Read Sangtam Naga EZEKIEL 45 Bible Online

EZEKIEL 45 - Sangtam Naga bible

EZEKIEL 45

¹Khode alih tsü ahung müipi khyang nohlüm khüdu-khüdu jünung changnahnang, nohlüm khüdu ABÜDONGBA khyang müsacheh yohpüjüng. Hütsü müthunglang lutri dhüre-anyühpü achangsho ko mübhilang lutri dhüre thsasohng. Hütsüba müdüm apüm tsü Amüsa linung.

²Hiba müdüm la alih müdüm-o Amübükuh nengdang anyüdinglang khehap thsih münga, ko adilang alih adeng khehap dhünyang lisohng.

³Hiba müdüm la achangsho müdüm-o lutri dhüre-anyühpü achangsho ko adilang lutri münga kihchoung; hütsüla Amübükuh yanung, apüm yola Amüsauba müdüm.

⁴Hütsü yanglih la Amüsa Nohlüm khüdu Amübükuh la ABÜDONGBA dikehrü bebürüti nengdang pathsa yohpücho. Hütsüla arüh linung kuh ko Amübükuh nengdang müdüm khüdu zehnung.

⁵Anyingcho achangsho tsü Amübükuh la nguchirü Levirü nengdang pathsa yohpüng. Hütsüla arüh linung yangditi linung.

⁶Amüsa müdüm chah müchikeh tsü ashenglang lutri dhüre-anyühpü achangsho ko adilang lutri anyüpü achangsho müdüm khüdu Israelrü masü ro linung nengdang pathsa yohpünung.

⁷Yangthsaba nengdangsü alih tsü khasah yohpüjünung. Amüsa müdüm nyüzüdulang lurü lanü Mediteranean Kihdi chii; ko nyüchürolang lurü lanü Israel hung khüdu khyang jehjücho te ashenglang tsü sako thsanungthsa yangdi nyüchüro lurü chii.

⁸Yangthsabanü müyurü müsehchinung nengdang, hiba müdüm tsü Israel lih la abi yo thsanung, ta anyingcho tsü Israel hung papa yo thsanung.

⁹Amichahba ABÜDONGBAnü yocho, “Nührü Israel Yangthsarüti, nührünü nyahlira amünyi shitpahko! Shüh khatohba ko sehchiba nyehlieng. Tu athsalang ko yuje hütsü nguching. Nührünü hikholü khodesü I müyurü arüh lih lanü tüipeh. Ih, Amichahba ABÜDONGBAnü hi nührü te yore.

¹⁰“Atümungnü ahosing ko akihsing yuje cho bichieng:

¹¹“Akung kohro nengdang Efa ko akih kohro nengdang bat te müjang thsasohng. Homer tsü along la thsanung. Akihsing hiroh-i linung: Homer 1= efa 10= bat 10.

¹²“Ahosing tsü hiroh-i: gera 20= shekel 1 shekel 60= Mina 1.

¹³“Nührü amübü tsü hirinü mülacho roh-i bichieng. Litoh: 1/60 nührü maxacho lanü nohlüm rohre la nohlüm khüdu. Lüdi: 1/60 nührü maxacho lanü nohlüm rohre la nohlüm khüdu. Olive tuji: 1/100 nührü singdong chah sihcho lanü nohlüm 100 lanü nohlüm khüdu. (Batnü kyahng: bat 10= homer 1= Kor 1.) San: San 200 müipi lanü san khüdu. “Nührü münyi pehnung nengdang nührünü tsang mübü, üpümnü trüp mübü nengdang kanglungrü ko akehta mübü nengdang kanglungrü hirung. Ih, Amichahba ABÜDONGBAnü yuzeng jüre.

¹⁶“Yanglih la müyurü apümnü Israel Yangthsaba yang hiri amübü jüng.

¹⁷Kanglungrü üpümnü trüp mübü nengdang, tsang mübü, Israelrü apüm nengdang yongkha mübü Chonu Asi, Sabath ko apa thsütiti la mübünung jünung tsü nührü nguchi lile. Israelrü münyi pehnung nengdang, münyi mübü, tsang mübü, trüp mübü ko akehta mübü hiri abinü jünung.”

¹⁸Amichahba ABÜDONGBAnü yocho, “Akhudiba choo la akhudiba nyümong, nührünü lapha mükeh misüpung khyo Amübükuh müsachehng.

¹⁹Bebürünü hiba münyi mübü lanü ashüh aza khyo Amübükuh trahtridong chah, bholu jongnah müyü la ajüh chah ko ayonglangba kukhüm lang züduba tbükhüm dongdi chah münohng.

²⁰Choo la dhünyeh nyümong tsü mümüdhepü mahkhang ahsanü mahpü amünyi shitpahrü masü nengla hütsü akyokyo tsü nührünü nguching. Hütsüta nührü Amübükuh tsü müsa yohpüng.

²¹“Akhudiba choo la dhüre-müyüu nyümong nührünü Phungkhu Thsüti mungba dikehnung. Nyümong dhünyeh atümungnü bhüpza müyohpü külüpcho hümthse tsunung.

²²Thsüti akhudiba nyümong Yangthsabanü apu ko müyurü münyi nengdang misüpung khüdu kangmübü jünung.

²³Thsüti nyümong dhünyeh müipi ABÜDONGBA khyang apunü lapha mükeh misüpung dhünyeh ko mizapung dhünyeh üpümshünü trüp kangmübü jünung. Nyümong mükhu abinü münyi mübüsü mizapung khüdu-khüdu kangmübü mübüng.

²⁴Kangmübü jüba misüpung ko mizapung müipi nengdang, tse süreh dhüre-dhünyeh ko achangsho ko olive tuji liter asang amübü jüng.

²⁵“Choo dhünyeh la nyümong dhüre-müngau la dikehba Tsikeh Thsüti nengdang, Yangthsabanü nyümong dhünyeh müipi tsü münyi nengdang kangmübü sako, trüp mübü nengdang üpümshünü trüp mübüba sako, tsang ko olive tuji mübü sako amübü jüng.”