchi mükhyü, ta hütsüla shuparü adhengyehnung yohpücho.

⁹“Amümüjüp-pehrü shuparü, I yocho münyirü süsü ko Israelrü yola lirü yangpirü nye süsü I Amübükuh la züronung mükoh pü, Ih, Amichahba ABÜDONGBAnü mishare.”

¹⁰ABÜDONGBAnü I te yocho, “Ihnü Israelrü yola Levirü zeh, sürünü Ih pehjüpü kyothri mübücho arüh khingchire.

¹¹Arühnü tbükhüm xüküm ko Amübükuh la nguchi Ih dikehnung kohle. Müyurünü trüp mübü ko kangmübü nengdang Ih mübücho kanglungrü arühnü kyüseh ko müyurü dikehnung ajehcho la yanung kohle.

¹²Ta arühnü Israel nengdang kyothri mübüba mübüchonü ko hütsüta nguchi müyurü münyi shitpahsohchonü, arüh khingchinung, Ih Amichahba ABÜDONGBAnü yuchümre.

¹³Arühnü bebürü roh-i Ih müdikehnung mahkhang Amüsa kohro shündhün müwünung mahkhang Amüsauba Müdüm la müzüdunung. Arühnü athrünyinung nguchicho nengdang akhingchi tsü hi thsanung.

¹⁴Arühnü amübükuh la kheh nguchi nguchinung Ihnü arüh chah nyümkehjüre.”

¹⁵Amichahba ABÜDONGBAnü yocho, “Zadok chahnü trahchocho Levi hung lanü bebürütinü Israelrünü I tenü ximüla tsinye, Amübükuh la arühnü yuje cho Ih dikehcho. Hütsünü ade kangmübü asu ko ashüh hiro mübünung ko Ih dikehnung tsü arüh thsanung.

¹⁶Arüh du I Amübükuh la züronung, I bholu chah dikehnung, ko amübükuh la amübü nünung.

¹⁷Khode arühnü ayonglangba Amübükuh kukhüm lang ronung tbükhüm la tsü züronang, arühnü shü anana jengki khyünung. Arühnü ayonglangba kukhüm mahkhang Amübükuh la dikehnung rode, shunbühnü kyahcho jengki mükhyübae.

¹⁸Arüh shikih mümüyehnung nengdang, anana kuthri ko phümthri khyüng, ta rungrüm tükhyü.

¹⁹Arühnü müyurü yaba dongkhu kekhüm lang müwüde, Amübükuh la nguchide khyüba jengki tsü akhu phungcheh Amüsa chongsah la yohpüng. Bürü müpahpihipisohnung arüh Amüsa jengki mülihnung nengdang, arühnü apa jengki khyüng

²⁰“Bebürünü arüh thah tüheh mahkhang kuva athseng tüvi. Arühnü adükeh du vibae.

²¹Ayonglangba kukhüm lang müzüdude bebürünü yongkha tüyong.

²²Bebürü sünüsü azacho khingkurü tükhyü; abinü Israel-larü amüthseng mahkhang aparü bebürü asürü nitpürü du khyüng.

²³“Bebürünü I müyurü te Amüsa ko amümüsa ko ayah amüsa ko athrünyi hiri doung.

²⁴Khode khiyu chüronang, bebürünü I yuzengnü mülacho roh-i yu tsü khaang. I yuzeng roh-i arühnü mübü yangthsa thsüti mungnung ko Sabath müsa yohpünung.

²⁵“Bebürü khüdunü abi tpurü khüdu, abi tsuzarü khüdu mahkhang jünirü mahkhang amüxengcho jünilarü chah khu asücho me chah thahpo mümünyibae.

²⁶Abi thali müsa kangpü khanglang, nyümong dhünyeh lipü du

²⁷abinü ayonglangba kukhüm lang züdunung ko abinü thali Amübükuh la dikehchehnung nengdang abi müsachehba kangmübü mübünung. Ih, Amichahba ABÜDONGBAnü choko.

²⁸“Ihnü Israel khyang shang khüdu lanü shang apa khyang jünung yocho kyo, bebürünü arüh bebü nohlüm ngunung. Arüh Israel la kuthsi mülinung, arüh thsütah apüm Ih lile.

²⁹Tsang mübü, münyi mübü ko sahliba mübü hiri tsü bebürü nohlüm linung, ko I nengdang pathsa tu liro Israel la lüpcho arühnü khyüsohnung.

³⁰Akhu sihcho atsauba apüm ko I khyang mübücho lüpcho bebürü yo thsanung. Müyurünü hüm külüp müipi, arühnü akhu külüpba hümthse tsü amübüthsa bebürü khyang jünung, ko arüh kukhi la I amüwa linung.

³¹Uza mahkhang kanglungrü amükangnü sücho, mahkhang, iha kehcho shuh me tusü bebürünü mütsunung.”