Read Sangtam Naga EZEKIEL 46 Bible Online

EZEKIEL 46 - Sangtam Naga bible

EZEKIEL 46

¹Amichahba ABÜDONGBAnü yore, “Ayonglangba kukhüm nyüchürolang tbükhüm tsü nguchiba nyümong dhüroh tsü khangtipünung, ta hütsü Sabath ko Chonu Asi Thsüti nyümong la du khangthrunung.

²Yangthsaba tsü dongkhu kekhüm lanü trahtri tsü khu züduba trahtri lang tsü wünung ko bebürütinü trüp mübü kangmübü ko akehta mübü joyade abinü tbükhüm dongdi yingte yanung. Hütsüla tbükhüm te tsü abinü mübüpü thali dongkhu chüdunung. Mümade tbükhüm tsü mükhangtinung.

³Sabath ko Chonu Asi Thsüti nyümong müipi nyitsarü atümungnü tbükhüm bete tsü ABÜDONGBA mükhukeh mübüng.

⁴“Sabath nyümong Yangthsabanü ABÜDONGBA yang üpümshünü trüp mübü nengdang lapha mükeh sanza dhüroh ko mizapung khüdu hironung.

⁵Miza apung müipi te tse süreh dhüre-dhünyehpü achangsho, ko sanza müipi te abinü jünyücho hironung. Tsang mübü müipi te olive tuji liter asang hirung.

⁶Chonu Asi Thsüti la abinü misü bongtho khüdu, sanza dhüroh ko mizapung khüdu, apüm lapha mükehcho amübü jüng.

⁷Misüpung müipi ko mizapung müipi te tse süreh dhüre-dhünyehpü achangsho, sanza müipi te Yangthsabanü abi jünyücho, hütsüri amübü jüng. Hütsütari tsang mübü khüdu la, olive tuji liter asang amübü jüng.

⁸Yangthsabanü tbükhüm trahtri chongsah tsü pehjüpü apu züduba lang la tsünü tsinung.

⁹“Khode thsüti masü la müyurütinü ABÜDONGBA mübünung ronang, arühnü mübüpü khanglang sürü kihkulang tbükhüm langnü rocho arüh kihjinglang tbükhüm khu tsinung ko sürü kihjinglang tbükhüm langnü rocho arüh kihkulang tbükhüm langnü tsinung. Süsü palu zürocho langnü mütsinung, ta trahtri akhüulang tsünü tsinung.

¹⁰Khode müyurü züronang Yangthsaba züronung, ko khode arüh tsinang, abisü chüdunung.

¹¹Thsüti nyümongti la ko thsüti la misüpung müipi te tsang mübü tsü süreh dhüre-dhünyehpü achangsho thsanung ko sanza müipitelü mübürünü jünyücho jünung. Hütsütari tsang mübü müipi te olive tuji liter asang amübü jünung.

¹²“Khode Yangthsabanü ABÜDONGBA khyang amüküp mübü jünyünang, üpümshünü trüp mübü nye mahkhang akehta mübü nye, abi nengdang ayonglangba kukhüm lang züduba nyüchüro tbükhüm tsü khangthru yohpüjünung. Abinü amübü tsü Sabath nyümong la mübüba sako tsü mübünung ko abi tsiko khanglang tbükhüm tsü khangtinung.”

¹³ABÜDONGBAnü yore, “Nyangnyü mükhu ABÜDONGBA khyang lapha mükeh kang khüdu za sanza khüdu-khüdu trüp mübü jüng. Hiba amübü hi nyümong mükhu mübünung.

¹⁴Adesü nyangnyü mükhu hüm süreh anyüh la müsunung olive tuji liter khüdu amübü jüng. ABÜDONGBA khyang mübüba yuzeng hi lede nengdang linung.

¹⁵ABÜDONGBA khyang san, hüm ko olive tuji tsü nyangnyü mükhu lede mübünung.”

¹⁶Amichahba ABÜDONGBAnü yuzeng jüre: “Yangthsabanü abi lih khüdu atsurü khüdu khyang jiyü thsa jükhang, hütsü tsutpu lih la nohlüm khüdu thsa hütsüba atsurü yo kangnung.

¹⁷Ta Yangthsabanü abi lih khüdu abi pohki nguchirü khüdu khyang jükhang, hütsülü Nyüje jüliba kang la thali Yangthsaba yo kangnung. Hütsü abi yo, ko apu ko abi tsurünü du arühtoh khyünung kohle.

¹⁸Yangthsabanü müyurü yo alih tusü mükhyübae. Müyurü lih sehchi mükhyüjünung nengdang abinü atsurü khyang jüba tsü abi nohlüm lanü thsanungbae.”

¹⁹Hütsüpü nyitsarüba tsünü ayonglangba kukhüm kihjinglang tbükhüm te kihkulang piba trahtri chongsah lang tsü Ih norocho. Hiri tsü bebürüti nengdang Amüsa chongsahti lile.

²⁰Abinü nyüzüdu lahpi chongsah lang tsü müdüm khüdu chah thongu yocho, “Amüsa kohro tusü kekhüm khu hi chüdu müyurü müdhsakehsohnung, münyi nengdang mahkhang sahliba mübü ko hüm mübü külüp, bebürünü kangmübü jücho shuh chongji müdüm tsü hi lile.”

²¹Hütsüpü abinü dongkhu kekhüm lang Ih no chüdu jongnah müyü müipi la kekhüm anümnüm ashenglang khehap yüre, ko adilang khehap sangre tsü ngusohcho.

²³Arüh müipi tsü züdi chah nyingkeh taphi zeh mükangmüla lungnü chungcho züdi thsacho.

²⁴Nyitsarüba tsünü I te yocho, “Müyurünü mübücho amübükuh la dikehrünü kangmübü chongji chongkyaji tsü hiri lile.”